Psalms 77

Amharic Tigrinya 2011

1ድምጸይ ናብ ኣምላኽ ኣልዒለ ኤእዊ፡ ድምጸይ ናብ ኣምላኽ ኤልዕል ኣሎኹ፡ ንሱውን ይሰምዓኒ እዩ።

2ብመዓልቲ ጸበባይ ንእግዚኣብሄር ደሌኽዎ፡ ብለይቲ ኢደይ ተዘርግሔት ኣይሰልከየትን ከኣ፡ ነፍሰይ ምጽንናዕ ኣበየት።

3ንኣምላኽ እዝክሮን እቚዝምን ኣሎኹ፡ ኤስተንትንን መንፈሰይ ከኣ ይሕለልን ኣሎ።ሴላ።

4ነዒንተይ ቈላሕላሕ ተብለን፡ እሽገር ምዝራብውን እስእን ኣሎኹ።

5ናይ ቀደም መዓልትታት፡ ናይ ጥንቲ ዓመታት እዝክር ኣሎኹ።

6ብለይቲ ንበገናይ እሐስብ፡ ምስ ልበይ ኤስተንትን ኣሎኹ፡ መንፈሰይውን ይምርምር ኣሎ፡

7እግዚኣብሄርሲ ንዘለኣለም ይድርቢ? ድሕርዚኸ ጸጋኡዶ ኣየርእን እዩ?

8ጸጋኡስ ንዘለኣለምዶ ፈጺሙ ተወዲኡ? ተስፋኡኸ ንውሉድ ወለዶዶ ተወዲኡ?

9ኣምላኽሲ ሳህሉዶ ረሲዕዎ? ንምሕረቱስ ብዂራዶ ዐጽይዎ እዩ?ሴላ።

10ኣነ በልኩ፡ እዚ እዩ ድኻመይ፡ ዓመታት የማነይቲ እቲ ልዑል እዝክር ኣሎኹ።

11ናይ ቀደም ተኣምራትካ ኽሐስብ እየ እሞ፡ ንግብርታት እግዚኣብሄር ክዝክሮ እየ፡

12ንብዘሎ ግብርታትካ ድማ ከስተንትናኦ፡ ንዕዮኻውን ክምርምሮ እየ።

13ዎ ኣምላኽ፡ መገድኻ ብቕድስና እዩ፡ ከም ኣምላኽ ዝበለ ዓብዪ ኣምላኽከ መን ኣሎ?

14ተኣምራት እትገብ ኣምላኽ ንስኻ ኢኻ፡ ንሓይልኻ ኣብ ማእከል ኣህዛብ ኣፍለጥካዮ።

15ንህዝብኻ፡ ንውሉድ ያእቆብን ዮሴፍን፡ ብቕልጽምካ ተበጆኻዮ።ሴላ።

16ዎ ኣምላኽ፡ ማያት ረኣዩኻ፡ ማያት ረኣዩኻ ተሸበሩውን፡ እወ፡ መዓመቚ ተናወጸ።

17ደበናታት ብርቱዕ ማያት ኣፍሰሰ፡ ጠፈር ድምጹ ኣስምዔ፡ ፍላጻታትካውን ተወርወረ።

18ድምጺ ነጐድጓድካ ኣብ ህቦብላ ነበረ፡ መባርቕ ንዓለም ኣብርሃ፡ ምድሪ ተናወጸት ኣንቀጥቀጠትውን።

19ጐደናኻ ኣብ ባሕሪ፡ መገድታትካ ኣብ ዓበይቲ ማያት እዩ፡ ኣሰርካውን ኣይተፈልጠን።

20ንህዝብኻ ኸም መጓሰ ብኢድ ሙሴን ኣሮንን ጌርካ መራሕካዮ።

← Chapter 76 Chapter 78 →