Psalms 137

Amharic Tigrinya (መፅሓፍ ቅዱስ) No Year

1ኣብ ጥቓ ሩባታት ባቢሎን ተቐመጥና፤ ንፅዮን ምስ ዘከርናያ ኸዓ በኸና።

2መሰንቆታትና ኣብቲ ኣብኡ ዘሎ ኣእዋም ኲሓታት ሰቐልና፤

3እቶም ዝማረኹና ኣብኡ ብዛዕባ መዝሙር ጠየቑና፤ እቶም ዝወሰዱና ኸዓ፥ “ካብ መዝሙር ፅዮን ዘምሩልና” በሉና።

4ናይ እግዚኣብሄር መዝሙር፥ ኣብ ምድሪ ጓና ኸመይ ኢልና ኽንዝምር!

5ኦ ኢየሩሳሌም፥ እንተ ረሲዐክስ፥ የማነይ ትረስዐኒ፤

6እንተ ዘይዘኪረኪ፥ ሕልፊ ዅሉ ሓጐሰይ፥ ንኢየሩሳሌም እንተዘይፈትየ፥ መልሓሰይ ኣብ ትንሓገይ ትጣበቕ።

7ኦ ጐይታ፥ ብመዓልቲ ኢየሩሳሌም፥ ነቶም “ኣፍርስዋ፤ ካብ መሰረታ ኣፍርስዋ” ዝብሉ ደቂ ኤዶም ዘክሮም።

8ኣቲ ሕስርቲ ጓል ባቢሎን፥ ሕነ እቲ ዝተበቀልክና ዝብቀለኪ፥ ብሩኽ እዩ።

9ንህፃናትኪውን ሒዙ ኣብ ኰዅሒ ፃሕ ዘብሎም ብሩክ እዩ።

← Chapter 136 Chapter 138 →