1 Chronicles 29

aymara-1997

1Uka qhipatsti David reyix tantacht'at jaqinakaruw säna: “Tatitux Salomón wawaxarukiw ajllisi, jupax wawa waynakïskiwa, ukampis lurañax wali jach'awa, lurañasti janiw jaqitaki uta lurañäki ukhamakïkiti, jan ukasti Tatit Diosatak uta lurañawa.

2Taqi ch'amaxampiw kunatix wakiski ukanak Tatituxan utapatakix wakt'ayta: quri, qullqi, bronce, hierro, lawa, sapa mayatakix yaqha yaqha. Ukhamarak cornalina qala, lip'suyañ qala, mosaico qalanaka, kunayman munkañ qalanaka, walja janq'u qalanaka.

3Ukampis kunanaktix Tatitun utapatak wakt'aykta ukanakat sipansa, Diosaxan utapar munasitax laykux qurixsa, qullqixsa, uraqixsa uka utatakiw katuyta:

4pataka waranqa kilo suma quri, pä patak kimsa tunkani waranqa kilo suma qullqi, ukanakax utanakan pirqap lip'ikipayañataki.

5Taqpach qurisa, qullqisa kunatix munaski uk lurañataki, ukhamarak kunayman yänak amparampi luririnakax lurañapataki. Jichhasti, ¿khitis chuymapatjam Tatitun utap lurañatak churañ muni?” sasa.

6Ukhamasti wila masinakan jilïrinakapa, Israel markan ayllunakapat irpirinakapa, soldado tamanakan jilïrinakapa, reyitaki irnaqapki ukanakan jilïrinakapas churäwinak churapxäna,

7jupanakasti Tatitun utap lurañatakix patak suxta tunka phisqan waranqa kilo quri, tunka waranqa qurit lurat qullqinaka, kimsa patak kimsa tunkan waranqa kilo qullqi, niya suxta pataka waranqa kilo bronce, kimsa waranqan waranqapa kimsa patakan waranqa kilo hierro churapxäna.

8Ukhamarak khitinakatix suma munkañ qalanakanïkän ukanakas Tatitun utap lurañatakiw churapxäna, taqi uka yänak uñjañapatakix Guersón chachat saraqir Jehiel wawapaw utt'ayatänxa.

9Jaqinakasti taqi uka yanapanakat wal kusisipxäna, taqi ukanak Tatiturux taqi chuymampiw churapxäna. David reyis wal kusisirakïna.

10Ukhamasti Davidax taqi jaqinak nayraqatan Tatiturux akham yuspagaräna: “¡Tatay, Israel awkixan Diosapa, wiñayatak qullanätawa!

11¡Tatay, jach'a kankañasa, ch'amanïñasa, jach'ar aptatäñasa, apnaqañasa, munañanïñasa jumankiwa! Kunatix alaxpachana, akapachansa utjki ukax jumankiwa. Ukhamarak aka markas jumankiwa, ukampis Tatitu, jumaw taqi ukanakat jilïrïtaxa.

12Qamirïñasa, jach'ar aptatäñas jumat juti. Jumaw taqi ukanak apnaqta. Ukatsti ch'amasa, munañanïñ kankañas amparamankiwa, jach'ar aptatäñasa, munañan kankañ churañas amparamankarakiwa.

13Nanakan Diosaxay, ukat yuspagarapxsma, jach'a sutimsa jach'aruw aptapxta;

14ukampisa, ¿kunarakït nayasti, kunarak markaxasti walja yänak jumar churañatakisti? Chiqpachansa taqi kunaw jumat juti, ukatsti kuntix jumat katuqapksma ukak churapxaraksma.

15Juman nayraqatamanxa jaya markankir sarir jaqikïpxtwa, kamisatix nayra awkinakaxax sarir jaqikïpxäna ukhama, nanakan jakäwinakaxas aka uraqin mä ch'iwir uñtatakiwa, jan kuna suyt'añani.

16“¡Tatay, nanakan Diosaxay, taqi kunas jumankiwa, jumat taqi aka jilarkir yänakax juti, mä uta qullan sutimxar lurañatakiw wakichapxta!

17Diosaxay, nayax yattwa, jumaw chuymanak uñt'taxa, jumatakix chiqa kankañaw askixa. Ukat chiqa chuymampix taqi akanak chursma. Jichhasti kusisitaw uñjarakta markamax akan tantacht'atäsina, munasiñ chuymampiw waxt'äwinak churapxtam.

18Tatay, Abraham, Isaac, Israelan nayra awkinakaxan Diosapa, aka amtäwi markaman chuymapan utjayam, juma tuqir chuymap uñtayarakim.

19Ukhamarak Salomón wawaxarux suma chuyma churarapita, kamachinakama, arsüwinakam jupan phuqhañapataki, ukatsti jumatak uta lurañapataki, nayax ukatakiw taqi kun wakichta” sasa.

20Ukxarusti Davidax tantacht'at jaqinakarux sänwa: “Jichhasti Tatit Diosamar yupaychapxam” sasa. Ukhamasti tantacht'at jaqinakax taqiniw nayra awkinakapan Tatit Diosaparux yupaychapxäna, ukatsti Tatitutakisa, reyitakisa killt'asisaw alt'apxäna.

21Qhipürusti Tatiturux wilañchanaka, nakt'äwinak luqtapxäna: waranqa vaca qallunaka, waranqa mä maran urqu ovejanaka, waranqa urqu ovejanaka, sapa mayax vino waxt'äwinakamp kuna, Israel markataki walja wilañchanakampi.

22Khä urusti Dios nayraqatan wali kusisitaw manq'apxäna, umapxarakïna. Uka qhipatsti payïr kutin David chachan Salomón yuqaparux reyit utt'ayapxäna, ukatsti juparux jach'a jilïrjam Tatiturux luqtapxäna, Sadoc chacharusti sacerdotjam luqtapxarakïna.

23Ukhamaw Salomonax David awkip lanti Tatitun markap apnaqañ qunuñapan qunt'asïna, taqi kunan nayrar sartäna, Israel markas taqiniw juparux ist'äna.

24Ukatsti taqi jilïrinaka, taqi nuwasirinaka, Davidan taqpach wawanakapampix Salomón reyiruw yanapapxäna.

25Tatitusti Israel marka nayraqatan Salomonarux jach'aruw aptäna, marka apnaqäwipsti muspharkañ tukuyäna, ukhamsti jupat nayra janipuniw Israel markan kawkïr reyis jupjamax utjkänti.

26David, Jesé chachan yuqapax taqpach Israel marka apnaqäna.

27Jupasti pusi tunka maraw Israel markan reyipäna, Hebrón markansti paqallqu mara, Jerusalén markansti kimsa tunka kimsan mararaki.

28Jupax wali chuyman tuqiruw jiwxäna, walja maranakani, walja yänakani, aytat kankañampi phuqt'ata. Jupa lantisti Salomón yuqapaw marka apnaqxäna.

29David reyin sarnaqäwipax qalltat tukuykamax Samuel profetana, Natán profetana, Gad amuyt'ayiri profetan sarnaqäwinakapan qillqatawa,

30ukhamarak marka apnaqäwipata, munañanïñapata, kunanakatix jupampi, Israel markampi, mayni markanakampix luraskäna ukanakampit qillqantatarakiwa.