Proverbs 18

Amharic Gamo (ጋሞ ማጻፋ)

1ላጌቴ ኮዮንታ ኣሲ ባ ኣሞ ካሌስ፤ ሱሬ ፒርዳካ ኡባ ፓልቄስ።

2ኤያይ ባ ቆፋ ቆንጪሳናሮ ጻላ ዶሴስ፤ ጊዶ ኣቲን ሃራ ኣሳፔ ኤራ ኤካናስ ዶሴና።

3ኢታቴ ካ ካሌስ፤ ዬላቴ ዪሺን ካዉሻቴ ዬስ።

4ኣሳ ዶናፔ ኬኢዛ ሃሳያይ ጪማ ሃ ማላ፤ ኣ ኤራቴ ፑልቶይካ ጾንጌቲዛ ፒሳ ሃ ማላ።

5ኢታ ኣስ ማዲዲ፥ ጺሎዛ ፒርዳ ጌላሲዛይሲ ሎኦ ጊዴና።

6ኤያ ኣሳ ዶናይ ኢዛ ቦላ ኦሽ ዴንስ፤ ኢዛ ዶናፔ ኬኢዛ ቃላይ ኢዛ ቦላ ዱርቃ ጼይጌስ።

7ኤያ ኣሳ ሃሳያይ ኢዛ ይሴስ፤ ኢዛ ሜቴርሻቲ ኢዛስ ዎጺማዴ ጊዴቴስ።

8ዚጊራንቻ ቃላይ ማልኦ ቁማ ማላ፤ ኣሳስ ዱጌ ማራጬ ጋኬስ።

9ኣዛላ ኣሲ ይሲዛ ኣሳስ ኢሻ።

10ጎዳ ሱን ሚኖ ጊምቤ ማላ፤ ጺሎ ኣሲ ሄ ዎጺዲ ኢታፔ ኣቴስ።

11ዱሬታ ዱሬቴ ኢስታስ ዩሾይ ጊምቤቲዳ ካታማ ማላ፤ ኢስቲ ባንታ ዱሬቴ ኬኤቶንታ ኣዱሳ ጊምቤ ማላ ቆዴቴስ።

12ኣሲ ኩንዳናፔ ካሴ ኢዛ ዎዚናይ ኦቶሬቴስ፤ ኣሽኬቴ ቦንቾፌ ሲንቴስ።

13ሎኤ ሲዮንታ ዲሼ ዛሮይ፥ ኢዛዴስ ኤያቴኔ ዬላ ጊዴስ።

14ኣሳ ኣያናይ ሃርጌ ዳንዳያና ማላ ማዴስ፤ ጊዶ ኣቲን ኣያናይ ሜቄሬቲቺኮ ኢዛ ኦኒ ዳንዳያኔ?

15ኣኬካንቻ ዎዚናይ ኤራቴ ኮዬስ፤ ኣ ኤራንቻ ሃይ ሚን ኮዬስ።

16ኢሞታይ ኢሚዛዴስ ኦጌ ዶዬስ፤ ኢዛ ጊታ ኣሳታራካ ኤሪሴስ።

17ባልጋራይ ዪዲ ባ ቃላ ኢማና ጋካናስ ካሴቲዲ ዮኦ ሃሳይዳዴይ ጺሎ ሚሳቴስ።

18ሳማ ዬሲ ፓላማ ቴቄስ፤ ናምኡ ዎልቃማ ባሊጋራታካ ሻኬስ።

19ቆሄቲዳ ኢሻይ ጊምቤቲዳ ካታማፔ ኣ ሚኔስ፤ ኢዛ ፓላማይካ ጊምቤ ፔንጌ ጎርዲዛ ሚኖ ኮላታ ማላ።

20ባ ዶናን ሃሳይዳዛፔ ኣሲ ባ ኡሎ ኩንስ፤ ባ ኢንጻርሳፌ ኬኢዳ ዮኦን ካሌስ።

21ኢንጻርሳ ቦላ ሃይቆይኔ ዴኦ ዎልቃይ ዴስ፤ ኢዞ ዶሲዛይቲ ኢዚ ኣይፌ ሜቴስ።

22ማቾ ዴሚዳ ኣሲ ሎኦ ሚሽ ዴሜስ፤ ሄሳዴይ ጎዳፔ ቦንቾ ኤኬስ።

23ሂዬሳ ኣሲ ኣዳሺዲ ሃሳዬስ፤ ጊዶ ኣቲን ዱሬይ ቺዲ ዛሬስ።

24ላጌ ዳርሲዛ ኣሲ ባስ ሜቶ ዳሪሴስ፤ ጊዶ ኣቲን ኢሻፔ ኣዲ ኣማኔቲዛ ላጌይ ዴስ።

← Chapter 17 Chapter 19 →