Psalms 102

Amharic Tigrinya 2011

1ጐይታየ፡ ጸሎተይ ስማዕ፡ ኣውያተይውን ኣባኻ ይብጻሕ።

2ብመዓልቲ ጸበባይ ገጽካ ኣይትኸውለለይ፡ እዝንኻ ኣድንነለይ፡ በታ ዘእውየላ መዓልቲ ቐልጢፍካ ምለሰለይ።

3መዓልትታተይ ከም ትኪ ይበና ኣለዋ እሞ፡ ኣዕጽምተይ ከኣ ከም እይድ ይነድድ ኣሎ።

4ምብላዕ እንጌራይ ረሲዔዮ እየ እሞ፡ ልበይ ከም ሳዕሪ ጸምለወን ነቐጸን።

5ካብ ድምጺ ገዓረይ እተላዕለ ኣዕጽምተይ ኣብ ስጋይ ተጣበቐ።

6ኣባ ጉምባሕ በረኻ መሰልኩ፡ ከም ጉንጓ ዑናታት ኰንኩ።

7ተጋሀኩ፡ ከምቲ እቲ ናሕሲ በይኑ ዘሎ ዑፍ ከኣ እየ።

8ምሉእ መዓልቲ ጸላእተይ የላግጹለይ፡ ተጻረርተይ ብስመይ ይረግሙ ኣለዉ።

9ንሓመዂስቲ ኸም እንጌራ እበልዖ ኣሎኹ እሞ፡ ንመስተይ ምስ ንብዓት እሕውሶ ኣሎኹ።

10ብምኽንያት ኲራኻን ቊጥዓኻን ኣልዒልካ ደርቢኻኒ ኢኻ እሞ፡

11መዓልትታተይ ከም ዚነውሕ ጽላሎት እየን፡ ኣነውን ከም ሳዕሪ እነቅጽ ኣሎኹ።

12ዎ እግዚኣብሄር፡ ንስኻ ግና ንዘለኣለም ትነብር፡ መዘከርታኻውን ንውሉድ ወለዶ እዩ።

13ጊዜ ምሕረታ እዩ፡ እቲ ምዱብ ጊዜ በጺሑ፡ ባሮትካ ነእማና ኣፍቂሮም፡ ብሓመዳ ኸኣ ጒህዮም እዮም እሞ፡ ክትትንስእ ንጽዮንውን ክትርሕርሓላ ኢኻ።

15ኣህዛብ ከኣ ንስም እግዚኣብሄር፡ ኲሎም ነገስታት ምድሪ ድማ ንኽብርኻ ኺፈርሁ እዮም።

16እግዚኣብሄር ንጽዮን ኪሀንጻ፡ ብኽብሩ ኺግለጽ እዩ።

17ኣብ ጸሎት ሽጉራት ኬቕልብ፡ ንጸሎቶምውን ኣይኪንዕቕን እዩ እሞ፡

18እዚ ነቲ ዚመጽእ ወለዶ ኺጽሐፍ፡ እቲ ዚፍጠር ህዝቢውን ንእግዚኣብሄር ኬመስግኖ እዩ።

19ኲሎም ኣህዛብን መንግስትታትን ኣብ ጽዮን ንስም እግዚኣብሄር ኣብ የሩስሌም ድማ ንምስጋናኡ ኺነግሩ ኢሎም፡ ንእግዚኣብሄር ኬገልግልዎ ምስ ተኣከቡ፡ እግዚኣብሄር ንብኽያት እሱራት ኪሰምዕ፡ ነቶም ንሞት እተመደቡ ምእንቲ ኺፈትሖም ካብ ልዕልና መቕደሱ ረኣየ፡ ካብ ሰማይ ናብ ምድሪ ኣንቈልቊሉ ጠመተ።

23ንሓይለይ ኣብ መገዲ ኣድከሞ፡ ንመዓልትታተይ ኣሕጸረን።

24ኣምላኸየ፡ ኣብ ፍርቂ መዓልትታተይ ኣይትውሰደኒ፡ በልኩ። ዓመታትካ ንውሉድ ወለዶ እዩ

25ካብ ጥንቲ ንምድሪ ሰረትካያ፡ ሰማያት ከኣ ግብሪ ኣእዳውካ እዮም።

26ንሳቶም ኪጠፍኡ እዮም፡ ንስኻ ግና ትነብር፡ ኲላቶም ከም ክዳን ኪበልዩ እዮም፡ ከም ልብሲ ኽትልውጦም ኢኻ፡ ኪልወጡውን እዮም።

27ንስኻ ግና ከም ቀደምካ ኢኻ፡ ዓመታትካውን ከቶ ኣይውዳእን።

28ውሉድ ባሮትካ ኺነብሩ፡ ዘርኦም ከኣ ኣብ ቅድሜኻ ኺጸንዕ እዩ።

← Chapter 101 Chapter 103 →