Isaiah 48

Amharic Gofa GFBLVF (Geeshsha Maxaafa)

1“Hinteno, Yayqooba soo asaw, Isra7eele sunthan xeegetidaysato, Yihuda kochaafe yidaysato, haysa si7ite. Hinte Godaa sunthan caaqeta; Isra7eele Xoossaa xeegeta; shin tumatethaninne xillotethan gidenna.

2Hinte, ‘Nuuni geeshsha kataman de7oos; Isra7eele Xoossan zempoos; iya sunthay Ubbaafe Wolqaama Godaa’ ” yaagidi ceeqeteta.

3Taani sinthafe hananabata daro wodepe kase odas. ta doonape enti keyin, enti eeson poletana mela oothas.

4Neeni odin si7onnaysa, ne morgey birata mela gideysa ne som7oy naase biratada leeqamonaysa taani erayis.

5Hessa gisho, neeni, “Haysa ta eeqay oothis; ta masetida misileti, ta sheeshada oothida misileti oothidosona” goonnaada, Taani hessa new benipe doomada odas. Enti hananaape sinthe taani enta new erisas.

6“Ta kase odidaysa ne si7adasa; I poletidaysa be7adasa, yaatin iya tumatethaa ekikii? Hizape ne eronna oorathabata ta new odana.

7Enti beni medhetidaba gidonashin ha77i medhetidosona. Neeni, ‘Taani enta erayis’ goonnaada haysafe kase neeni entaba si7abaka.

8Neeni si7abaka; erabaaka; ne haythay benipeka dooyetibeenna. Neeni ay cimmiya aseeko taani erayis; neeni yeletoosape geella geetetada xeegeteysa erayis.

9Ta sunthaa gisho, taani ta hanquwa zaarana; ta bonchuwa gisho nena dhaysona mela ta hanquwa teqana.

10Taani nena paacas; birada gidonashin taani nena meto taman paacas.

11Taani ta gisho, haysa oothana; ta sunthay tooshetana mela koyke; taani ta bonchuwa haras immike.”

12“Neno Yayqooba, taani xeegida Isra7eele, taani odiyaba si7a; taani iya; koyroyka tana; wursethayka tana.

13Ta kushey biitta baasuwa medhis; ta ushacha kushey salota miccis. Taani enta xeegiya wode enti issife eqoosona.

14“Hinte ubbay issife shiiqidi si7ite; eeqatape haysi hananaysa sinthatidi odiday oonee? Goday dooridaysi iya qofaa Babiloone bolla polana; iya qeseyka Babiloone biitta bolla gidana.

15Taani, ta huuphen iyaw odas; iya xeegas; ta iya ehana; I oothiyaba ubbay iyaw poletana.

16“Taako haa shiiqidi haysa si7ite; “Taani koyrope doomada geeman odabike; hessi hanida wodepe doomada taani yan de7ayis” yaagees. Ha77ika Ubbaa Haariya Godaynne iya Ayyaanay tana kiittidosona.

17Nena woziya Goday, Isra7eele Geeshshay haysada yaagees: “Nena maaddiyaba tamaarsey ne baanaw bessiya ogiya ne kaalethey, tana ne Godaa, ne Xoossaa.

18Neeni ta kiitaa si7idaba gidiyako, ne sarotethay shaafa haathada gogganashin; ne xillotethay abba beetada hananashin.

19Ne kochay abba shafeda, ne nayti taybetonna baana mela daranashin; enta sunthay ta sinthafe dhayenna; kichennashin” yaagees.

20Babiloone biittafe keyite; Babiloonepe baqatite! Qaala dhoqu oothidi, ufaysan haysada yaagidi waassite. Sa7aa gaxape gaxa gakanaw haysa kiittite; “Goday ba aylliya Yayqooba wozis” yaagidi odite.

21I enta mela biittara kaalethida wode saamotibookona. Zaallafe haathi entaw pultis; I zaalla phalqin haathi dhuuqis.

22“Iitatas saroy baawa” yaagees Goday.

← Chapter 47 Chapter 49 →