Isaiah 47

Amharic Gofa GFBLVF (Geeshsha Maxaafa)

1“Babiloone geela7ee, duge wodhada baana bolla utta. Babiloone naatte, ne araata aggada sa7an utta. Hizape guye neeni saaphotiyaronne baalotiyaro geetetaka.

2Woxa teqada kathi gaacca; ne guulunthaa qaara; ne adussa ma7uwa kessa; ne wodiriya qaarada shaafa pinna.

3Ne kalloy qaaretana; ne pokoy bentana. Taani halo keyana; oodeska qadhetike” yaagees Goday.

4Nuna Woziya Isra7eele Geeshshaa sunthay Ubbaafe Wolqaama Godaa.

5“Babiloone naatte, bada dhuman si77i gada utta; Hizape guye neeni kawotethata kawiw geetetaka.

6Taani ta asaa hanqetas; ta laata tunisas; taani enta ne kushen aathada immas. Neeni entaw qadhetabaaka; cimidaysata bolla ne deexo qambara wothadasa.

7Neeni, ‘Taani merinaw kawo gidana’ yaagadasa; shin ne oothida oosuwanne iya wursethay waananeko qopabaaka.

8“Neno wopu gada uttidaarenne naagetada de7idaare si7a. Ne wozanan, ‘Taape attishin, hari baawa; taani am7o gidike; woyko yelada na7i bayna asi gidike’ yaagadasa.

9Ha nam7ubati qoponna issi gallas ne bolla yaana. Ne bitay ay darikoka, ne murunnoy ay wolqaamikoka neeni ne naytape mela atteysinne am7etethay attenna.

10“Neeni ne iitatethan ammanetada, ‘Oonika tana be7enna’ yaagadasa. Ne eratethaynne cincatethay nena balethin, neeni ne wozanan, ‘Taape attishin, hari baawa’ yaagadasa.

11Shin neeni waatada ne bitan haassaneeko eronna iitay ne bolla yaana. Neeni gate qanxanaw danda7onna dhayoy ne bolla wodhana; qassi neeni aykoka qoponna gadoy ne bolla yaana.

12“Ane neeni ne na7atethafe doomada oothashe de7ida ne bitaanne ne murunnuwa ha77ika ootha. Ooni eri ne qopidaysa mela hananeeko woyko neeni iyara daganthaneeko.

13Neeni ekida zorey ubbay daabursafe attishin, nena aykoka maaddibeenna. Salo xoolinto taybeysatinne iya xeellidi ageenan ageenan hananaba odeysati ane nena asho.

14Enti buure mela; tami enta maana. Enti tama lacuwape bantana ashshanaw danda7okona. Asi kayaa bonqoy woyko asi iya sinthan uttidi ho77iya tama gidenna.

15Neeni entara daaburidaysati, na7atethafe doomidi neera zal7idaysati new hessa mela. Enti issoy issoy ba balan balan oyketana; nena ashshiya oonika baawa.”

← Chapter 46 Chapter 48 →