1 Chronicles 28

aymara-1997

1Davidax Jerusalén markan Israelankir jilïrinakaruw tantacht'äna: Ayllunakan irpirinakaparu, reyin luqtirinakapäpki uka soldadonakan jilïrinakaparu, soldado tamanakan jilïrinakaparu, reyin uraqinakapa, uywanakapa, wawanakap uñjirinakaru, wali aytat jaqinakaru, ukhamarak wali aytat soldadonakaru.

2Ukhamasti Davidax sayt'asisin säna: “Jilatanaka, nayan markaxa, ist'apxita: Nayax mä uta lurañ amtäyäta, uka chiqan Tatitun arust'äwi arcapan wiñayatak uchatäñapataki, ukhamaraki Diosasan qunuñap uchatäñapataki, uk lurañatakix niyaw wakicht'äyäta.

3Ukampis Tatitux situwa: ‘Jumasti janiw nayatakix uta lurkasmati, jumax nuwasirïtawa, wilsa wartaraktawa’ sasa.

4Ukampis Israelan Tatit Diosapax taqi wila masix taypit ajllisitu, Israel markan wiñayat apnaqañaxataki. Ukhamasti jupax Judá aylluruw apnaqañapatakix ajllisïna; Judá ayllutsti utankir wila masixaruw ajllisi; jilanakax taypitsti nayaruw Israel marka apnaqañaxatakix ajllisitu.

5Jichhasti, Tatituw walja wawanak churitu, taqi wawanakax taypitsti, Tatitux Salomón wawaxaruw ajllisi, Israel markan sutipxar reyi qunuñan qunt'asiñapataki.

6Tatitusti sarakituwa: ‘Salomón wawamaw nayan utaxa, uta anqäxsa lurarapitani, nayaw juparux wawaxat ajllista, nayasti jupatakix awkipäyäwa,

7ukatsti jupan marka apnaqañap wiñayatakiw utt'ayä, jupatix kamachi arunakaxa, amtäwinakax phuqhañatak ch'amañchasini kunjämtix jichhürkam phuqhaski ukhama’ sasa.

8“Jichhasti, taqpach Israel marka nayraqatana, Tatitun aka tantachäwipa, jiwasar ist'ir Tatitun nayraqatapana, Tatitu Diosaman kamachi arunakap imapxam, ukhamat aka suma uraqix jumanakankaskañapataki, ukatsti wawanakamarus wiñayatak tuti jaytawayxapxañamataki.

9Jumasti, Salomón, munat wawaxa, awkiman Diosapar wasitat uñt'xam, ukatsti taqi chuymampi, suma amtampirak luqtam, Tatitusti taqi amuyunakas uñt'i, jiwasan amtäwinakasa, lup'ïwinakas uñt'araki. Ukhamasti jumatix jupar thaqtätaxa, jikxatätawa, ukampis jumatix jupar apanukütaxa, jupax wiñayatakiw apanukütam.

10Jichhasti jumax amuyam, Tatituw jupan qullan utap lurañatak ajllistam. ¡Ch'amañchasim, ukatsti lurarakim!” sasa.

11Ukatsti Davidax Salomón yuqaparux plano churäna, Tatitun utapan punkupata, utanakapata, imaña utanakata, utanakapata, patäxa utanakapatsa, manqhïxa utanakapatsa, ukhamarak Qullanan Qullanap utatsa.

12Ukhamarus kunatix amuyupan utjkän uka amtäwi lurat churäna, Tatitun utap anqäxa lurayañataki, muytatäñapäki uka utanakataki, jila alani yänakataki, qullan waxt'äwi imañataki,

13ukhamarak sacerdotenakana, levitanakan maykip lurañ utanakataki, Tatitun utapan taqi kunan lurañataki, uka kipkarak yupaychañatak utjki uka yänakataki.

14Ukhamarak qurita, qullqit yänaka lurañatakix qursa, qullqsa waljpun churäna;

15candeleronaka, lamparanak lurañataki, qurisa, qullqisa tupuparjam churatänwa;

16uka pachparakiw qurita, qullqit lurat sapa maya mesanakatakix luräna, mesanak patxansti qullan t'ant'anakaw siqik uchatäñapäna.

17Ukhamarus tenedoranakataki, jach'a qirunakataki, wayuchanakatakix quri churäna, ukhamarak kunayman jisk'a qirunak lurañatakix qursa, qullqsa tupuparjamaw churäna.

18Ukhamarak incienso altaratakix suma quri churäna, uka kipkarak Tatitun arust'äwi arcap apañ carretataki, arcaru chhiqhanakapampi imt'ki uka querubines satanak lurañatakis quri churarakïna.

19Taqi akanaksti Tatitun uñacht'ayataw Davidax mä qillqañar qillqantäna, ukanwa kunjäm lurañäkitix taqi ukanak wali sum qhanañchäna.

20Ukhamasti Davidax Salomonarux sänwa: “¡Ch'amañchasim, ukatsti lurañarurak uskusim! ¡Jan mayjt'asimti, janirak axsaramsa, Tatitu Diosaxaw jumampïskani! Tatitux jupan utap lurañ tukuyañkamax janiw jaytjkätamti, janirakiw armaskätamsa.

21Akankiw Tatitun utapan sacerdotenakana, levitanakan maykip lurañanakapaxa, taqi kun lurañatakix yatxatatanaka, yanapirinakaw utjani; jilïrinakasa, markasa juman arsutanakamarjamaw sarnaqapxani” sasa.

← Chapter 27 Chapter 29 →