Psalms 66

Amharic Gofa GFBLVF (Geeshsha Maxaafa)

1Biitta ubbay hinte qaala dhoqu oothidi, ufaysan Xoossaa galatite.

2Xoossaa sunthaas bonchon yexite; boncho galataa iyaw immite.

3Xoossaas haysada yaagite; “Ne oosoti waanidi malaalsii? Ne wolqay darida gisho, ne morketi yashshan ne sinthan kokoroosona.

4Biitta ubbay nena goyinnees; nena sabbees; ne sunthaas galatan yexoosona” yaagite.

5Haayite; Xoossay oothidaba be7ite; asaa giddon malaalsiya ooso oothis.

6I abba haatha shaakidi, kase nu aawati Yordaanose shaafa banta tohon yedhidi mela biittara pinnidosona. Hessan I oothidaban nuuni ufaytida.

7I ba wolqan merinaw haarees. Kawotethata ba ayfen xeellees; hessa gisho, makalleysati iya bolla dendofo.

8Asaw, nu Xoossaa galatite; hinte iya galatiya galatay si7etto.

9I nuna paxa wothis; nu kundonna mela naagis.

10Abeeti Xoossaw ne nuna paacadasa; biri taman paacetidi geeyeysada ne nuna geeshshadasa.

11Ne nuna xihen gelsadasa; nu zokon deexo toho wothadasa.

12Morketi nu huuphera toggidi aadhanada oothadasa; Nu haatha giddoranne tama giddora aadhida; shin ha77i nuna inje bessi ehadasa.

13Ta xuussa yarsho ekada ne keethaa gelana, ta qangetha gathana.

14Ta metootida wode ta doonay gida qaala, ta inxarsaafe keyida qangetha gathana.

15Ta new modhuwa, xuussa yarsho oothada shiishana. Marazeta sawo tonku giya yarsho oothada shiishana; Kormanne koleta new yarshana.

16Hinteno, Xoossas yayyeysato, ubbay haa yidi, si7ite; Xoossay taw oothidaba ta hintew odana.

17Ta qaala dhoqu oothada woossas; ta inxarsan iya galatas.

18Taani wozani erishin nagara genthidaba gidiyako, Goday tana si7enna.

19Shin Xoossay tuma tana si7is; ta oysha zaaris.

20Xoossay ta woosa ixiboonna gisho, ba merinaa siiquwa tana diggiboonna gisho galatetto.

← Chapter 65 Chapter 67 →