Proverbs 8

Amharic Tigrinya (መፅሓፍ ቅዱስ) No Year

1ብሓቂ ጥበብ ዓው ኢላዶ ኣይትፅውዕን? ፍልጠትከ ድምፃዶ ኣይተስምዕን?

2ኣብ ጫፍ ኰረብታታት ቆይማ፥ ኣብ ቀራናታት መንገዲ ደው ኢላ፥

3ኣብ ጥቓ ደገታት፥ ኣብ መእተዊ ኸተማ፥ ኣብ ኣፍ በርታት ኮይና ድምፂ ተስምዕ ኣላ፦

4ኣቱም ሰባት፥ ንኣኻትኩም እየ ዝፅውዐኩም ዘለኹ፤ ንደቂ ሰብ እየ ዘድህዮም ዘለኹ።

5ኣቱም ዓያሹ ፍልጠት ተምሃሩ፤ ኣቱም ሰነፋትውን ኣስተውዕሉ።

6ክቡር ነገር ክዛረብ እየ እሞ ስምዑ፤ ከናፍረይውን ቅኑዕ ነገር ንምንጋር ክኸፍት እየ።

7ኣፈይ ሓቂ ኽዛረብ እዩ፤ ከናፍረይውን ንኽፍኣት ይፅየፋ።

8ኵለን ቃላት ኣፈይ ሓቂ እየን፤ ቀይናናት ወይ ጥውይዋያት ኣይኮናን።

9ንሳተን ንመስተውዓልቲ፥ ቅኑዓት እየን፤ ፍልጠት ምስ ዝረኸቡ ሰባትውን ዝሰማምዓ እየን።

10ንተግሳፀይ ካብ ብሩር፥ ንፍልጠተይውን ካብ ፅሩይ ወርቂ ምረፅዎ።

11ጥበብ፥ ካብ ክቡር ዕንቍ ትበልፅ እያሞ፥ ክቡር ዝኾነ ዅሉውን ኣይመዓራረያን እዩ።

12ኣነ ጥበብ፥ ብብልሓት ተቐሚጠ ኣለኹ፤ ፍልጠትን ምስትውዓልንውን ረኺበ ኣለኹ።

13ንእግዚኣብሄር ምፍራሕ ንኽፍኣት ምፅላእ እዩ፤ ኣነውን ትዕቢትን ትምክሕትን፥ ክፉእ ኣካይዳን ዘረባ ሓሰትን እፀልእ እየ።

14ምኽርን ቅኑዕ ፍርድን ናተይ እዮም፤ ምስትውዓል ኣነ እየ፤ ሓይልውን ኣለኒ።

15ነገስታት ብኣይ ይነግሱ፤ መሳፍንቲ ብኣይ ቅኑዕ ሕጊ ይሕግጉ።

16ኣሕሉቕን ክቡራንን፥ ፈረድቲ ምድሪ እውን ብኣይ ይገዝኡ።

17ኣነ ነቶም ዘፍቅሩኒ ኣፍቅሮም፤ እቶም ተጊሆም ዝደልዩኒ ኸዓ ይረኽቡኒ።

18ሃብትን ክብረትን፥ ነባሪ ጥሪትን በረኸትን ኣባይ ኣሎ።

19ፍረይ ካብ ፅሩይ ወርቂ፥ ረብሓይ ካብ ሕሩይ ብሩር ይበልፅ።

20ኣነ ብመንገዲ ፅድቂ እኸይድ፤ ብማእኸል ጐዳና ፍትሒውን እመላለስ።

21ንዝፈትዉኒ ርስቲ ኣውርሶም፤ ቤት መዝገቦምውን እመልእ።

22እግዚኣብሄር መጀመርታ መንገዱ ገበረኒ።

23ካብ ዘለኣለም ካብ መጀመርታ፥ ምድሪ እንተይተፈጥረት ነበርኩ።

24ገና ባሕርታት እንተይነበረ፥ ዓይኒ ማያት እንተይወሓዘ፥ ኣነ ነበርኩ።

25እምባታት እንተይተሰረቱ፥ ቅድሚ ዀረብታታት ኣነ ነበርኩ።

26ንምድርን ንመይዳን፥ ነቲ መጀመርታ መሬትን እንተይፈጠሮ ነበርኩ።

27ንሰማያት ከቑሞ እንተሎ፥ ንጠፈር ኣብ ልዕሊ ባሕርታት ክዝርግሖ እንተሎ፥

28ንደመና ናብ ላዕሊ ኸቝሞ እንተሎ፥ ንዓይኒ ባሕሪ ክኸፍቶ እንተሎ፥

29ማያት ካብ ትእዛዙ ኸይሓልፍ፥ ንባሕሪ ኽውስኖ እንተሎ፥ ንመሰረታት ምድሪ ኸቕውም እንተሎ፥ ኣብኡ ነበርኩ።

30ሽዑ ኽኢላ ኾይነ ምስኡ ነበርኩ፤ በብመዓልቱ ብኣይ ይሕጐስ፤ ኵልሻዕ ኸዓ ኣብ ቅድሚኡ እሕጐስ ነበርኩ።

31በቲ ኣብ ምድሪ ዝፈጠሮ እሕጐስ ነበርኩ፤ ደስታይ ከዓ ብደቂ ሰብ ነበረ።

32ሕዚ ድማ ደቀይ! መንገደይ ዝሕልዉ ብፁኣን እዮም እሞ ስምዑኒ።

33ትምህርተይ ስምዑ፤ ለባማት ኩኑ፤ ሸለልውን ኣይትበልዎ።

34እቲ ኣብ ልዳት ደገታተይ በብመዓልቱ፥ ኣብ በርታተይ እናተፀበየ፥ ንኣይ ዝሰምዕ ሰብ ብፁእ እዩ፤

35እቲ ዝረኽበኒ፥ ህይወት ይረክብ፤ ካብ እግዚኣብሄር ድማ ሞገስ ይረክብ።

36ኣብ ልዕለይ ዝብድል ንባዕሉ ይጐድእ፤ ኵሎም እቶም ዝፀልኡኒ ኸዓ ሞት ይፈትዉ።

← Chapter 7 Chapter 9 →