Genesis 46

Amharic Gofa GFBLVF (Geeshsha Maxaafa)

1Isra7eeley baw de7iyaba ubbaa ekidi, Barsaabe gakida wode ba aawa Yisaaqa Xoossas yarsho yarshis.

2Xoossay qamma Isra7eeles qoncidi, “Yayqooba, Yayqooba” yaagis. Ika, “Heko, abe Godaw” gidi koyis.

3Xoossay iyako, “Taani Xoossaa, ne aawa Xoossa; neeni Gibxe baanaw babofa. Ta ne sheesha yan gita dere kessana.

4Taani neera issife Gibxe baana; taani ne sheesha yaape kessada haa ehana. Ne hayqiya wode Yoosefi ne ayfiya oykana” yaagis.

5Hessafe guye, Yayqoobi Barsaabepe dendis. Isra7eele adde nayti banta aawa Yayqooba, banta naytanne banta macheta Gibxe Kawoy entaw yeddida gita para gaare bolla uttisidi efidosona.

6Enti Kanaane biittan haarida haaruwanne mehe ubbaa eki bidosona. Yayqoobi ba soo asa ubbaa ekidi Gibxe bis.

7I ba soo asa ubbaa; adde naytanne ba adde nayta nayta, ba macca naytanne ba macca nayta nayta, ubbaa baara ekidi Gibxe bis.

8Isra7eelera Gibxe biitta bida iya nayta sunthay haysafe kaallidi xaafetidaysa. Yayqooba bayra na7ay Robeela;

9Robeela adde nayti Hanooka, Pala, Hesiroonanne Karma.

10Simoona adde nayti Yamu7eela, Yamina, Ohada, Yakina, Xohaaranne Kanaane maccaseepe yelida Saa7ula.

11Leewe adde nayti Gedisoona, Qahatanne Meraara.

12Yihuda adde nayti Era, Onaana, Seela, Paaresanne Zaara. Shin Erinne Onani Kanaane biittan hayqidosona. Paaresa adde nayti Hesiroonanne Hamuula.

13Yisakoora adde nayti Tola, Puu7a, Yoobanne Shimroona.

14Zabloona adde nayti Sareda, Eloonanne Yahilaala.

15Ha adde naytinne macca na7iya Diina, Liya Masephexoome biittan Yayqoobas yelidaysata. Diina gujin iya naytinne nayta nayti kumethi hastamanne heedza.

16Gaade adde nayti Xafoona, Hagge, Shuuna, Exiboona, Eri, Aroodanne Ar7eela.

17Aseera adde nayti Yimina, Yesuwa, Yisiwanne Beri7a. Enta michiya Saraho. Beri7a adde nayti Hebeeranne Malki7eela.

18Haysati Laabi ba na7e Liyas immida Zalafa Yayqoobas yelida nayta. Enti kumethi tammanne usupuna.

19Yayqooba mache Raheeli adde nayti Yoosefanne Biniyaame.

20Ona katama kahine Phoxfaara na7iya Asnaata Yoosefas Gibxen Minaasenne Efreema yelasu.

21Biniyaame nayti Beella, Bekera, Asbeela, Geera, Naamane, Eha, Orosha, Mufima, Hufimanne Arada.

22Haysati Yayqoobas yeletida Raheeli adde nayta. Enti kumethi tammanne oydda.

23Daane adde na7ay Hushima.

24Niftaaleme adde nayti Yahixeela, Guna, Yexeranne Shileme.

25Haysati laapunati Laabi ba na7e Raheelis immida Baali Yayqoobas yelida naytanne nayta nayta.

26Yayqoobara Gibxe bida, iya gulbatape keyida nayti, iya nayta macheta gujonna usupun tammanne usupuna.

27Gibxen Yoosefas yeletida nam7u nayta gujiko, Gibxe bida Yayqooba soo asay kumethi laapun tamma.

28Geesame biittan bantana mokana mela Yayqoobi Yihuda baape sinthe Yoosefako kiittis. Enti yaa gakiya wode,

29Yoosefi ba para gaariya giigisidi, ba aawa Isra7eelera gahetanaw Geesame bis. Yoosefi ba aawa demmida mela iya qoodhiyan xaaxetidi daro wode yeekis.

30Isra7eeley Yoosefako, “Neeni paxa de7ishin, taani ne ayfiya be7ida gisho, hiza taani hayqikoka aykoy baawa” yaagis.

31Hessafe guye, Yoosefi ba ishatanne ba aawa soo asatako, “Taani Gibxe kawako bada iyako, ‘Kanaane biittan de7iya ta ishatinne ta aawa soo asay taako yidosona.

32Enti mehe haareyisata, enti bantara banta dorsa, banta deesha, mehiyanne bantaw de7iyaba ubbaa ekidi yidosona’ yaagana.

33Kawoy hintena xeegisidi, ‘Hinte oosoy aybee?’ gidi oychiko,

34hinte iyako, ‘Nuuni ne aylleti na7atethafe doomidi nu aawatada mehe heemmoos’ yaagite. Dorse haariya asi Gibxe asan kadhetidaba gidiya gisho, I hinte Geesame biittan daana mela oothana” yaagis.

← Chapter 45 Chapter 47 →