Psalms 49

Amharic Tigrinya (መፅሓፍ ቅዱስ) No Year

1ኵልኻትኩም ኣህዛብ፥ ነዙይ ስምዑ፤ ኣቱም ኣብ ዓለም እትነብሩውን፥ ኵልኻትኩም ፅን በሉ፤

2ትሕት ዝበልኩምን ልዕል ዝበልኩምን፥ ሃብታማትን ድኻታትን፥ ሓቢርኩም ፅን በሉ።

3ኣፈይ ጥበብ ይዛረብ፤ ሓሳባት ልበይ ከዓ ምስትውዓል ይህብ።

4እዝነይ ናብ ምስላ ኣዘንብል፤ ንምስጢረይ ከዓ ብበገና እገልፅ።

5ሓጢኣት ሸዀናይ ምስ ከበበኒ፥ ብኽፉእ መዓልቲ ንምንታይ ዝፈርሕ?

6እቶም ብሓይሎም ዝእመኑ፥ ብብዝሒ ሃብቶም ከዓ ዝምክሑ፥

7ሓው ንሓዉ ኣየድሕንን፤ ሰብውን ኣየድሕንን። ቤዛኡውን ንእግዚኣብሄር ኣይህብን፤

8ንዘለኣለም ክነብር፥ ንጥፍኣትውን ከይርኢ፥ ቤዛ ነፍሳቶም ክቡር እዩሞ፥ ንዘለኣለምውን ተሪፉ እዩሞ።

10ለባማት ከም ዝሞቱ፥ ከምኡውን ሰነፋትን ደናቝርን ብሓባር ከም ዝጠፍኡ፥ ገንዘባቶምውን ንኻልኦት ከም ዝሓድጉ ሪኡ እዩ።

11ብልቦም፥ ገዛኣቶም ንዘለኣለም ዝነብር፥ መሕደሪኦምውን ንውሉድ ወለዶ ዝኸውን ይመስሎም፤ በብሃገሮም ስማቶም ይፅዋዕ።

12ሰብ ግና ኽቡር እንተሎ ኣይፈልጥን፤ ከም ዝጠፍኡ እንስሳታት መሰለ።

13እዛ መንገዳቶም መዐንቀፊቶም እያ፤ እቶም ብድሕሪኦም ዝመፁውን ብኣፎም ይድግፍዎ።

14ከም ኣባጊዕ ናብ ሲኦል ዝኸዱ እዮም፤ ጓሳኦምውን ሞት እዩ። እቶም ቅኑዓት ንጉሆ ክገዝእዎም እዮም፤ ፅባቐኦምውን ካብ መንበሪኦም ተፈልያ፥ ኣብ ሲኦል ትበሊ።

15ንኣይ ግና እግዚኣብሄር ክቕበለኒ እዩሞ፤ ንነፍሰይ ካብ ኢድ ሲኦል ክቢዘዋ እዩ።

16ሰብ እንተ ሃብተመ፥ ክብሪ ቤቱውን እንተ በዝሐ ኣይትፍርሓዮ።

17ምስ ሞተ፥ ምስኡ ዝወስዶ ነገር የለንሞ፤ ክብሩውን ምስኡ ናብ መቓብር ኣይወርድን እዩሞ።

18ሰብ ብህይወቱ እንተሎ ንነፍሱ ባሪኹ እዩሞ፥ ንሰብነቱ ፅቡቕ እንተ ገበርካሉ የመስግነካ።

19ግና ናብ ትውልዲ ኣቦታቱ ይወርድ፤ ንዘለኣለም ብርሃን ኣይርእን።

20ኣእምሮ ዘይብሉ ኽቡር ሰብ፥ ነተን ዝጠፍኣ እንስሳት መሰለ።

← Chapter 48 Chapter 50 →