Psalms 90

Amharic Gofa GFBLVF (Geeshsha Maxaafa)

1Godaw, neeni yeletape yeletaa gakanaw, nuuni de7iya bessi gidadasa.

2Dereti medhetanaape kase, sa7i oosetanaape kase, merinaape merinaa gakanaw ne Xoosse.

3Neeni, “Asa nayto, guye biittako simmite” yaagada, enta medhetida biittako guye zaarasa.

4Mukulu laythi zine aadhida gallasa mela; woyko issi qamma giddon issi saate mela.

5Neeni asaa qoponna di7oda efaasa; enti amuho mela; wonta wonta doliya maata mela.

6Maati wonta diccidi ciyees; omarsiya wode shullidi melees.

7Nuuni ne yiluwan wurida; ne hanquwa suulon dagammida.

8Nu iita oosuwa ne sinthan wothadasa; nu geemmida nagaraa ne som7uwa poo7uwan wothadasa.

9Nu gallasa ubbay ne hanquwan aadhis; nu laytha oolen wursoos.

10Nu de7o laythay laapun tamma; woyko dariko hospun tamma. Hessika metoynne waayey kumidaysa; nu laythay eeson wurees; nuka eeson aadhoos.

11Ne hanquwa wolqaa erey oonee? ne hanquwa suuloy wolqaama.

12Nu laytha maara ogen nu go7etana mela, nuna cincatethi tamaarsa.

13Godaw, ne hanqoy awude gakanaasee? hayyana ne aylletas qadheta.

14Nu laytha ubban nu ufaytanaadanne yexanaada, wonta wonta ne siiquwa nuna kalsa.

15Ne nuna metoothida gallasata keena, nuuni un7etida laythata keena nuna ufaysa.

16Nuus ne aylletas ne oosoy qonco; ne bonchoy enta naytas bento.

17Godaa nu Xoossaa keehatethay nu bolla gido; nu kushe ooso ubba nuus ayfisa; Ee, nu kushe ooso ubbaa ayfisa.

← Chapter 89 Chapter 91 →