Proverbs 27

Amharic Gofa GFBLVF (Geeshsha Maxaafa)

1Wontoy ehanaba ne eronna gisho wontoban ceeqetofa.

2Hara asi nena galatope attishin neeni nena galatopa; asi ne gisho markatofe attishin, neeni ne keehatethabaa odopa.

3Shuchi gita tooho; shafey deexo; shin eeya asi medhiya ooshshi nam7aafeka deexees.

4Hanqos qadhey baawa; yiloy dhaysiya di7o mela; shin qanaatey ubbaafe iita.

5Geemmida siiqope baliya wode qoncen hanqetethi lo77o.

6Morkey nena tammu toho yeeranaape siiqoy nena madunxiseysi lo77o.

7Kallida asi ililo eessi shaattees; shin koshatida uraa cammiyabay mal7ees.

8Ba soo aggidi yuuyiya asi, ba keethaa aggada paalliya kafo mela.

9Shittoynne sawiya ixaaney ase ufayseysada siiqo lagge zorey hessada ufaysees.

10Ne laggetanne ne aawa laggeta aggofa; ne metootida wode ne ishaa soo boopa; haahon de7iya ishape matan de7iya shooroy lo77o.

11Ta na7aw, cinca gida; tana ufaysa; tana kadhiya asaas ta zaaro immana.

12Cinca asi metoy yaa wode be7idi qosetees; shin akeeki bayna asi bidi meton gelees; yaatidi guyepe qiirotees.

13Eronna asas waase geliya uraa ma7uwa qaari ekite; imatha asas waase gelida uraa ma7uwa oykite.

14Wonta guura ba qaala dhoqu oothidi, ba shooruwa sarotey iya baaddiya asa mela.

15Doonatiya machanne aathiya keethi issino.

16Carko teqanaw, zayte kuucidi oykanaw danda7etonaysada, iyo si77i oothanaw danda7etenna.

17Birati birata posheysada, asi issoy issuwafe tamaarees.

18Balase mithi loythidi naagiya asi iya ayfe maana; ba halaqaa kaaboya oosanchoy bonchetana.

19Haathi mastooteda som7o besseysada, asa wozani iya oonatetha bessees.

20Hayqoynne Duufoy kalli eronnaysada, asa ayfey kallidi erenna.

21Birinne worqey taman paacetidi geeyeysada, asi ba ekiya galatan paacetees.

22Kathi udulan caddeysada, eeya asi udulan caddiyakoka iyape eeyatethay kichenna.

23Ne dorsata hanota loythada era; ne wudiyaka akeekada heemma.

24Ayis giiko, duretethi merinaw deenna; kallachika yeletethafe yeletethaas aadhenna.

25Mela maatay buucetin, aaca maati keya wode, deriya bolla de7iya maatay shiiqidaape guye,

26dorsata ikisepe ne new ma7o kessana; deeshata bayzada gade shammana.

27Attida deeshata maathay new, ne soo asaasinne ne macca aylletas kathi gidana.

← Chapter 26 Chapter 28 →