Psalms 38

Amharic Gofa GFBEVF (ጌሻ ማፃፋ)

1አቤት ጎዳዉ፥ ነ ሸንያን ታና ሴሮፓ፤ ነ ይሉዋን ታና ሀንቆፋ።

2ነ ዶንገ ቶራይ ታና ጫድስ፤ ነ ኩሸይ ታና ዴፅስ።

3ነ ሀንቅዳ ግሾ ታ አሳተይ ቆሄትስ፤ ታ ናጋራ ጋሶን ታ መቀይ ሊቅስ።

4ታ ባላይ ታና ሙክስ፤ ደንዶና ግታ ቶሆዳ ታና ዴፄስ።

5ታ ኤያተን ኦዳ ናጋራ ግሾ፥ ታ ማዱንይ ፅንቅስ።

6ታ ሳአ ፄላስ፤ ሆካስ፤ ጋላስ ኩመ አዛናሸ ፔአስ።

7ታ አሾይ ፁጌስ፤ ታ አሳተይ ፓፃ ግደና።

8ታ ዳቡራስ፤ ሊቃስ፤ ታ ዎዛናይ ድርግያ ግሾ ኦላስ።

9አቤት ጎዳዉ፥ ታ ዎዛና አሞ ኡባ ኤራሳ፤ ታ ኦለይ ኔፐ ጌምቤና።

10ታ ዎዛናይ ድርጌስ፤ ታ ዎልቃይ ህት ግስ፤ ታ አይፍያ ፖኦይ ይስ።

11ታ ማዱን ጋሶን ታ ሾሮትነ ታ ላገት ሃክድ ኤቅዶሶና፤ ታ ዳቦት ታፐ ሃክዶሶና።

12ታና ዎናዉ ኮየይሳት ባንታ ፅህያ ታዉ የጎሶና። ታና ቆሀናዉ ኮየይሳት፥ “ኑ ነና ደማና” ያግድ ማንዶሶና ጋላስ ኩመ ታ ቦላ ቶቦሶና።

13ታ ቱለ አሳ መላ ስእከ፤ ሙመ አሳ መላ ዶና ፖግከ።

14ቱማ ሀይ ስኦና አስ፥ እንፃርስ ኦድድ ዛሮና አስ ግዳስ።

15ጎዳዉ፥ ታ ነና ኡፋይሳን ናጋይስ፤ ታ ጎዳዉ፥ ፆሳዉ ነ ታዉ ዛሮ እማ።

16ታኒ፥ “ታ ቶሆይ በትን፥ ኤንቲ ሀሹ ጋናዳነ ታ ቦላ ጬቀታናዳ ኦፋ” ያጋስ።

17ታ ኩንዳና ሀናይስ፥ ታ ሳኮይ ታና አጎና እፅስ።

18ታ ናጋራ ፓፃይስ፤ ታ ናቁዋ ጋሶን አዛናይስ።

19ታ ሞርከት ግታነ ዎልቃማ፤ ታና ጮ እፀይሳት ዳሮ።

20ታኒ ሎኦባ ኦን ኢታ ዛረይሳት፥ ታ ሎኦባ ካልያ ግሾ ታራ ኤቀቶሶና።

21ጎዳዉ፥ ታና የጎፋ፤ ታ ፆሳዉ፥ ታፐ ሃኮፋ።

22ታና አሽያ ታ ጎዳዉ፥ ታና ማዳናዉ ኤለሳ።

← Chapter 37 Chapter 39 →