Psalms 90

Amharic Tigrinya 2011

1ጐይታየ፡ ካብ ወለዶ ንወለዶ መዕቈቢ ዀንካና።

2ኣኽራን ከይተወልደ፡ ምድርን ዓለምን ከይፈጠርካ፡ ኤረ ንስኻስ ካብ ዘለኣለም ንዘለኣለም ኣምላኽ ኢኻ።

3ኣቱም ደቂ ሰብ፡ ተመለሱ፡ እናበልካ፡ ንሰብ ናብ መሬት ትመልሶ ኣሎኻ።

4ሽሕ ዓመት ኣብ ቅድሜኻ ኸም እዛ ትማሊ ዝሐለፈት መዓልትን ከም ምንቃሕ ለይትን እየን እሞ፡

5ከም ከውሒዝ ትገፎም፡ ከም ትኽስታ እዮም፡ ከምቲ ብጊሓት ዚልማልም ሳዕረ፡

6ንግሆ ይዕምብብ ይልምልም ድማ፡ ኣጋ ምሸት ይዕጸድ እሞ ይነቅጽ።

7ብዂራኻ ጠፊእና ኢና እሞ፡ ብቚጥዓኻውን ሰምቢድና።

8ንኣበሳና ኣብ ቅድሜኻ፡ ንሕብእ ሓጢኣትናውን ኣብ ብርሃን ገጽካ ተቚሞ ኣሎኻ።

9ብዘሎ መዓልትታትና ብቚጥዓኻ ይሐልፍ፡ ዓመታትና ኸም እህህታ ነሕልፈን ኣሎና እሞ፡

10መዓልትታት ዓመታትና ሰብዓ ዓመት፡ እንተ በዝሔ ኸኣ ሰማንያ ዓመት እዩ፡ ቀልጢፉ ይሐልፍ፡ ነፊርናውን ንኸይድ ኢና እሞ፡ ክብረቱ ጻዕርን መከራን እዩ።

11ከም ዚግባእ ምእንቲ ኺፈርሃካ ኢሉስ፡ ንሓይሊ ኲራኻን ንቚጥዓኻን ዚሐስብከ መን እዩ?

12ጥበበኛ ልቢ ምእንቲ ኽንረክብሲ መዓልትታትና ኽንቈጽር ምሀረና።

13ጐይታይ፡ ተመለስ፡ ክሳዕ መኣዝ? ንባሮትካ ምሐሮም።

14ኲለን መዓልትታትና ኽንሕጐስን ባህ ኪብለናንሲ፡ ንግሆ ጸጋኻ ኣጽግበና።

15ብመጠን እተን ዘጨነቕካና መዓልትታትን፡ ክፉእ ዝርኤናለን ዓመታትን ኣሐጒሰና።

16ግብርታትካ ንባሮትካ፡ ክብርኻውን ንውሉዶም ግለጽ።

17ጸጋ እግዚኣብሄር ኣምላኽና ኣብ ልዕሌና ይኹን፡ ተግባር ኣእዳውና ኣስልጠልና፡ እወ፡ ንተግባር ኣእዳውና ንስኻ ኣስልጦ።

← Chapter 89 Chapter 91 →