Psalms 143

Amharic Gofa GFBLVF (Geeshsha Maxaafa)

1Godaw, ta woosa si7a; maarota demmanaw ta waasseysa hayza. Neeni xillotethaninne ne ammanetethan taw zaaro imma.

2Ne sinthan xillo asi bayna gisho tana ne aylliya pirdas shiishopa.

3Tana ta morkey yedethidi, tincherethidi sa7an yeggis. Beni hayqida asada tana dhuman wothis.

4Hessa gisho taani heettas; ta wozanayka til7is.

5Taani beni wodeta hassayayis; ne oothida ooso ubbaa qopayis; ne kushe ooso ubbaa akeekayis.

6Taani ta kushiya neeko miccas; mela biitti haathe koyeysada, ta shempoy nena saamotees.

7Godaw, ta wozanay heettida gisho taw zaaro immanaw ellesa. Taani duufon geliya asada hanonna mela ne som7uwa taape genthofa.

8Taani nenan ammanetiya gisho, wonta wonta ne siiquwaba tana bessa. Taani ta shempuwafe nena woossiya gisho, ta baana ogiya tana bessa.

9Godaw, taani new maggannida gisho, ta morketape tana ashsha.

10Neeni ta Xoossaa gidiya gisho, ta ne sheniya oothana mela tana tamaarsa; ne lo77o ayyaanay suure ogiyan tana kaaletho.

11Godaw, ne sunthaa gisho tana ashsha; ne xillotethan tana metope kessa.

12Ne siiquwan ta morketa wodha; ta ne aylle gidiya gisho tana un7etheyisata ubbaa dhaysa.

← Chapter 142 Chapter 144 →