Genesis 43

Amharic Gofa GFBLVF (Geeshsha Maxaafa)

1Kanaane biittan koshay ha77ika kaseysafe aadhidi wolqaamis.

2Yaanin, enti Gibxefe ehida katha ubba midi ongin, enta aaway, “Qassika Gibxe bidi nuus guutha kathi shammite” yaagis.

3Shin Yihudi, “He uray nuna, ‘Hinte ishay hintera yoona ixiko, ta som7uwa zaari be7eketa’ yaagidi minthidi odis.

4Neeni nu isha nuura yeddiko, nuuni Gibxe bidi new kathi shammana.

5Shin he uray, ‘Hinte ishay hintera yoona ixiko hinte ta som7uwa zaari be7eketa’ ” yaagida gisho, neeni iya yeddonnaba gidiko nuuni booko.

6Yaatin Isra7eeley, “Hinte, ‘Nuus hara ishi de7ees’ gidi odidi ha metuwa ta bolla ayis ehidetii?” yaagis.

7Enti zaaridi, “He uray nubaanne nu soo asaaba minthidi oychis. I nuuko, ‘Hinte aaway paxa de7ii? Hintew hara ishi de7ii?’ yaagidi oychis. Nuuni I oychidaysa iyaw zaarida. I nuna, ‘Hinte isha eki yiite’ gaanaba nu awude erido?” yaagidosona.

8Yihudi ba aawa Isra7eeleko, “Nuuni, neeninne nu nayti koshan hayqanaape na7aa taara yedda, nuuni baana.

9Na7a ta waasetethan imma; iyabaa tana oycha. Taani iya new saro zaarada ehonna ixiko, ta de7o ubban ne baadethay tana gako.

10Nu gam7onaba gidiyako, hannoode nam7antho yaa simmana shin” yaagis.

11Enta aaway Isra7eeley, “Hessa gidiko haareysas kushe genthiyaba, ha biittan kaxiyaba ubbaafe lo77oba doorite. Hessika, qibaate, shitto, dumma dumma sawo, eessinne, ocholone hinte ogoruwan yeggidi, ekidi biite.

12Hinte ogoruwa doonan simmida miishey baletidaba gidanaw danda7iya gisho, miishiya nam7u kushe oothidi eki biite.

13Hinte ishaa ekidi, he uraako ellesidi guye biite.

14I hanko hinte ishaanne Biniyaame hintera yeddana mela Ubbaa Danda7iya Xoossay he uray hintew qadhetanada ootho. Tana gidiko, ta naytape mela attikoka attas” yaagis.

15Hessa gisho, ishanti wolla banta immiyabata, nam7u kushe miishiyanne Biniyaame bantara ekidi bidosona. Enti Gibxe gakidi, Yoosefa sinthe shiiqidosona.

16Yoosefi Biniyaame entara be7ida wode ba keetha kaapuwako, “Ha asata ta soo ekada ba. Issi mehe shukada giigisa; enti kathi taara maana” yaagidi kiittis.

17Yaatin kaapoy, Yoosefi kiitidaysada he asata iya soo efis.

18Enti Yoosefa soo bishe, yayidi, “Enti nuna haysa ehiday koyro nu ogoruwan simmida miishiya gisho gidonna aggenna. Enti nuna qohidi aylletethan haaronnanne nu hareta ekona aggokona” yaagi hirgidosona.

19Hessa gisho, enti Yoosefa soo penge gakidi, keetha kaapuwa odisidosona.

20“Godaw, nuuni koyro kathi shammanaw haysa yida.

21Guye simmishe nuuni qamma aqiya bessan ogoruwa billiya wode huuphen huuphen nu miishey paconna nu ogoruwan de7eysa demmida. Heko, nuuni he miishiya guye eki yida.

22Ha7i nuuni katha shammanaw hara miishe oyki yida. Nu miishiya nu ogoruwan ooni yeggidaako eroko” yaagidosona.

23I zaaridi, “Aykoy baawa, yayofite; hinte Xoossay, hinte aawa Xoossay, hinte ogoruwan hintew miishe immis. Taani hinte ciggida miishiya kumethi ekas” yaagis. Hessafe guye, Simoona entako kessis.

24He uray he asata Yoosefa soo efidi, enta tohuwas haathe ehin, enti meecetidosona. Enta haretasika miyaba yeggis.

25Enti Yoosefara kathi maanaysa si7ida gisho banta immanabata Yoosefas giigisidosona.

26Yoosefi ba soo gelida wode enti ehida banta immiyabata iyaw immidi, iya sinthan sa7a gakidi ziggidosona.

27I enta sarotetha oychi simmidi, “Hinte taw odida hinte cimida aaway lo77o de7ii? Ha77ika I paxa de7ii?” yaagis.

28Enti, “Ee, ne aylley, nu aaway paxa de7ees; I lo77o” yaagidi, hokidi iyaw ziggidosona.

29I ba aaye na7aa Biniyaame be7ida wode entako, “Hinte odida wursetha hinte ishay haysee?” yaagis. Biniyaame, “Ta na7aw, nena Xoossay anjo” yaagis.

30Yoosefi, iya ishaabay iyaw gompan seellida gisho, ellesidi, qol7a gelidi yan yeekis.

31I ba som7uwa meecetidaape guye keyidi bana minthethidi, kathi aathana mela kiittis.

32Enti Yoosefas dumma, iya ishatas dumma aathidosona. Gibxe asay Ibraawe asatara issife meysi bantana kawushiyaba oothi xeelliya gisho iyara miya Gibxe asatas dumma aathidosona.

33Enti Yoosefa sinthan bayray ba bayratethan, kaaloy ba kaalotethan maaran uttidosona. Enti issoy issuwa xeellidi, enta waatidi utisidaako be7idi malaaletidosona.

34Yoosefa gaytape entaw qumi gishetees, shin Biniyaames haratape aathidi ichashu kushe immis. Yaanidi, enti Yoosefara midi uyidi ufaytidosona.

← Chapter 42 Chapter 44 →