Genesis 45

Amharic Gofa GFBLVF (Geeshsha Maxaafa)

1He wode Yoosefi ba aylleta sinthan gencanaw danda7iboona gisho, “Asa ubbaa ta sinthafe kessite” yaagidi waassis. Hessa gisho, Yoosefi ba ishatas bana erisida wode iyara oonika allagi baawa.

2I ba qaala dhoqu oothidi, Gibxeti iya si7ana gakanaw yeekis; kawa soo asayka he woriya si7idosona.

3Yoosefi ba ishatako, “Taani Yoosefabay. Ta aaway hanno gakanaw paxa de7ii?” yaagidi oychis. Shin iya ishati daro dagammida gisho, iyaw aykoka zaaranaw danda7ibookona.

4Yaanin, Yoosefi ba ishatako, “Taako haa shiiqite” yaagis. Enti iyako shiiqin I enta, “Taani hinte tana Gibxe biitta bayzida hinte ishaa Yoosefa.

5Ha77i hinte tana bayzida gisho, qiirotofitenne hintena baaddofite. Ayis giiko, Xoossay tana hintefe sinthe kiitiday asa shempo ashshanaasa.

6Ha biitta koshi gelin haysi nam7antho laythi. Asi goyonna woyko cakonna hara ichashu laythati buroo de7oosona.

7Shin taani sa7an hinte sheeshanne hintena malaalsiya ogen ashshana mela Xoossay tana hintefe sinthe kiittis.

8Hessa gisho, tana ha bessa kiittiday Xoossafe attishin, hintena gideketa. I tana Gibxe kawas zoriya aawa, iya aqo ubbaa bolla godanne Gibxe biitta haariya asi oothis.

9“Ha77i ellesidi guye ta aawako bidi iyako, ne na7ay Yoosefi haysada yaagees giite; ‘Xoossay tana Gibxe biitta ubbaa bolla godaa kessis; neeni gam7onna taako haaya.

10Ne nayta, ne nayta nayta, ne dorsaa, ne deesha, ne mehiyanne new de7iyaba ubbaa ekada haaya; ta matan Geesame biittan de7aasa.

11Buroo ichashu kosha laythati attidosona. Nena, ne soo asaanne ne mehiya koshi qohonna mela taani nena muzana’ ” yaagis.

12Qassika Yoosefi entako, “Hinteka, ta ishaa Biniyaameyka, ha hintera odetey tuma tana Yoosefa gideysa hinte ayfiyan be7ideta.

13Taw Gibxe biittan de7iya gita bonchuwanne hinte be7idaba ubbaa ta aawas odite. Ta aawaka ellesidi haa ekidi yiite” yaagis.

14Yoosefara Biniyaamera nam7ay wolu qoomidi yeekidosona

15Yoosefi yeekishe ba ishata ubbaa yeeris. Hessafe guye, iya ishati iyara odetidosona.

16Yoosefa ishata yuussaa worey kawo keethi gakida wode kawoynne iya moorinnati ufaytidosona.

17Kawoy Yoosefako, “Neeni ne ishatako yaaga; hinte hareta caanidi, Kanaane biitta simmite.

18Hinte aawanne hinte soo asa ekidi, guye taako haa yiite. Taani hintew Gibxe biittan ubbaafe lo77iya bessa immiko, he biitta modhuwa hinte kaashana.

19Qassika, banta nayta, banta machetanne banta aawa ehanaw Gibxefe gita para gaare eki baana mela enta kiita.

20Gibxe biittan de7iya ubbaafe aadhidi lo77iyabay entassa gidiya gisho, banta aggidi yaa aquwas qoponna mela entaw oda” yaagis.

21Yaatin Isra7eele adde nayti kawoy gidaysada oothidosona. Yoosefi Kawoy kiitidaysada gita para gaaretanne oges shinqeka entaw immis.

22Enta ubbaas huuphen huuphen ooratha ma7o immis. Shin Biniyaames tammanne usupun kilo giraame deexiya biranne ichashu kumetha ma7o immis.

23I ba aawas Gibxen de7iyabaape lo77iyaba ubbaa tammu adde haren caanidi, qassi oges kathi, uythinne hara kathi tammu macca haretan caanidi yeddis.

24Yaatidi, Yoosefi ba ishata moyzishe, entako, “Ogiyan bishe ooyetofite” yaagis.

25Enti Gibxefe dendidi, Kanaane biittan de7iya banta aawa Yayqoobako simmidosona.

26Enti Yayqoobako, “Yoosefi paxa de7ees. I hessafe aadhidi Gibxe biitta ubbaa haarees” yaagidosona. Yayqoobi dagammidi, wozana dhayda gisho, enti giyaba ammanibena.

27Shin enti Yoosefi entaw odidaba ubbaa iyaw odin, qassika iya eki yaana mela I yeddida gita para gaareta I be7in iyaw shempoy simmis.

28Isra7eeley, “Hiza ta ammanetas. Ta na7aa Yoosefi hanno gakanaw paxa de7ees. Ta hayqanaape sinthe bada iya be7ana” yaagis.

← Chapter 44 Chapter 46 →