Psalms 108

Amharic Tigrinya 2011

1ዎ ኣምላኽ፡ ልበይን ክብረይን ኣንቂደን ኣለዋ፡ ክዝምርን ከመስግንን እየ።

2በገናን መሰንቆን ንቕሑ፡ ንወጋሕታ ኸንቅሓ እየ።

3ጐይታየ፡ ኣብ ማእከል ኣህዛብ ከመስግነካ፡ ኣብ ማእከል ህዝብታት ክዝምረልካ እየ።

4ምሕረትካ ኣብ ልዕሊ ሰማያት ዓብዪ፡ ሓቅኻውን ክሳዕ ደበናታት እዩ እሞ፡

5ዎ ኣምላኽ፡ ኣብ ልዕሊ ሰማያት ልዕል በል፡ ክብርኻ ኣብ ልዕሊ ዂሉ ምድሪ ይኹን።

6ፍትዋትካ ምእንቲ ኺናገፉስ፡ ብየማነይትኻ ድሕነናን ስምዓናን።

7ኣምላኽ ኣብ መቕደስ ተዛረበ፡ እልል ክብል እየ፡ ንሰኬም ክመቅል፡ ንለሰ ሱኮት ክልክዕ እየ።

8ጊልኣድ ናተይ እዩ፡ ምናሴውን ናተይ እዩ፡ ኤፍሬም መጸግዕ ርእሰይ፡ ይሁዳውን ዘንጊ ግዝኣተይ እዩ።

9ሞኣብ ገበራ ምሕጻበይ እዩ። ኣብ ኤዶም ሳእነይ እድርቢ፡ ኣብ ፍልስጥኤም እልል ክብል እየ።

10ናብታ ዕርድቲ ኸተማ መን ይወስደኒ? ናብ ኤዶም መን ኰን ይመርሓኒ?

11ዎ ኣምላኽ፡ ንስኻዶ ኣይኰንካን ዝደርቤኻና? ንስኻ ኣምላኽ፡ ምስ ሰራዊትናኸ ኣይትወጽእን ዲኻ?

12ረዲኤት ሰብ ከንቱ እዩ እሞ፡ ካብቲ ተጻራሪ ርድኣና።

13ብኣምላኽ ንሕይል፡ ንሱውን ንተጻረርትና ኺረግጾም እዩ።

← Chapter 107 Chapter 109 →