Psalms 143

Amharic Gamo (ጋሞ ማጻፋ)

1ኣቤት ጎዳዉ! ታ ዎሳ ሲያ፤ ታ ሾቢዛይሳ ኤዝጋ፤ ኔኒ ጺሎኔ ኣማኔቲዛይሳ ጊዲዳ ጊሻስ ታስ ዛሮ ኢማ።

2ኔ ሲንን ጺሎ ጊዳና ኣሲ ኦኒካ ዴና፤ ታና ኔ ኣይሌዛ ፒርዳስ ሺሾፋ።

3ታ ሃይቃና ጋካናስ ታ ሞርኬቲ ታና ዬዴዳ፤ ታና ዲርጺዲ ቢታ ጋርስ ጌልዳ፤ ካሴ ሃይቂዳ ኣሳታ ማላካ ታና ማን ዎዳ።

4ሄሳ ጊሻስ ታኒ ዳቡራዲስ፤ ታ ዎዚናይካ ሂዶታ ቃንጺዴስ።

5ታኒ ቤኒ ዎዴታ ሃሳኣይስ፤ ኔኒ ኦዳ ኦሶ ኡባ ዩሻ ቆፓይስ፤ ኔ ኩሼ ኦሶታካ ኣኬካይስ።

6ታኒ ታ ኩሼዛ ኔኮ ሚጫይስ፤ ሜላ ቢታይ ሃ ኮይዛ ማላ ታ ሼምፖያ ኔና ሳሜታዱስ።

7ኣቤት ጎዳዉ! ታኒ ዳቡራዲስ፤ ኔ ታስ ዛሮ ኢማናስ ኤሌላ! ታኒ ሃይቂዳ ኣሳታ ዱጌ ዱፎን ጌሎንታ ማላ ኔ ሲን ታፔ ጌንፋ።

8ታኒ ኔና ኣማኔቲዛ ጊሻስ ማላዶ ማላዶ ኔ ሲቆ ታና ቤሳ፤ ታኒ ታ ሼምፖ ኔስ ሃዳራዲስ፤ ሄሳ ጊሻስ ታ ባና ኦጌ ታና ታማርሳ።

9ኣቤት ጎዳዉ! ታ ኔ ጋርሳን ቆቴታዲስ፤ ታና ታ ሞርኬታፔ ኣሻ።

10ኔኒ ታ ጾሳ፤ ታኒ ኔ ሼኔ ፖላና ማላ ታና ታማርሳ፤ ኔ ሎኦ ኣያናይ ታና ሱሬ ኦጌ ካሌ።

11ኣቤት ጎዳዉ! ኔ ሱን ጊሻስ ታና ኣሻ፤ ኔ ጺሎቴን ታና ሜቶፔ ኬሳ።

12ኔ ታና ሲቂዛ ጊሻስ ታ ሞርኬታ ሱፑ ሂስታ ዎ፤ ታና ኔ ኣይሌዛ ኡንኤዛይታ ዲፒ ሂስታ ይሳ።

← Chapter 142 Chapter 144 →