bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Amharic
/
Amharic Gofa GFBLVF (Geeshsha Maxaafa)
/
Proverbs 30
Proverbs 30
Amharic Gofa GFBLVF (Geeshsha Maxaafa)
1
Yaaqe na7aa Agura leemisoti haysafe kaallidi xaafetidaysata. Aguri Iti7eelasinne Ukaalas haysa haasayis.
2
Taani asa ubbaafe aadhida eeya; asas de7iya akeeki taw deenna.
3
Taani cincatethi tamaarabike; Geeshsha Xoossabaaka erike.
4
Salo pude keyidi duge wodhiday oonee? Carko ba kushen oykiday, haathe ba afilan yiiciday, sa7aa gaxaa minthidi essiday oonee? Iya sunthay oonee? Iya na7aa sunthay oonee? Iya eriya gidiko ane taw oda?
5
Xoossa qaalan borey baawa; ubbay tuma iyan ammanetiya ubbaas I gondalle.
6
Iya qaala bolla aybaka gujofa; gujiko I nena seerana; ne wordancho gideysa I qoncisana.
7
Godaw, ta nena nam7ubba oychayis; ta hayqana gakanaw enta tana diggofa.
8
Ta ase cimmonna melanne wordo haasayonna mela tana naaga; taw koshshiya kathi immafe attishin, tana dure woyko manqo oothofa.
9
Dure gidada, “Goday oonee?” gada nena kaddana; manqo gidada, kaysada ta Xoossaa sunthaa cayisana.
10
Nena baaddonna melanne iya baadethay new gome gidonna mela, aylliya iya godaara zigropa.
11
Ba aawa baaddiyanne ba aayiw anjona yeletethi de7ees.
12
Daro tuna gidi uttidi bantana geeshshi oothiya asati de7oosona.
13
Otoron kumida asatinne ase kadhidi xeelliya asati de7oosona.
14
Enta achay mashshe gidin, enta gaccoy toora gidin, manqotanne metootanchota naaqidi, entaba bonqiya asati de7oosona.
15
Ullathas nam7u macca nayti de7oosona; enti, “Hamma! Hamma!” yaagidi waassoosona. Kallidi eronna heedzubati de7oosona; oyddanthoy qassi “Gidana” gidi erenna.
16
Hessati, duufo, maynnida maccas, haathe kallidi eronna mela biittanne, “Gidana!” gidi eronna tama.
17
Ba aawa leqiya na7aa ayfiya, ba aayiya cimin kadhiya na7aa ayfiya, zangaaran de7iya quuroti woocana; iya ashuwa ankoti maana.
18
Tana heedzubati malaalsoosona; oyddanthoy ubba taw gelenna.
19
Hessati, salora paalliya arganthi, zaalla bollara kolxiya shooshi abba bollara biya markabenne geela7ora shiiqo oyketida adde.
20
Layma maccasi haniya hanoyka hessa mela; Iya masu; shin ba doona quchada, “Taani aykoka balabiike” yaagawusu.
21
Heedzuban biitti qaaxees; oyddanthuwa ubba tookanaw danda7etenna.
22
Hessatika, aylley kawotida wode, eeya asi kathi kallida wode,
23
asi ixida maccasi azina gelida wodenne macca aylliya ba godatiw laattida wode medhetiya hanota.
24
Sa7a bolla oyddu guutha medhetethati de7oosona; shin enti aadhida cinca.
25
Hessatika, Cuncalley wolqi bayna medhetethi; shin bantaw miyaba bone shiishidi, minjoosona.
26
Gupaleti wolqi baynayisata; shin banta keetha zaalla qophon keexoosona.
27
Booletas kawoy baawa; shin enti ubbay maaran zattoosona.
28
Zareti kushen oyketoosona; shin kawo gadhon de7oosona.
29
Banta maata bessishe hemetiya heedzu medhetethati de7oosona; oyddanthoy lo77o hemethi hemetees.
30
Hessika, do7a ubbaafe minonne yashshi eronna gaammo.
31
Macca kuttota giddon hemetiya adde kutto, wude kaalethiya deesha kole; ba olanchota giddon qoncen eqiya kawa.
32
Neeni eeyada otortidaba gidikoka, iita oothanaw halchidaba gidiko, ane taki gada qopa.
33
Maathi bukey oysu kesseysada, siidhe dichin suuthi yeysada, hanqo denthethoy ooshshu ehees.
← Chapter 29
Chapter 31 →