1 Samuel 12

aymara-1997

1Ukat Samuelux taqi israelitanak nayraqatan akham säna: —Jumanakax uñjapxtawa, nayat kunanaktix mayipkista ukanak churapxsma, mä reysa uskurapipxaraksmawa.

2Akax jichhax jumanakan reyimaxa, jupaw apnaqapxätam. Nayasti awkïxtwa, qaqa p'iqïxaraktwa, wawanakaxasti jumanak taypinkaskiwa. Nayasti jumanakarux waynatpach apnaqawayapxsma,

3jumanak nayraqatanktwa: Nayatix khitin urqu vacapsa, asnopsa katuntastxa, khitirus t'aqhisiystxa, ñanqhachstxa, jan ukax khitimpis qullqi chilltayastxa ukaxa, Tatitu nayraqatana, kawkïr reyirutix jupax ajlliski uka nayraqatan juchañchapxita, nayasti uka manut phuqxäwa —sasa.

4Jupanakasti sapxarakïnwa: —Janipuniw kunapachas nanakarux t'aqhisiyapkistati, ñanqhachapkistasa, janirakiw qullqimpis chiqapar uñjatäñatakix chilltayasktati —sasa.

5Samuelusti akham arsurakïna: —Ukhamasti Tatitusa, jupan ajllita reyisa uñjaskiwa, jumanakax janiw kuna juchsa nayarux apsupkistati —sasa. Jupanakax sapxarakïnwa: —Ukhamäskapuniwa —sasa.

6Samuelusti markarux saskakïnwa: —Tatituw Moisés, Aarón tuqi Egipto markat jumanakan nayra awkinakamarux irpsunïna.

7Ukhamasti jichhax wakichasipxam, nayax Tatitu nayraqatan jumanakampi parlä, kuna askinaktix jumanakaru, awkinakamaru lurapktam taqi ukanakata.

8Kunapachatix Jacobumpi, wawanakapampix Egipto markar sarapkän ukkhaxa, egipcionkirinakasti jupanakarux t'aqhisiyapxänwa, jumanakan nayra awkinakamasti Tatituruw arnaqasipxäna, Tatitusti Moisesampiru, Aaronampiruw khithanïna, jupanakaw nayra awkinakamarux Egiptot irpsunïna, ukatsti jupanakarux aka uraqiruw utjnuqtayäna.

9Ukampis jupanakax Tatitu Diosapat armasxapxänwa, ukat jupax Sisaran amparapar katuyäna, jupasti Jabín ejerciton jilïripänwa, Hasor markan reyipa, ukhamarak filisteonakana, moabitanakan reyipan amparaparuw katuyäna, ukanakaw jupanakampix nuwasipxäna.

10Ukatsti jupanakax Tatituruw art'asipxäna akham sasa: ‘Tatay, jumar apanakusax juch lurapxta, Baal, Astarté uka yaqha diosanakaruw yupaychapxta; ukampis jichhax uñisirinakaxan amparapat qhispiyapxita, juma saparukiw yupaychapxäma’ —sasa.

11“Ukat Tatitux Jerubaal, Barac, Jefté, Samuel ukanakar khithanïna, uñisirinakaman munañapat jumanakar qhispiyañataki, ukhamat jumanakax jan khitin kamsat jakasipkäyätaxa.

12Ukampisa kunapachatix amonitanakan Nahas reyipax jumanakar nuwantir jutkän ukkhaxa, jumanakax mä rey mayipxäyätaxa, jumanakan reyimax pachpa Tatitu Diosäkchïn ukasa.

13Ukampis jichhax akaxay jumanakan ajllit reyixa. Tatitux kuna reytix mayipkta uk churapxtamwa.

14Jichhax jumanakaruw Tatitur yupaychapxañanakamax wakt'apxtam, arup ist'asa kamachinak phuqhasaraki, jumanakasa jan ukax jumanakar apnaqir reyisa Tatitun munañaparjama jakasina.

15Ukampisa janitix kamachi arunakapar jaysapkät ukaxa, Tatitux jumanakarusa reyimarusa mutuyapxätamwa.

16“Ukhamasti jichhax kawkhankapktatix ukkhat jan unxtapxamti, kuntix Tatitux jach'a uñacht'äwinakap lurkani ukanak jumanakax uñjapxäta.

17Jichhax trigo apthapiñ urunakawa, janiw jallu pachäkiti, ukampis nayaw Tatiturux mayï, jallun q'ixu q'ixunakamp chik purxatayañapataki, ukhamat Tatitux jumanakar uñacht'ayapxätam, mä reyi mayitanakamampix jan wal lurapxatama” —sasa.

18Ukspachaw Samuelux Tatitur art'asïna, Tatitusti mäkiw q'ixu q'ixunakampi jallumpi apayanïna; ukatsti taqi jaqinakaw Tatitutsa, Samuelutsa wal axsarapxäna.

19Ukat Samuelurux taqiniw sapxäna: —Jumax Tatitu Diosamar achikt'am, aka luqtirinakamax jan jiwarapxañaxataki; nanakan taqi jucha luratanakaxarusti mä reyi mayitaxampiw yapt'apxta —sasa.

20Samuelusti jupanakarux sänwa: —Jan axsarapxamti. Chiqpachansa jumanakax sinti jan wal lurapxtaxa; ukampis jichhax Tatitut jan saraqapxamti, jan ukasti taqi chuymampi yupaychapxam.

21Janiy uka k'ari diosanakarux arkapxamti, k'arïtanakap laykusti janiw yanapapkätamti, janirakiw qhispiyapkätamsa.

22Tatitusti sutipan sinti jach'ätap laykux janiw apanukupkätamti, jupasti jumanakarux markapa tukuyasiñ munapxtam.

23Nayasti jumanakatak Tatitur mayiñxa janipuniw armaskäti, jan maykirista ukax juchaspäwa. Ukampis jumanakarux suman jakaña, chiqapan sarnaqañ yatichapxäma.

24Jumanakax Tatiturukiw axsartapxañama, juparukiw chiqpach taqi chuymampi yupaychapxañama, jumanak layku muspharkañanak luratapata.

25Ukampisa jumanakatix jan wali lurañakpun amtasipkät ukaxa, jumanakasa, reyimasa tukjatäpxätawa —sasa.

← Chapter 11 Chapter 13 →