Psalms 10

Amharic Gofa GFBLVF (Geeshsha Maxaafa)

1Abeeti Godaw, ayis haakada eqay? Meto wode ayis neeni geemmay?

2Ba otoruwan iita asi manquwa yedethees; enti banta maquwan bantaw oyketidosona.

3Iita asi ba iita amuwan ceeqetees; ba uuziyan Godaa cayeesinne kadhees.

4Iitati banta otoruwan Xoossaa koyokona; banta qofan Xoossas besse immokona.

5Iyaw ubba wode injetees; ne higgey iyaw gelenna; ba morketa I qelqisees.

6Ba wozanan, “Tana aybika qaathenna tana metoy gakenna” yaagidi qopees.

7Iya doonan baadethi, wordoynne mandethi kumis. Geneynne iitatethi iyan inxarsan de7ees.

8Gutatan zugidi uttees; suure asata wodhanaw qosetidi naagees; wolqi bayna daaburanchota wochees.

9Ba qosetida bessan geemmidi, manquwa oykanaw gaammoda zugees; iya oykidi ba xihiyan goochidi efees.

10Wolqi bayna manquwa shocidi yeggees; iya tohuwa garsan I kundees.

11I ba wozanan, “Xoossay dogis. Ba som7uwa genthidi be7enna” yaagees.

12Abeeti Godaw, denda! Xoossaw, ne wolqaama kushiya dentha; manqota dogopa.

13Iita asati Xoosse ayis kadhoona? Banta wozanan, “Xoossay nuna seerenna” ayis yaagona?

14Shin Xoossaw, ne metuwanne un7aa be7aasa; neeni maaddanaw giiga uttadasa. Neeni yi7otas maade, qohetiday ne maaddana mela bana new aathidi immees.

15Gene asata wolqaa mentha; iita asata seera; zaaridi enta giddon iitatethi bentofo.

16Goday merinaw kawotidi de7ees; hara kawotethati iya biittafe dhayana.

17Abeeti Godaw, neeni ashketa amuwa kunthaasa; enta minthetha; enta woosa si7a.

18Yi7otanne un7etidaysata qohonna mela, sa7an de7iya oonika enta yashisonna mela, neeni entaw pirda.

← Chapter 9 Chapter 11 →