Psalms 118

Amharic Tigrinya (መፅሓፍ ቅዱስ) No Year

1ንእግዚኣብሄር ኣመስግኑ፥ ሕያዋይ እዩሞ፤ ምሕረቱ ንዘለኣለም እዩ እሞ።

2ሕያዋይ ከም ዝኾነ፥ ምሕረቱውን ንዘለኣለም ከም ዝኾነ፥ ህዝቢ እስራኤል ሕዚ ይንገሩ።

3ሕያዋይ ከም ዝኾነ፥ ምሕረቱ ንዘለኣለም ከም ዝኾነ፥ ቤት ኣሮን ሕዚ ይንገሩ።

4ሕያዋይ ከም ዝኾነ፥ ምሕረቱ ንዘለኣለም ከም ዝኾነ፥ ኵሎም እቶም ንእግዚኣብሄር ዝፈርሑ ሕዚ ይንገሩ።

5ኣብ ጊዜ መከራይ ንእግዚኣብሄር ፀዋዕኽዎ፤ ሰምዐኒ፤ ኣስፍሐለይውን።

6እግዚኣብሄር ረዳእየይ እዩ፤ ኣይፈርሕን፤ ሰብ እንታይ ክገብረኒ ይኽእል?

7እግዚኣብሄር ረዳእየይ እዩ፤ ኣነውን ኣብ ልዕሊ ፀላእተይ ክርኢ እየ።

8ብሰብ ካብ ምትእምማን፥ ብእግዚኣብሄር ምትእምማን ይበልፅ።

9ብገዛእቲ ተስፋ ኻብ ምግባር፥ ብእግዚኣብሄር ተስፋ ምግባር ይበልፅ።

10ኵሎም ኣህዛብ ከበቡኒ፤ ግና ብስም እግዚኣብሄር ኣሰነፍኩዎም።

11ምኽባብስ ከበቡኒ፤ ግና ብስም እግዚኣብሄር ኣሰነፍኩዎም።

12ንህቢ ንመዓር ከም ዝኸብብ ከበቡኒ፤ ሓዊ ኣብ ውሽጢ እሾኽ ከም ዝነድድ ነደዱ፤ ብስም እግዚኣብሄር ድማ ኣሰነፍኩዎም።

13ደፋእኻኒ፥ ንኽወድቕውን ገድገድ በልኩ፤ እግዚኣብሄር ግና ሓገዘኒ።

14ሓይለይን መዝሙረይን እግዚኣብሄር እዩ፤ ንሱውን መድሓኒየይ ኮነ።

15ድምፂ ዕልልታን መድሓኒትን፥ ኣብ ድንኳን ፃድቃን እዩ፤ “የማነይቲ ኢድ እግዚኣብሄር፥ ብርቱዕ ሓይሊ ገበረት።

16የማነይቲ ኢድ እግዚኣብሄር፥ ልዕል ልዕል ኣበለትኒ፤ የማነይቲ ኢድ እግዚኣብሄር፥ ሓይሊ ገበረት።”

17ብህይወት ክነብር እየ እምበር፥ ኣይመውትን፤ ንስራሕ እግዚኣብሄር ከዓ ኽነግር እየ።

18ምግሳፅስ እግዚኣብሄር ገሰፀኒ፤ ንሞት ግና ኣሕሊፉ ኣይሃበንን።

19ብኣኣተን ኣትየ ንእግዚኣብሄር ከመስግኖስ፥ በርታት ፅድቂ ኽፈቱለይ።

20እዚኣ ናይ እግዚኣብሄር ኣፍ ደገ እያ፤ ፃድቃንውን ናብኣ ይኣትዉ።

21ስለ ዝሰማዕኻንን፥ መድሓኒየይውን ስለ ዝኾንካንን፥ አመስግነካ ኣለኹ።

22እቲ ነደቕቲ ዝነዓቕዎ እምኒ፥ ንሱ ርእሲ መኣዝን ኮነ።

23እዙይ ኻብ እግዚኣብሄር ኮነ፤ ነዒንትናውን ዘደንቕ እዩ።

24እግዚኣብሄር ዝሰርሓ መዓልቲ እዚኣ እያ፤ ብኣኣ ንተሓጐስ፤ ደስውን ይበለና።

25ኦ ጐይታ፥ በይዛኻ ሕዚ ኣድሕን፤ ኦ ጐይታ፥ በይዛኻ ኣቕንዐልና።

26እቲ ብስም እግዚኣብሄር ዝመፅእ ቡሩኽ እዩ፤ ካብ ቤት እግዚኣብሄር ባረኽናኩም።

27እግዚኣብሄር ኣምላኽ እዩ፤ ንሱውን ኣብርሀልና፤ ክሳዕ ኣቕርንቲ እቲ መሰውኢ፥ ነቲ መስዋእቲ በዓል ብገመድ ኣሰርዎ።

28ንስኻ ኣምላኸይ ኢኻ፤ አመስግነካ ኣለኹ፤ ንስኻ ኣምላኸይ ኢኻ፤ ልዕል ልዕል ከብለካ እየ፤ ሰሚዕኻኒ ኢኻሞ፥ መድሓኒትውን ኴንካኒ ኢኻሞ አመስግነካ ኣለኹ።

29ሰናይ እዩሞ፥ ምሕረቱውን ንዘለኣለም እዩሞ፥ ንእግዚኣብሄር ኣመስግንዎ።

← Chapter 117 Chapter 119 →