Psalms 106

Amharic Gamo (ጋሞ ማጻፋ)

1ጎዳ ጋላቲቴ! ኢዚ ኪያ ጊዲዳ ጊሻስ፥ ኢዛ ሲቆይካ ሜርናስ ጊዲዳ ጊሻስ ጎዳ ጋላቲቴ።

2ጎዳይ ኦዳ ዎልቃማ ኦሶ ዮታናስ፥ ዎይኮ ኢዛ ጋላታ ኡባ ቆንጪሳናስ ዳንዳይዛይ ኦኔ?

3ፒርዳይ ጌላቶንታ ማላ ናጊዛይቲኔ ኡባ ዎዴ ጺሎ ኦዛይቲ ኣንጄቲዳይታ።

4ኣቤት ጎዳዉ! ኔኒ ኔ ኣሳ ማዲዛ ዎዴ ታና ቆፓ፤ ኢስታ ኔኒ ኣሺዛ ዎዴ ታናካ ኣላ።

5ሄሲካ ኔ ዶሪዳ ኣሳስ ሳኣይ ኪዪን ታኒ ቤያና ማላ፥ ኔ ኣሳ ኡፋይሳ ታኒ ኡፋዬታና ማላ፥ ኔ ናይቲ ቦንቼቲዳ ጋሶን ታኒካ ኡፋይሳን ማጉላና ማላሳ።

6ኑኒ ኑ ኣዋታ ማላ ናጋራ ኦዶስ፤ ሞሮኔ ኢታ ኦዶስ።

7ኑ ኣዋቲ ጊብጼን ዴኢዛ ዎዴ፥ ኔ ማላሊሲዛ ኦሶ ቆፒቤቴና። ኔ ሲቆ ዳሮቴ ኢስቲ ኣኬኪቤቴና፤ ዞኦ ኣባ ላንቄን ማካሊዳ።

8ጊዲኮካ ኢዚ ባ ሱን ጊሻስ፥ ባ ጊታ ዎልቃ ኤሪሳናስ ኢስታ ኣሺዴስ።

9ኢዚ ዞኦ ኣባ ሴሪዴስ፤ ኣባይካ ሜሊዴስ፤ ባዞን ካሌዛይሳ ማላ ጪማ ጊዶራ ኢስታ ካሌዲ ፒንዴስ።

10ኢዚ ኢስታ ኢጺዛይታ ኩሼፔ ኣሺዴስ፤ ሞርኬታ ኩሼፔ ኢስታ ዎዚዴስ።

11ኢስታ ሞርኬታ ሃ ሚቲዴስ፤ ኢስታፌ ኢሶይካ ኣቲቤና።

12ሄ ዎዴ ኢስራኤሌቲ ኢዛ ቃላ ኣማኒዳ፤ ኢዛ ዬን ሳቢዳ።

13ጊዲኮካ ኢስቲ ኢዚ ኦይሳ ሄራካ ዶጊዳ። ኢዛ ዞሬ ናጎንታ ባንቲ ኮዪዳይሳ ኦዳ።

14ኢስቲ ባዞ ቢታን ኬሂ ኣሞቲዳ፤ ቃሴ ሜላ ቢታንካ ጾሳ ፓጪዳ።

15ሄሳ ጊሻስ ኢዚ ኢስቲ ዎሲዳይሳ ኢሚዴስ፤ ጊዶ ኣቲን ኢስታ ሼምፖስ ጊልቃቴ ኪቲዴስ።

16ኣሳቲ ባዞን ዱንካኒ ዲሼ ሙሴኔ ጎዳስ ዱማቲዳ ኣይሌ ኣሮኔ ቃናቲዳ ዎዴ፥

17ቢታይ ዶዬቲዲ ዳታኔ ሚቲዴስ፤ ኣብራሜ ኢዛ ኬ ኣሳታራ ሞጊዴስ።

18ቃሴ ኢስታ ማባራ ጊዶን ታማይ ኤጺን፥ ላጮይ ሄ ኢታ ኣሳታ ጹጊዴስ።

19ኮሬቤ ዙማን ዴኢሼ ዎርቃ ሴሪሲዲ ማራ ሚስሌ ሜዳ፤ ሂስቲዲ ሄ ሚሲላስ ጎይኒዳ።

20ኢስቲ ባንታ ቦንቾ ጾሳ ማታ ሚዛ ሚዛ ሚስሌን ላሚዳ።

21ኢስቲ ባንታና ኣሺዳ ጾሳ ዶጊዳ፤ ኢዚ ጊብጼን ጊታ ኦሶ፥

22ካሜ ቢታንካ ማላሊሲዛይሳኔ ዞኦ ኣባን፥ «ሆላ!» ጊሲዛይሳ ኦዳይሳ ዶጊዳ።

23ሄሳ ጊሻስ ጾሲ ኢስታ ይሳና ጊዴስ፤ ጊዶ ኣቲን ይሶንታ ማላ ኢዛ ሃንቆዛ ዛራናስ ጾሲ ዶሪዳ ሙሴይ ጊዶን ኤቂዴስ።

24ሄ ሎኦ ቢታዮ ካዳ፤ ሄሳፌ ጉዬ ኢዛ ቃላን ኣማኔቲቤቴና።

25ኢስቲ ባንታ ዱንካኔዛ ጊዶን ዙዙሚዳኔ ጎዳ ቃላስ ኣዛዜቶንታ ኢጺዳ።

26ሄሳ ጊሻስ ኢስቲ ባዞን ኩንዲ ያና ማላ፥ ኢዚ ባ ኩሼ ዴንዲ ጫቂዴስ።

27ኢስታ ዜሬቲ ካዎቴታ ጊዶን ኦሌታናይሳኔ ኢስቲ ቢታ ጋጻ ጋካናስ ላሌታናይሳ ዮቲዴስ።

28ሄሳፌ ጉዬ ኢስቲ ባኣሊ-ፔኦሬን ዲዛ ኤቃስ ጎይኒዛይታራ ኢሲፌ ጋይቲዳ፤ ሼምፖይ ባይንዳ ኤቃታስ ያርሼቲዳ ያርሾዛ ሚዳ።

29ኢስቲ ባንታ ኦሶን ጎዳ ሃንቄዳ፤ ሂስቲን ኢስታ ጊዶን ኢታ ሃርጌይ ዎዴስ።

30ጊዶ ኣቲን ፊኒሃሲ ዴንዲዲ ኢስታ ሞሮዛ ፒርዲን ኢታ ሃርጌይ ኢስታ ቦላፌ ኪቺዴስ።

31ሄሲካ ዬሌታፔ ዬሌታ ጋካናስ ሜርናስ ኢዛስ ጺሎቴ ጊዲዲ ቆዴቲዴስ።

32ማሪባ ፑልቶ ማታን ጎዳ ሃንቄዳ፤ ኢስታ ጋሶን ሙሴ ቦላ ሜቶይ ጋኪዴስ።

33ኣይስ ጊኮ ኢስቲ ሙሴ ዪሎሲዳ፤ ሂስቲን ኢዛ ዶናፔ ቤሶንታ ቃላይ ኬኢዴስ።

34ጎዳይ ይሲቴ ጊን ኢስቲ ካናኔ ኣሳታ ይሲቤቴና።

35ሄ ፓላፔ ኢስቲ ሄ ካዎቴታራ ጌሌቲ ኤኬቲዲ ዋላኬቲዳኔ ኢስታ ዴኦ ዎጋ ካሊዳ።

36ጾሳ ኣሳቲ ኢስታ ኤቃስ ጎይኒዳ፤ ሄሲካ ኢስታስ ዎጺማዴ ጊዲዴስ።

37ኢስቲ ባንታ ኣቱማኔ ማጫ ናይታ ዳይዳንታስ ያርሺዳ።

38ኢስቲ ጺሎ ሱ ካናኔ ኤቃታስ ያርሺዳ፤ ባንታ ኣቱማኔ ማጫ ናይታ ሱ ጉሲዳ፤ ሄ ሱን ቢታይ ቱኒዴስ።

39ሄሳ ኢስቲ ባንታ ኦሶን ቱኒዳኔ ላይማ ማጫሳ ማላ ባንታ ጾሳስ ኣማኔቶንታ ኢጺዳ።

40ሄሳ ጊሻስ ጎዳ ሃንቆይ ኢዛ ኣሳ ቦላ ኤጺ ኬኢዴስ፤ ኢዚ ባይታ ሃራሴቲዴስ።

41ኢዚ ኢስታ ሃራ ካዎቴታ ኩሼን ኣ ኢሚዴስ፤ ኢስታ ሞርኬቲ ኢስታ ሃሪዳ።

42ኢስታ ሞርኬቲ ኢስታ ናቂዳኔ ባንታ ሼኔን ኣይሲዳ።

43ኢዚ ኢስታ ዳሮቶ ኣሺዴስ፤ ጊዶ ኣቲን ኢስታ ማካላስ ጊጺ ኬዚዳ፤ ባንታ ናጋራ ጋሶን ይዳ።

44ጊዲኮካ ኢስቲ ዋሲዳ ዋሶዛ ሲዪዲ ኢስታ ዋዬዛ ቆፒዴስ።

45ኢስታ ጊሻስ ባ ጫቆ ቃላ ሃሳኢዴስ፤ ኣጎንታ ባ ሲቆ ዳሮን ኢስታ ማሪዴስ።

46ኢስታ ዲኢዳ ኡባይ ኢስታስ ቃታና ማላ ኦዴስ።

47ኣቤት ጎዳዉ ኑ ጾሳዉ! ኑና ኣሻ። ኑኒ ኔ ጌሻ ሱን ጋላታና ማላ ካዎቴታ ጊዶፌ ኑና ሺሻ።

48ጎዳይ፥ ኢስራኤሌ ጾሲ ሜርናፔ ሜርና ጋካናስ ጋላቴቶ! ኣሳይ ኡባይ፥ «ኣሚን» ጎ። ጎዳ ጋላቲቴ!

← Chapter 105 Chapter 107 →