Proverbs 18

Amharic Tigrinya (መፅሓፍ ቅዱስ) No Year

1ምፍላይ ዝፈቱ ትምኒቱ ይኽተል፤ ንዅሉ ሰናይ ጥበብውን ይቃወም።

2ሰነፍ ነቲ ኣብ ልቡ ዘሎ ደኣ ኽገልፅ ይፈቱ እምበር፥ ክፈልጥ ኢሉ ኣይፅዕርን እዩ።

3ክፍኣት እንትመፅእ ንዕቐት ትመፅእ፤ ምስ ነውሪ እውን ፀርፊ ይመፅእ።

4ቃላት ኣፍ ሰብ፥ ዓሚቝ ማያት እዩ፤ ፍልፍል ጥበብ ድማ ወሓዚ ሩባ እዩ።

5ፍርዲ ፃድቕ ምእንቲ ኽቕይንን፥ ንሓጥእ ሰብ ምድጋፍ ግቡእ ኣይኮነን።

6ከናፍር ዓሻ ናብ ባእሲ ይኣትዋ፤ ኣፉ ኸዓ ንበትሪ ትፅውዕ።

7ኣፍ ዓሻ ንእኡ መጥፊኢኡ እዩ፤ ከናፍሩ ኸዓ ንነፍሱ መፃወድያ እየን።

8ቃላት ጠባዊ እዝኒ ኸም ጥዑም ኵላሶ እዩ፤ ንሱ ኽሳዕ ውሽጢ መዓንጣ ድማ ይኣቱ።

9ብስራሕ ሃካይ ዝኾነ፥ ሓው በታኒ ገንዘብ እዩ።

10ስም እግዚኣብሄር ፅኑዕ ቅፅሪ እዩ፤ ፃድቕ ናብኡ ጐይዩ ይዕቈብ።

11ንሃብታም ሰብ፥ እቲ ሃብቱ ፅኑዕ ኸተማኡ እዩ፤ ብሓሳቡ ኸዓ ኸም ልዕል ዝበለ ቕፅሪ እዩ።

12ልቢ ሰብ፥ ቅድሚ ውድቀት ልዕል ልዕል ይብል፤ ትሕትና ድማ ንኽብረት ትቕድማ።

13እንተይሰምዐ ምላሽ ዝህብ ሰብ፥ ዕሽነትን ሕፍረትን ይኾኖ።

14ነፍሲ ሰብ እንተ ሓመመ፥ መንፈሱ ይድግፎ፤ ንዝተሰብረ መንፈስ ግና መን ከበርትዖ ይኽእል?

15ልቢ መስተውዓሊ፥ ፍልጠት የጥሪ፤ እዝኒ ጠቢባን ከዓ ፍልጠት ትደሊ።

16ንሰብ ውህብቶኡ ኣፍ ደገ ይኸፍተሉ፤ ናብ ዓበይቲ ሰባት ከዓ የእትዎ።

17እቲ በዓል ነገሩ፥ መፂኡ ኣፀቢቑ ክሳዕ ዝምርመር፥ እቲ ኣቐዲሙ ዘስምዕ ሰብ፥ ሓቀኛ ይመስል።

18ዕፃ ንባእሲ ይከላኸል፤ ኣብ ማእኸል ሓያላትውን ይብይን።

19ዝተበደለ ሓው፥ ከም ዝተዓረደ ኸተማ ፅኑዕ እዩ፤ ባእሱ ድማ ኸም መሀርሀሪ ዕርዲ እዩ።

20ከብዲ ሰብ፥ ካብ ፍረ ኣፉ ይመልእ፤ ብእቶት ከናፍሩ ድማ ይፀግብ።

21ሞትን ህይወትን፥ ኣብ ትሕቲ ስልጣን መልሓስ እዮም፤ እቶም ዝፈትዉዋ ኸዓ ፍረኣ ኽበልዑ እዮም።

22ሰበይቲ ዝረኸበ፥ በረኸት ረኸበ፤ ካብ እግዚኣብሄርውን ሞገስ ይቕበል።

23ድኻ ብቕብጥሮት ይዛረብ፤ ሃብታም ግና ብትረት ይምልስ።

24ፈተውቲ ዘብዝሕ ሰብ ይጠፍእ፤ ግና ኻብ ሓው በሊፁ ዝቐርብ ፈታዊውን ኣሎ።

← Chapter 17 Chapter 19 →