Proverbs 17

Amharic Gamo (ጋሞ ማጻፋ)

1ኦሺ ዴኢዛሶን ዴኢዛ ጊታ ጊቢራ ማናፔ ሳሮይኔ ዎፓይ ዴኢዛሶን ኡኬ ሜላ ሜ ኪያ።

2ኣኬካንቻ ኣይሌስ ሹፉሮ ጊዲዳ ባ ጎዳ ና ቦላ ማታይ ዴስ፤ ሂስቲዲ ኢሻንታ ማላ ኢስታራ ኢሲፌ ላቴስ።

3ዎርቃይኔ ቢራይ ታማን ፓጬቲዛይሳ ማላ ጎዳይ ኣሳ ዎዚና ፒልጊ ጼሌስ።

4ኢታ ኣሲ ኢታ ሃሳያ ሲዬስ፤ ዎርዳንቻይካ ጌናንቻ ሃሳያ ኤዝጌስ።

5ሂዬሳታ ቦላ ቂልጪዛ ኣሲ ኢስታ ሜዳይሳ ጫዬስ፤ ሃራ ኣስ ጋኪዛ ሜቶን ኡፋዬቲዛ ኣሲ ቃጻዬቶንታ ኣቴና።

6ናይታ ናይቲ ጪሚዳ ኣሳታስ ካላቻ፤ ዬሊዳይቲ ባንታ ናይታስ ቦንቾ።

7ሎኦ ሃሳያይ ኤያስ ጊጌና፤ ዎርዶ ሃሳያይ ዴሬ ኣይሲዛዴስ ኣይ ማላ ዴጾ!

8ማታኤይ ኢሚዛዴስ ቢታ ማላ፤ ኢዚ ቢዳ ሶሆ ኡባን ኢዛስ ኢንጄታና ሚሳቴስ።

9ቆሄቲዲ ባ ቆሆዛ ጌንዛ ኣሲ ሲቆ ኮዬስ፤ ጊዶ ኣቲን ዮኦ ዛሪ ዛሪዲ ፒቂዛ ኣሲ ኣማኔቲዛ ላጌታ ሻኬስ።

10ኤያይ ጼቱቶ ሊሶን ሾጪን ኤሪዛይሳፌ ኣኬካይ ዴኢዛ ኣሲ ጮ ሴሪን ኤሪዛይሲ ኣስ።

11ኢታ ኣሲ ማካላ ሚሽ ጻላ ኮዬስ፤ ሄሳ ጊሻስ ኢዛ ቦላ ሜንጼ ኢታ ኣሲ ኪቴታና።

12ኤያ ኣሳራ ኢዛ ኤያቴ ማላ ጋይታናፔ ማራታ ቦንቂ ኤኪቺዳ ማሄይራ ጋይቴ ኪያ።

13ሎኦ ኦዳዴስ ኢታ ዛሪዛዴሶፔ ኢታይ ሙሌካ ዬና።

14ኦሽ ዶሜ ኤሌ ሃ ፖጊ ዬዶ ማላ፤ ሄሳ ጊሻስ ኦሺ ሜታናፔ ካሴታዳ ኪቻይቻ።

15ዎርዳንቻ ጺሎ ጺሎዛ ዎርዶ ጉሲ ናምኣይካ ጎዳ ሲንን ኢጼቲዳ ኦሶ።

16ኣ ኤራቴ ዴማናስ ኢዚ ኮዮንታ ጊሻስ ኤያ ኩሼን ጌሊዳ ሚሽ ኢዛ ኣይ ጎኣኔ?

17ላጌይ ኣይ ዎዴካ ላጌ፤ ኢሻይካ ሜቶ ዎዴስ ዬሌቴስ።

18ኣኬካይ ፓጪዳ ኣሲ ባቂ ጫቂዲ ሃራ ኣሳስ ዋሴ ጌሌስ።

19ኦሽ ዶሲዛ ኣሲ ናጋራ ዶሴስ፤ ኡባቶ ባና ቁ ሂስቲዛዴይ ባ ቦላ ባሽ ጼይጌስ።

20ጌላ ቆፋይ ዴኢዛዴስ ኢንጄቴና፤ ዎርዶ ሃሳይዛ ኣሲካ ሜቶን ጌሌስ።

21ኤያ ና ዬሎይ ጬጪሴስ፤ ኤያ ና ኣዋስ ኡፋይሲ ዴና።

22ኡፋዬቲዛ ዎዚናይ ሎኦ ሌ፤ ጊዶ ኣቲን ሜቂዳ ዎዚናይ ኣሳስ ዎልቃ ይሴስ።

23ኢታ ኣሲ ፒርዳ ጌላሳናስ ጌማን ማታኤ ኤኬስ።

24ኣኬካይ ዴኢዛ ኣሲ ኣ ኤራቴ ባ ሲንፌ ይሴና፤ ጊዶ ኣቲን ኤያ ኣይፌይ ሳኣ ጋጻ ጋካናስ ዩዬስ።

25ኤያ ናይ ባ ኣዋ ጬጪሴስ፤ ባና ዬሊዳ ኣዮካ ጹጌስ።

26ጺሎ ኣስ ቃጻዮ ቤሴና፤ ሱሬ ኣስ ሾጮይ ሎኦ ጊዴና።

27ኣማርዳ ቃላ ሃሳይዛ ኣሲ ኣ ኤራንቻ፤ ዎፓ ኣያናይ ዴኢዛ ኣሲካ ኣኬካንቻ።

28ኤያ ኣሲ ጮኡ ጊኮ ኣ ኤራንቻ ሚሳቴስ፤ ባ ዶናካ ሺሺ ኦይኪኮ ኣኬካንቻ ሚሳቴስ።

← Chapter 16 Chapter 18 →