Psalms 88

Amharic Tigrinya 2011

1ዎ እግዚኣብሄር፡ ኣምላኽ ምድሓነይ፡ ኣብ ቅድሜኻ ለይትን መዓልትን ኤእዊ ኣሎኹ፡

2ጸሎተይ ኣብ ቅድሜኻ ይብጻሕ፡ እዝንኻ ናብ ኣውያተይ ኣድንን።

3ነፍሰይ መከራ ጸጊባ እያ እሞ፡ ህይወተይ ናብ ሲኦል ቀሪባ ኣላ።

4ምስቶም ናብ ጒድጓድ ዚወርዱ ተቘጺረ፡ ሓይሊ ኸም ዜብሉ ሰብኣይ እየ፡

5ከምቶም ድሕርዚ ዘይትዝክሮም፡ ካብ ኢድካ እተቘርጹ፡ ኣብ ጒድጓድውን ዚድቅሱ ቕቱላት ኣብ ማእከል ምዉታት ተደርቤኹ።

6ኣብ ዓሚቚ ጒድጓድ፡ ኣብ ጸልማት፡ ኣብ መዓሙቚ ኣንበርካኒ።

7ቊጥዓኻ ይኸብደኒ ኣሎ፡ ብዂሉ ማዕበላትካ ጸቒጥካኒ።ሴላ።

8ንመሓዙተይ ካባይ ኣርሒቕካ፡ ብኣታቶም ፍንፋን ገበርካኒ፡ ተዐጽየ፡ ምውጻእውን ስኢነ ኣሎኹ።

9ኣዒንተይ ብስቓይ ይስልምታ ኣለዋ፡ ዎ እግዚኣብሄር፡ ኲሉ መዓልቲ ናባኻ ኤእዊ። ኣእዳወይ ናባኻ እዝርግሕ ኣሎኹ።

10ንምዉታትዶ ተኣምራት ትገብረሎም ኢኻ? ዝሞቱስ ተንሲኦምዶ የመስግኑኻ እዮም?ሴላ።

11ኣብ መቓብርካ ሳህልኻ፡ ኣብ ቦታ ጥፍኣትውን እምነትካዶ ይንገር እዩ?

12ተኣምራትዶ ኣብ ጸልማት፡ ጽድቅኻውን ኣብ ምድሪ ምርሳዕ ይፍለጥ እዩ?

13ጐይታየ፡ ኣነ ግና ናባኻ ኤእዊ ኣሎኹ፡ ጸሎተይ ድማ ኣንጊሁ ይቃባበለካ ኣሎ።

14ጐይታየ፡ ስለምንታይ ንነፍሰይ እትድርብያ፡ ንምንታይሲ ገጽካ ትኽውለለይ ኣሎኻ?

15ካብ ንእስነተይ ጀሚረ ሽጉርን ውጹዕን እየ፡ ፍርሃትካ ተሰኪመስ፡ ተስፋ እቘርጽ ኣሎኹ።

16ሓቂ ቚጥዓኻ ብልዕለይ ሐሊፉ፡ ስምባድካ ኣጥፊኡኒ።

17ምሉእ መዓልቲ ኸም ማይ ከቢቦምኒ፡ ሐቢሮም ኣብ ዙርያይ ኣለዉ።

18ንፈታውን ዓርክን ካባይ ኣርሐቕካዮም፡ መሓዛይ ጸልማት እዩ።

← Chapter 87 Chapter 89 →