Mark 7

Amharic Gofa GFBEVF (ጌሻ ማፃፋ)

1የሩሳላመፐ ይዳ ጉ ፋርሳወትነ ህገ አስታማረት የሱሳ ማታን ሺቅዶሶና።

2የሱሳ ታማረታፐ እሶት እሶት ጌዮና ኩሽያን፥ ሄስካ ኩሸ ሜጨቶና ካ መይሳታ በእዶሶና።

3ፋርሳወትነ አይሁደ አሳ ኡባይ ባንታ አዋታ ዎጋ ባንታ ኩሽያ ሜጨቶና ሞኮና።

4ሄሳዳካ፥ ኤንቲ ግያፐ ሻመትዳባ ሜጮና ደእሸ ሞኮና። ቃስ ኤንቲ ባንታ አዋታፐ ኤክዳ ሀራ ዳሮ ዎግ ደኤስ፦ ሄስካ ስነታ፥ ከረታ፥ ብራታ ሚሸታነ አርሳ ሜጭያ ዎጋ ናገይሳ።

5ፋርሳወትነ ህገ አስታማረት የሱሳ፥ “ነ ታማረት አይስ አዋታ ዎጋ መንድ ባንታ ኩሽያ ሜጨቶና ካ ሞና?” ያግድ ኦይችዶሶና።

6የሱሲ ኤንታኮ፥ “እሳያስ ህንተና ጩቦታ፥ “ ‘ሀይስ አሳይ ታና ባ እንፃርሳ ፃላላን ቦንቼስ፥ ሽን ኤንታ ዎዛናይ ታፐ ሃሆን ደኤስ።

7አስ መዳ ዎጋ ፆሳ ህገ ዳንስድ ታማርስያ ግሾ፥ ኤንቲ ታዉ መላ ጎይኖሶና’ ” ግድ ፃፍዳይስ ቱማ።

8“ህንተ ፆሳ ኪታ አግድ አሳ ዎጋ ምንድ ናገታ” ያግስ።

9ቃስካ የሱሲ፥ “ህንተ ህንተ ዎጋ ናግድ ፆሳ ኪታ የግ አጋናዉ ሎኦ ኦገ ደምደታ።

10ሙሰይ፥ ‘ነ አዋነ ነ አይዉ ቦንቻ’፥ ቃስ ‘ባ አዋነ ባ አይዉ ጫየይስ ሀይቃናዉ በሴስ’ ያግስ።

11ሽን እስ አስ ባ አዋ ዎይኮ ባ አይዉ ማዳናይሳ አግድ፥ ‘ሀይስ ታኒ ፆሳስ እምዳ ያርሾ’ ጊኮ፥

12እ ባ አዋ ዎይኮ ባ አይዉ ማዶና መላ ኦታ።

13ሄሳዳካ፥ ህንተ ሀራታ ታማርስዳ ህንተ ዎጋን ፆሳ ቃላ ካደታ። ሄሳ መላ ሀራ ዳሮባ ኦታ” ያግስ።

14የሱሲ ዳሮ አሳ ቃስካ ባኮ ፄግድ፥ “ኡባይ ታኒ ኦደይሳ ስእተነ አኬክተ።

15አሳ ዎዛናፐ ከያባይ አሰ ቱንሴስፐ አትሽን፥ ካረፐ አሳ ኡሎ ገልድ አሰ ቱንስያባይ አይብካ ባዋ።

16ስእያ ሀይ ደእያ ኦንካ ስኦ” ያግስ።

17የሱሲ ዳሮ አሳ የግ አግድ ሶ ገልን እያ ታማረት ሄ ሌምሱዋባ እያ ኦይችዶሶና።

18እ ኤንታኮ፥ “ህንተዉካ ቃስ ገልቤኔ? ካረፐ አሳን ገልያባይ አይብካ አሰ ቱንሳናዉ ዳንዳኦናይሳ አኬከቲ?

19አይስ ጊኮ፥ ካ አሳ ኡሎ ግዶ ገልድ ካንድ አስፐ አትሽን፥ አሳ ዎዛና ግዶ ገለና” ያግስ። ሄሳን የሱሲ ካ ኡባይ ጌሽ ግደይሳ ኤርስስ።

20ካልድካ፥ የሱሲ፥ “አሳ ቱንስያባይ አሳ ዎዛና ግዶፈ ከያባ።

21አሳ ዎዛና ግዶፈ ከያባይ ኢታ ቆፋ፥ ላይማተ፥ ካይሶ፥ አሰ ዎ፥ ላመ፥

22ኢታ አሞ፥ ኢታተ፥ ገነ፥ ቃይፀ፥ ጭሞ፥ ቃናተ፥ ጫሸ፥ ኦቶሮነ ቦዛተ።

23ሀ ኢታባይ ኡባይካ አሳ ዎዛና ግዶፈ ከይድ አሰ ቱንሴስ” ያግስ።

24የሱሲ ያፐ ከይድ፥ ፅሮሳ ካታማ ማታን ደእያ ቢታ ብስ። እ እስ ኬ ገልድ ያን ደኤይሳ ኦንካ ኤራና መላ ኮይቤና። ሽን ቆሰትድ ጋምአናዉ ዳንዳእቤና።

25ሽን እ ጉ ናእዉ ቱና አያናይ ኦይክዳ እስ ማጫስያ የሱሳባ ስአዳ ኤለሳ እያኮ ያዳ እያ ቶሁዋ ቦላ ኩንዳሱ።

26እያ አይሁደ ማጫስ ግዱኩ፤ እያ የለትዳይ ስሮፍንቀ ቢታና። እያ፥ ባ ናኤፐ ቱና አያና ከሳና መላ የሱሳ ዎሳሱ።

27ሽን የሱሲ ዛሪድ፥ “ናይት ኮይሮትድ ካ ካሎ፤ ናይታ ካ ኤክድ ካናታስ የገይስ ሎኦ ግደና” ያግስ።

28ማጫስያ ዛራዳ፥ “ታ ጎዳዉ ሄስ ቱማ፥ ሽን ጋይታ ማታን ደእያ ካናት ናይታፐ ዎያ ቲፍያ ሞሶና” ያጋሱ።

29የሱሲ ቃስ ኢኮ፥ “ሀ ነ ቃላ ግሾ፥ ነ ሶ ባ፤ ቱና አያናይ ነ ናኤፐ ከይስ” ያግስ።

30ማጫስያ ባ ሶ ብያ ዎደ ቱና አያናይ ኢፐ ከይን ሂፃን ዝንእዳሮ ደማሱ።

31የሱሲ ፅሮሳ ካታማፐ ከይድ፥ ስዶናራነ ታሙ ካታማታ ጌተትያ ቢታራ ካንድ ጋልላ አባኮ ብስ።

32አሳይ ቱለነ ዋይድ ኦደትያ አስ የሱሳኮ ኤህድ፥ ባ ኩሽያ እያ ቦላ ዎና መላ እያ ዎስዶሶና።

33የሱሲ ባርካ ሄ ኡራ ዳሮ አሳፐ ጋፃ ከስድ፥ ባ ብራያ እያ ሀይን የድስ። ቃስ ጩቹ ጩትድ እያ እንፃርሳ ቦችስ።

34ሳሎ ፑደ ፄልድ፥ ቶክ ሸምፕድ፥ “ኤፍታህ” ግስ። ብርሸይካ “ዶየታ” ጉሱ።

35ኡራ ሀይይ ኤለስድ ዶየትስ፥ ቃሸትዳ እንፃርሳይካ ብርሸትስ፥ ኡራይ ጌሽድ ኦደትስ።

36የሱሲ አሳኮ፥ “ሀይሳ ኦደስካ ኦዶፕተ” ያግስ። ሽን እ ዳሮ ምንድ ኦዶፕተ ግን፥ አሳይ ኦዳ ያ ዳርስስ።

37ሄሳ ስእዳ አሳ ኡባይ ዳሮ ማላለትድ፥ “ኡባባ እ ሎይ ኦስ። ሀር አቶሽን፥ ቱልያ ስሴስ፥ ሙምያ ኦድሴስ” ያግዶሶና።

← Chapter 6 Chapter 8 →