Psalms 105

Amharic Gamo (ጋሞ ማጻፋ)

1ጎዳ ጋላቲቴ፤ ኢዛ ሱን ጼይጊቴ፤ ኢዚ ኦዳ ኦሶታ ካዎቴታ ኤሪሲቴ።

2ኢዛስ ጊንጾ ጊግሲቴ፤ ጋላታ ዬካ ዬጺቴ፤ ማላሊሲዛ ኢዛ ኦሶ ኡባ ዮቲቴ።

3ጌሻ ሱንን ኢዛይሳን ጬቄቲቴ፤ ጎዳ ኮይዛይታ ዎዚናይ ኡፋዬቶ።

4ጎዳኔ ኢዛ ዎልቃ ጾሞሲቴ፤ ኡባቶ ኢዛ ሲን ኮዪቴ።

5ኢንቴኖ ኢዛ ኣይሌ ኣብራሃሜ ዜሬቶ! ዶሬቲዳ ያቆቤ ናይቶ! ኢዚ ኦዳ ማላሊሲዛ ኦሶታ፥ ኢዛ ማላታኔ ኢዚ ፒርዲዳ ፒርዳ ኣኬኪቴ።

7ኢዚ ጎዳ ኑ ጾሳ፤ ኢዛ ሱሬ ፒርዳይካ ሳኣ ኡባ ቦላ ዴስ።

8ኢዚ ባ ጫቆ ቃላ ሜርናስ ባ ኣዛዚዳ ቃላ ሺ ዬሌታ ጋካናስ ናጌስ።

9ኢዚ ኣብራሃሜስ ጫቂዳ ጫቆ ቃላ፥ ዪሳቃስ ኢሚዳ ቃላ ባሌና።

10ሄሳ ያቆቤስ ዎጋ፥ ኢስራኤሌሲካ ሜርና ጫቆ ቃላ ሂስቲዲ ሚን ኤሲዴስ።

11ቃሴካ፥ «ኔስ ካናኔ ቢታ ኢማና፤ ኢዚካ ኔ ዜሬታስ ላታ ጊዳና» ጊዴስ።

12ኢስቲ ቆዳን ቂ ጉታኔ ካናኔ ቢታን ቤቴ ጊዲዲ ዲዛ ዎዴ፥

13ኢሲ ዴሬፔ ሃራ ዴሬ፥ ኢሲ ካዎቴፌ ሃራ ካዎቴ ዩዪዳ።

14ጾሲ ኢስታ ኦኒካ ቆሃናስ ኢሚቤና፤ ኢስታ ጊሻስ ካዎታ ሴሪሼ፥

15«ታኒ ቲይዳይታ ቦቾፍቴ፤ ናቤታ ቆሆፒቴ» ጊዴስ።

16ጎዳይ ቢታ ቦላ ኮሻ ዬዲዴስ። ኢስታ ካ ኡባ ይሲዴስ።

17ጊዶ ኣቲን ኢዚ ባ ኣሳ ኣሻናስ ኢስታፌ ሲንን ኣይሌቴስ ባይዜቲዳ ዮሴፌ ኪቲዴስ።

18ኢዛ ቶሆቲ ካቴናን ዋጼቲዳ፤ ኢዚ ሳንሳላታን ቃሼቲዴስ።

19ኢዚ ካሴ ዮቲዳይሲ ፖሌታና ጋካናስ ጎዳ ቃላይ ኢዛ ፓጪዴስ።

20ካዎይ ኣስ ኪቲዲ ኢዛ ቢርሺሲዴስ፤ ዴራ ሃሪዛይሲ ቃሾ ኬፌ ኬሲዴስ።

21ካዎዚ ኢዛ ባ ኬስ ጎዳ ኦዴስ፤ ባስ ዲዛ ኡባ ኣቆታ ቦላ ሹሚዴስ።

22ሄሲካ ሹሜታ ማራራ ካሌና ማላኔ ጊታ ኣሳታ ኣ ኤራቴ ታማርሳና ማላ ሱንዴስ።

23ሄሳፌ ጉዬ ኢስራኤሌይ ጊብጼ ጌሊዴስ፤ ያቆቤይ ካሜ ቢታን ቤቴ ኣስ ጊዲዲ ዴኢዴስ።

24ጎዳይ ባ ኣሳ ኬሂ ጮራሲዴስ፤ ኢስታ ሞርኬታፔ ኢስታ ኣ ሚንዴስ።

25ኢዚ ጊብጼ ኣሳይ ባ ኣሳ ኢጻና ማላኔ ባ ኣይሌታ ቦላ ዴንዳና ማላ ኦዴስ።

26ሄሳፌ ጉዬ ባ ኣይሌ ሙሴኔ ባ ዶሪዳ ኣሮኔ ኢስታኮ ኪቲዴስ።

27ኢስቲ ጊብጼ ኣሳታ ሲንን ጾሳ ማላታ፥ ካሜ ቢታን ማላሊሲዛ ሚሽ ኦዳ።

28ጎዳይ ማ ኪቲዲ ሄ ቢታ ሚሲዴስ፤ ጊዶ ኣቲን ጊብጼ ኣሳቲ ኢዛ ኣዛዞ ኢጺስ ጊዳ።

29ኢስታ ሃ ሱን ላሚዲ ሞሌታ ዎዴስ።

30ኢስታ ቢታ ኡባ ካዎዛ ኬካ ሾይ ኩሚዴስ።

31ኢዚ ኣዛዚን ቦጼይኔ ኡኤይ ኢስታ ቢታ ኡባ ቦላ ሾምኡሾምኢዴስ።

32ኢስታ ቢታ ቦላን ኢራ ጊሻስ ሻች ዎልቃንራ ቡኪሲዴስ።

33ኢዚ ኢስታ ዎይኔ ቱራኔ ባላሴ ሚ ኡባ ዲፒ ሂስቲዴስ፤ ኢስታ ቢታን ዴኢዛ ሚታካ ሜንሬዴስ።

34ኢዚ ኣዛዚን ቦሌይኔ ቆዳይ ባይንዳ ጉምባሮይ ኬዚዴስ።

35ሂስቲዲ ኢስታ ጋዴን ሞኪዳ ካ ኡባ ሚዴስ፤ ኢስታ ቢታን ዲዛ ጪሊላ ሚሽ ኡባካ ዲፒ ሂስቲዴስ።

36ጎዳይ ጊብጼ ዴሬን ባይራታ ኡባ ዎዴስ፤ ኮይሮ ዬሌቲዳ ናይታ ኡባካ ይሲዴስ።

37ሄሳፌ ጉዬ ኢዚ ኢስራኤሌ ኣሳ ዎርቃኔ ቢራ ኣሌቆራ ኬሲዴስ፤ ኢስታ ጊዶፌ ኩንዲዲ ኣቲዳይ ኦኒኔ ባዋ።

38ጊብጼ ኣሳቲ ኢስታስ ዳሮ ያዪዳ ጊሻስ ኢስቲ ኬዚ ቢሺን ኡፋዬቲዳ።

39ጾሳይ ኢስታ ካማናስ ሻራ ሚጪዴስ፤ ኦማርስ ኢስታስ ፖኢሳናዉ ታማ ጊግሲዴስ።

40ኢስቲ ሚዛ ሚሽ ኦይቺን ኩራቾ ሚሳቲዛ ካፎታ ኢስታስ ዬዲዴስ፤ ኢስታ ሳሎ ቁማ ካሊሲዴስ።

41ኢዚ ዛላ ጳልቂን ሃ ፑልቲዴስ፤ ሻፋ ማላካ ዱጌ ባዞ ጎጊዴስ።

42ኢዚ ባ ኣይሌ ኣብራሃሜስ ጫቂዳ ጌሻ ቃላ ሃሳኢዴስ።

43ኢዚ ባ ኣሳ ኡፋይሳን፥ ባ ዶሪዳይታ ኢሊሊሳን ኬሲዴስ።

44ኢዚ ኢስታስ ሃራ ካዎቴታ ቢታ ኢሚዴስ፤ ሂስቲን ኢስቲ ሃራቲ ዳቡሪ ኬሲዳ ካ ኣይፌ ላቲዳ።

45ሄሳ ኢዚ ኦዳይ ኢስቲ ኢዚ ዎዳ ማራ ናጋናሳ፤ ኢዛ ዎጋካ ፖላናሳ። ጎዳ ጋላቲቴ!

← Chapter 104 Chapter 106 →