Psalms 50

Amharic Gamo (ጋሞ ማጻፋ)

1ዎልቃማ ጎዳይ፥ ጾሳይ ሃሳዬስ፤ ኣርሼይ ሞኪዛሶፔ ዉሊዛሶ ጋካናስ ሳኣን ዲዛ ኣሳ ጼይጌስ።

2ሙሌራ ሎኦ ጊዲዳ ጺዮኒፔ ጾሲ ፖኢሴስ።

3ኑ ጾሲ ያና፤ ኢዚ ጮኡ ጌና። ሚዛ ታማይ ኢዛ ሲንና፤ ዎልቃማ ጎቴይ ኢዛ ዩሾና።

4ጾሲ ባ ኣሳ ፒርዳናስ ሳሎኔ ሳኣ ጼይጌስ።

5«ታናራ ያርሾን ጫቄቲዳ ጌሻታ ታኮ ሺሺቴ» ጌስ።

6ጾሲ ባርካ ፒርዲዛ ጾሳ ጊዲዳ ጊሻስ ሳሎቲ ኢዛ ጺሎቴ ኣዋጄቴስ።

7«ታ ኣሳዞ ኔ ሲያ! ታኒ ኔስ ዮታይስ፤ ኢስራኤሌ ኣሳዉ! ታኒ ኔ ቦላ ማርካታይስ። ታኒ ጾሳይ ኔ ጾሳ።

8ኔ ያርሾ ጊሻሲኔ ኔኒ ኡባቶ ሺሺዛ ጹጌቲዛ ያርሾ ጊሻስ ታኒ ኔና ቦሪኬ።

9ሄሳ ማላካ ኔ ዲርሳፌ ኮርማታ፥ ዎይኮ ኔ ጻርጳፌ ዴይሻታ ኤካናዉ ኮይኬ።

10ዎራን ዲዛ ዶኣ ኡባቲ ታሳ፤ ሺ ዙማታ ቦላን ዲዛ ሜሄቲካ ታይታ።

11ታኒ ዙማታ ቦላ ዲዛ ካፎታ ኡባ ኤራይስ፤ ዴምባን ዲዛ ሜቴቲ ኡባይ ታይታ።

12ሳሎ ጉፋንን ዲዛ ኡባይ ታሳ፤ ሄሳ ጊሻስ ታ ጋፊኮካ ኔስ ዮቲኬ።

13ታኒ ኮርማታ ኣሾ ሚኬ፤ ዎይኮ ዴይሻታ ሱ ኡዪኬ።

14ጾሳስ ጋላታ ያርሾ ሺሻ፤ ኔ ኣዲና ኡባፌ ቃ ጾሳስ ጋ።

15ሜቶ ጋላስ ኔ ታና ጼይጋ፤ ታ ኔና ኣሻና፤ ኔካ ታና ቦንቻና» ጌስ።

16ጊዶ ኣቲን ጾሲ ናጋራንቻስ፥ «ታ ዎጋ ኔኒ ዛራ ዛራዳ ቢዳናስ ዎይኮ ታ ጫቆ ቃላ ኔ ዮታናስ ኔስ ኣይ ማታይ ዲዜ?

17ኔ ታ ሴራ ኢጻሳ፤ ታ ቃላታካ ካሳ።

18ኔኒ ካይሶ ቤኢዳ ዎዴ ኢዛራ ዳቦታዳሳ፤ ላይማቲዛይታ ማባራንካ ዙፔታሳ።

19ኔኒ ኔ ዶና ኢታ ሃሳያናስ ዶያዳሳ፤ ኔ ሃሳይዛ ሃሳያይ ዎርዶ ጻላ።

20ኣሶን ኣሶን ኔ ኢሻ ዚጊራሳ፤ ኔ ኣዪ ና ሱንካ ሞራሳ።

21ኔኒ ሃይሳ ኡባ ኦዛ ዎዴ ታኒ ጮኡ ጋዲስ፤ ሄሳ ጊሻስ ኔኒ ታና ኔ ማላ ጋዳ ቆፓዳሳ፤ ጊዶ ኣቲን ሃኢ ታኒ ኔና ዋላሳይስ፤ ቃሴካ ታ ኔና ቆንጬን ሴራይስ።

22«ኢንቴኖ ጾሳ ዶጊዛይቶ! ሃይሳ ኣኬኪቴ፤ ኢንቴ ኢጺስ ጊኮ ታኒ ኢንቴና ሜንሬና፤ ሄ ዎዴ ኢንቴና ኦኒካ ኣሼና።

23ታስ ጋላታ ኢሚዛ ኣሲ ታና ቦንቼስ። ሱሬ ኦጌራ ቢዛ ኣስ ታኒ ኣቶቴ ቤሳና» ጌስ።

← Chapter 49 Chapter 51 →