Psalms 140

Amharic Tigrinya 2011

1ዎ እግዚኣብሄር፡ ካብቲ እኩይ ሰብ፡ ካብቲ ዓመጸኛ ሰብ ኣናግፈኒ፡ ካብቶም ብልቦም እከይ ዚህቅኑ፡ ኲሉ መዓልቲውን ውግእ ዜልዕሉ ሐልወኒ።

3መልሓሶም ከም ኣትማን የብልሑ፡ ኣብ ትሕቲ ኸናፍሮም ሕንዚ ኣፍዑት ኣሎ።ሴላ።

4ዎ እግዚኣብሄር፡ ካብ ኣእዳው ረሲእ ባልሃኒ፡ ካብ ዓመጸኛ ሰብ፡ ካብቶም ንስጒምተይ ኪሕንኲሉ ዚህቅኑ ሐልወኒ።

5ዕቡያት መፈንጠራን ገመድን ሐብኡለይ፡ ኣብ ጥቓ መገዲ መርበብ ዘርግሑ፡ መድፈና ኣጻወዱለይ።ሴላ።

6ንእግዚኣብሄር፡ ንስኻ ኣምላኸይ ኢኻ፡ በልክዎ፡ ዎ እግዚኣብሄር፡ ንድምጺ ምህለላይ ጽን በሎ።

7ዎ እግዚኣብሄር፡ ጐይታይ፡ ሓይሊ ምድሓነይ፡ ብመዓልቲ ውግእ ንርእሰይ ትጋርዳ።

8ዎ እግዚኣብሄር፡ ከይዕበዩስ፡ ንረሲእ ትምኒቱ ኣይትፈጽመሉ፡ ሃቐናኡ ኣይተስልጠሉ።ሴላ።

9እቶም ዚኸቡንስ እከይ ከናፍሮም ኣብ ርእሶም ይምጻእ።

10ጒሁር ፈሓም ይውደቆም፡ ናብ ሓዊ፡ ናብቲ ዘይወጽሉ ዓሚቚ ጒድጓድ ይደርበዩ።

11ወስላታ መልሓስ ዘለዎ ኣብ ሃገር ኣይኪቐውምን፡ ንገፋዒ፡ ክሳዕ ዚወድቕ፡ እከይ ኪሀድኖ እዩ።

12እግዚኣብሄርሲ ፍትሒ ንጭኑቓት፡ ቅንዕና ኸኣ ንድኻታት ከም ዚገብረሎም፡ እፈልጥ እየ።

13ብርግጽ፡ ጻድቃን ንስምካ ኼማስዉ፡ ቅኑዓት ኣብ ቅድሜኻ ኺነብሩ እዮም።

← Chapter 139 Chapter 141 →