Mark 6 — Amharic Gofa GFBEVF (ጌሻ ማፃፋ)

1የሱሲ ያፐ ከይድ፥ ባ ታማረታ ካለድ፥ ባ ካታማ ናዝረተ ብስ።

2ሳምባታ ጋላስ አይሁደ ዎሳ ኬን ታማርሶ ኦይክስ። እ ታማርሰይሳ ስእዳ ዳሮ አሳይ ማላለትድ፥ “ሀይስ ሀ ኡባ አዉፐ ደምዴ? ሀ ጭንጫተ እ አዉፐ ኤክዴ? ሀ ማላታታ ኦያ ማታ እ አዉፐ ደምዴ?

3ሀይስ አናፅያ ግደኔ? ማይራም ናአ፥ ያይቆባ፥ ዮሳ፥ ይሁዳነ ስሞና እሻ ግደነዬ? እያ ምቸት ኑራ ሀይሳን ደኦኮናዬ?” ያግድ፥ እ ግያባ ኤኮና እፅዶሶና።

4የሱሲ ሄ አሳኮ፥ “ናበይ ባ ቢታን፥ ባ ዳቦታንነ ባ ሶ አሳን ቦንቸተናፈ አትሽን፥ ሀራታ ማታን ቦንቸቴስ” ያግስ።

5እ ሄ በሳን ባ ኩሽያ ጉ አሳ ቦላ ዎድ ፓዳይሳፈ አትሽን፥ ሀራ ማላታታ ኦናዉ ዳንዳእቤና።

6አሳይ አማንቦና ግሾ ዳሮ ማላለትስ። ሄሳፈ ጉየ፥ የሱሲ ሄ ሄራን ደእያ ጉታታን አሳ ታማርሴስ።

7የሱሲ ታማነ ናምኡ ታማረታ ባኮ ፄግድ፥ ናምኣ ናምኣ ጋድ ኪትስ። ኤንታዉ ቱና አያናታ ከስያ ዎልቃ እሚስ።

8ኤንታ፥ “ኦገ ፃምአፈ አትሽን፥ ካ፥ ካርፂታ፥ ህንተ ኪሰን ሚሸ አይብባካ ኦይኮፍተ።

9ህንተ ቶሁዋን ጫማ አተ፥ ሽን ናምኡ አፍላ ኦይኮፍተ” ያግስ።

10ቃስካ፥ “ህንተና አስ ሞክዳ ሶ አዉንካ ግድን ሄ በሳ የድድ ባና ጋካናዉ ሄ ኬን ጋምእተ።

11ህንተና አስ ሞኮናሱዋ ዎይኮ ህንተ ኦድያባ ስኦናሱዋ አዉን ግድኮካ፥ ሄ ቢታን ደእያ አሳስ ማርካ ግዳና መላ ሄ በሳፈ ከይሸ፥ ህንተ ቶሁዋፐ ባና ፕትተ” ያግስ።

12ታማነ ናምኡ ታማረት ብድ፥ አሳይ ባንታ ናጋራፐ ስማናዳ ቃላ ኦድዶሶና።

13ኤንቲ አሳፐ ዳሮ ቱና አያናታ ከስዶሶና። ዳሮ ሀርጋንቾታ ዛይተ ትይድ ፓዶሶና።

14የሱሳ ሱንይ ኡባ በሳን ከይዳ ግሾ፥ ካዎይ ሄሮዲስ እያባ ስእስ። እስ እስ አሳይ፥ “ፃማቅያ ዮሃንስ ሀይቆፐ ደንድስ፥ ሄሳ ግሾ ሀ ማላታታ ኦይ እያ” ያግዶሶና።

15ባጋት፥ “ሀይስ ኤልያሳ ግደኔ?” ያግዶሶና። ሀራት ቃስ፥ “ሀይስ በን ዎደ ናበታፐ እሱዋ ግዶና አገና” ያግዶሶና።

16ሽን ሄሮዲስ ሄሳ ስእዳ ዎደ፥ “ሀይስ ታኒ ቆያ ቃንፅስዳ ፃማቅያ ዮሃንሳ ግደኔ? እ ሀይቆፐ ደንድስ” ያግስ።

17ሄሮዲስ ባ እሻ ፍልጶሳ ማችዉ ሄሮድያዳ ኤክዳ ግሾ እ ጋሶን ዮሃንሳ ኦይድ ቃሽስስ።

18ዮሃንስ ሄሮዲሳ፥ “ኔኒ ነ እሻ ማችዉ ኤካናዉ በሰና” ያግስ።

19ሄሮድያዳ ዮሃንሳ ባ ኡሎን ሞርካዳ እያ ዎሳናዉ ኮያሱ፥ ሽን ዳንዳአቡኩ።

20ዮሃንስ ፅሎነ ጌሻ አስ ግድዳይሳ ሄሮዲስ ኤርዳ ግሾ፥ እያዉ ባብድ ሎይ ናግሴስ። ሄሮዲስ ዮሃንስ ግያባ ስአናዉ ዶስኮካ እ ግያባ ስእያ ዎደ ዳሮ ዳጋሜስ።

21ሄሮዲስ ባ የለትዳ ጋላሳ ቦንቻናዉ ደርያ ሃረይሳታስ፥ ሻላቃታስነ ጋልላን ደእያ ግታ አሳስ እማቶ ጊግስስ። ሄስ ሄሮድያዳስ እንጀ ጋላስ ግድስ።

22ሄሮድያዳ ናእያ እማይ ሞከትያ በሳ ገላ ዱራዳ፥ ሄሮዲሳነ እያ እማታ ኡፋይሳሱ። ካዎይ ናእዉ፥ “ነ ኮያባ አይባ ግድኮካ ታና ኦይቻ፥ ታኒ ነዉ እማና” ያግስ።

23ቃስ እዉ ጫቅድ፥ “ኔኒ ኦይችያባ አይባ ግድኮካ፥ ታኒ ነዉ እማና። ሀር አቶሽን፥ ታ ካዎተ ባጋ ግድኮካ ታኒ ነዉ እማና” ያግስ።

24ናእያ ካረ ከያዳ ባ አየኮ፥ “አይ እማ ጎ?” ጋዳ ኦይቻሱ። እ አይያ፥ “ፃማቅያ ዮሃንሳ ሁጵያ እማ ጋ” ያጋሱ።

25ናእያ ኤለሳዳ ካዋኮ ባዳ፥ “ፃማቅያ ዮሃንሳ ሁጵያ ሳነን ዎዳ ሀእ ታዉ እማና መላ ኮያይስ” ያጋሱ።

26ያንን፥ ካዎይ ዳሮ ቂሮትስ፥ ሽን ባ እማታ ግሾ እዉ ጫቅዳ ባ ጫቁዋ መንናዉ ኮይቤና።

27ሄሳ ግሾ፥ ኤለስድ ናገይሳ ዮሃንሳ ሁጵያ ኤሀና መላ ኪትስ። ናገይስ ቃሾ ኬ ብድ ዮሃንሳ ቆያ ቃንፅስ።

28ሄ ቃንፀትዳ ሁጵያ ሳነን ዎ ኤህድ ናኤስ እሚስ። ናእያ ቃስ ባ አየስ እማሱ።

29ዮሃንሳ ታማረት ሄሳ ስእዳ ዎደ ብድ እያ አሀ ኤክ ኤፍድ ሞግዶሶና።

30ታማነ ናምኡ ሀዋረት ስም ይድ ኤንቲ ኦዳባነ ታማርስዳባ ኡባ የሱሳስ ኦድዶሶና።

31ኤንታኮ ያ አሳይነ ብያ አሳይ ዳርዳ ግሾ፥ የሱሳራነ እያ ታማረታራ፥ ሀር አቶሽን ካ ማናዉካ ኤንታ ጋና እፅስ። ያንን፥ የሱሲ ኤንታኮ፥ “ኑርካ ጉ ሸምፕ ኤካናዉ አስ ባይና በሲ የተ” ያግስ።

32ሄሳ ግሾ፥ ኤንቲ ባንታርካ ዎጎሎን ገልድ አስ ባይና በሲ ብዶሶና።

33ኤንቲ ብሽን ዳሮ አሳይ ኤንታ በእድ ኤርዶሶና። ያትን፥ ካታማ ኡባፈ አሳይ ቶሆራ ዎፅ ብድ ኤንቲ ብያ በሳ ኤንታፈ ስን ጋክዶሶና።

34የሱሲ ዎጎሉዋፐ ዎድ ዳሮ አሳ በእስ። አሳይ ሄምያ አስ ባይና ዶርሳ መላ ግድዳይሳ በእድ ኤንታዉ ቃትድ ኤንታ ዳሮባ ታማርስስ።

35ሳአይ ኦማርስያ ዎደ የሱሳ ታማረት እያኮ ይድ፥ “ሀይስ በሳይ አስ ባይና በሲ፤ ሀእ ሳእካ ቃምስ።

36አሳይ ጉታታነ ካታማታ ብድ ባንታዉ ምያባ ሻማና መላ አሳ የዳ” ያግዶሶና።

37ሽን የሱሲ ዛሪድ ኤንታኮ፥ “አሳስ ምያባ ህንተ እምተ” ያግስ። ኤንቲ፥ “ኑኒ ብድ ናምኡ ፄቱ ድናረን ኡይ ሻምድ አሳ ሙዛና መላ ኮያይ?” ያግድ ኦይችዶሶና።

38የሱሲ ኤንታኮ፥ “ህንተዉ አፑን ኡይ ደኢ? አነ ብድ በእተ” ያግስ። ኤንቲ በእድ፥ “እቻሹ ኡይነ ናምኡ ሞሎ” ያግዶሶና።

39የሱሲ ባ ታማረታ አሳ ኡባ ጩጋን ጩጋን ሻክድ ማታን ኡትሳና መላ ኪትስ።

40አሳይ ፄቱ ጩጋንነ እሻታሙ ጩጋን ሻከት ሻከት ኡትዶሶና።

41የሱሲ እቻሹ ኡይነ ናምኡ ሞሎታ ኤክድ፥ ፑደ ሳሎ ፄልድ ፆሳ ጋላትስ። ኡይ መንድ አሳስ ግሻና መላ ባ ታማረታስ እሚስ። ቃስ ናምኡ ሞሎታ ኤንታ ኡባስ ሻክስ።

42አሳ ኡባይ ምድ ካልዶሶና።

43አትዳ ኡይ ቲፍያነ ሞሎታ ቲፍያ፥ እያ ታማረት ታማነ ናምኡ ጋይታ ኩመ ደንዶሶና።

44ኡይ ምዳ አደ አሳ ታይቦይ እቻሹ ሙኩሉ።

45ኤለስድ የሱሲ ባ ታማረት ዎጎሉዋን ገልድ፥ አባፈ ሄፍንን ደእያ ቤተሳይዳ ባፐ ስንትድ ባና መላ ኪትስ። ሽን ባዉ አሳ ሞይዛናዉ ጉየ አትስ።

46አሳ ሞይዝዳፐ ጉየ፥ ፆሳ ዎሳናዉ ዙማ ቦላ ከይስ።

47ሳአይ ቃምያ ዎደ ዎጎሎይ አባ ግዶን ደኤስ፥ ሽን የሱሲ አባፈ ጋፃን ባርካ ደኤስ።

48ጫርኮይ እያ ታማረታኮ ጫርክያ ግሾ፥ አባ ፕይ ዋይሰይሳ የሱሲ በእስ። ዎንትማ ሳእ ጌያና ሀንያ ዎደ እ አባ ቦላ ሄመትሸ ኤንታኮ ይድ፥ ኤንታ የግድ አናዉ ኮይስ።

49ሽን እ አባ ቦላ ሄመትሽን፥ ኤንቲ በእድ፥ ኤንታዉ ሞይትለ ዳንን ዋስዶሶና።

50ኤንቲ ኡባይ እያ በእድ፥ ያሻን ኮኮርዶሶና። ሽን የሱሲ ኤለስድ ኤንታኮ፥ “ታና፥ አይኮይ ባዋ፤ ያዮፍተ” ያግስ።

51የሱሲ ዎጎሉዋን ገልድ ኤንታራ እስፈ ኡትን ጫርኮይ ዎፑ ግስ። ኤንቲ ዳሮ ማላለትዶሶና።

52ኤንታ ዎዛናይ ዘልኡምዳ ግሾ፥ ኤንቲ ኡይባ አኬክቦኮና።

53ኤንቲ አባ ፕንድ፥ ገንሳሬፀ ቢታ ጋክድ፥ ዎጎሉዋ ጋፃ ሺሽድ ቃችዶሶና።

54ኤንቲ ዎጎሉዋፐ ዎያ ዎደ አሳይ ኤለስድ የሱሳ ኤርዶሶና።

55ኤንቲ ሄራን ደእያ ቢታ ኡባን ዎፀረትድ ሀርጋንቾታ ሀላን ቶክድ፥ “የሱሲ ደኤስ” ግን ስእዳ በሳ ኤህዶሶና።

56አሳይ እ ብዳ ሶ ኡባን፥ ጋፃርያን ግድን፥ ካታማን፥ ደእያ ሀርጋንቾታ ዳባባ ኤፎሶና። ሀርጋንቾት እያ አፍላ ማጫራ ግድኮካ ቦቻና መላ አሳይ እያ ዎስዶሶና። ቦችዳ ኡባይ ፓፅስ።