Psalms 88

Amharic Tigrinya (መፅሓፍ ቅዱስ) No Year

1ኦ ጐይታ፥ ኣምላኽ ምድሓነይ፥ ኣብ ቅድሜኻ ለይትን መዓልትን አእዊ ኣለኹ፤

2ፀሎተይ ኣብ ቅድሜኻ ትእቶ፤ እዝንኻውን ናብ ልመናይ ፅን ኣብል።

3ነፍሰይ መከራ ፀጊባ ኣላ እሞ፤ ህይወተይውን ናብ መቓብር ቀሪባ ኣላሞ።

4ምስቶም ናብ ጕድጓድ ዝወርዱ ተቘፀርኩ፤ ረዳኢ ኸም ዘይብሉ ሰብውን ኮንኩ።

5ከምቶም ንዘለኣለም ዘይትዝክሮም፥ ከምቶም ኣብ ጕድጓድ ዝተቐብሩ ቕቱላት፥ ኣብ ማእኸል ምዉታት ተደርበኹ፤ ንሳቶምውን ካብ ኢድካ ርሒቆም እዮም።

6ኣብ ፀልማትን፥ ኣብ ፅላሎት ሞትን፥ ኣብ ታሕተዋይ ጕድጓድ ኣንበርካኒ።

7ቍጥዓኻ ኣብ ልዕለይ ፀንዐ፤ ኵሉ መቕሰፍትኻውን ኣብ ልዕለይ ኣምፃእኻ።

8ነቶም ዝፈልጡኒ ኻባይ ኣርሓቕካዮም፤ ብኣኣቶምውን ርኹስ ገበርካኒ፤ ሓዙኒ፤ መውፅኢውን የብለይን።

9ኣዒንተይ ብመከራ ፈዘዛ፤ ኦ ጐይታ፥ ኵሉ መዓልቲ ናባኻ አእዊ ኣለኹ፤ ኵሉ መዓልቲ እውን ኣእዳወይ ናባኻ እዝርግሕ ኣለኹ።

10ብሓቂዶ ንምዉታት ተኣምራት ትገብር ኢኻ? ዝሞቱኸ ተሲኦምዶ የመስግኑኻ እዮም?

11ኣብ ውሽጢ መቓብር ምሕረትካ፥ ኣብ ቦታ ጥፍኣትከ ሓቅነትካዶ ይንገር እዩ?

12ተኣምራትካ ኣብ ፀልማት ይፍለጥ ድዩ? ፅድቅኻኸ ኣብ ምድሪ ተረሲዑ ድዩ?

13ጐይታይ ኣነ ግና፥ ናባኻ አእዊ ኣለኹ፤ ፀሎተይ ኣንጊሃ ናባኻ ትብፃሕ።

14ጐይታ፥ ስለ ምንታይ ንነፍሰይ ትድርብያ? ስለ ምንታይከ ገፅካ ኻባይ ትኽውል?

15ካብ ንእስነተይ ጀሚረ፥ ፅጉምን ንሞት ዝቐረብኩን እየ፤ ልዕል ልዕል ምስ በልኩ ግና ተዋረድኩ፤ ተንዓቕኩውን።

16መቕሰፍትኻ ኣብ ልዕለይ ሓለፈ፤ ግርማኻውን ኣደንገፀኒ፤

17ኵሉ መዓልቲ ኸም ማይ ከበቡኒ፤ ሓቢሮምውን ሓዙኒ።

18ንፈተውተይን ንብፆተይን፥ ካባይ ኣርሓቕካዮም፤ ነዝማደይውን ካብ መከራ ዝተልዓለ ኻባይ ኣርሓቕካ።

← Chapter 87 Chapter 89 →