Psalms 90

Amharic Gamo (Geeshsha Maxaafa)

1Godawu! Neni nuus yeletappe yeleta gakkanaas shiiqi attizaso gidadasa.

2Zumati medhettanaappe kase, woykko neni sa7a ooththanaappe kase mernaappe mernaa gakkanaasi neni Xoossa.

3Neni asa nayta, «Asa naytoo! Guye biittan simmite» gaada istti medhettida biittan guye zaaraasa.

4Shii layththi nees aadhdhida issi gallassa mala; woykko omarsafe issi saate mala.

5As qoppontta efiza di7o mala ne efishin, istti agumo mala aadhdhana; maalado maalado mokkiza maata mala cilileettes.

6Maatay maalado diccidi ciiyees; omarsa wode gidikko shullidi melees.

7Nuni ne qanggeththan wuridos; ne hanqo suulen dagammidos.

8Neni nu iita ooso ne sinththan woththadasa; qasse nu genththida nagara ne sinththa poo7okko aaththadasa.

9Nu wode ubbay ne hanqon aadhdhides; nu layththaaka oolen wursoos.

10Nu daana layththay laappun tamma; dares giikko osppun tamma; heytikka metoninne ceecen kumida; nu layththay eeson aadhdhees; nunikka eeson baana.

11Ne hanqoza wolqqa oonee erizay? ne hanqo seelay yashshees.

12Nu layththa maarara nu go7ettana mala nuna aadho erateth tamaarsa.

13Abeet GODAWU! Ne hanqoy awude gakkana gam7anee? Simma! Ne aylletas qadhetta!

14Nu layththa ubbaan nuni ufayettana malanne yexxana mala maalado maalado ne siiqon nuna kalssa.

15Neni nuna metoththida gallassata keenanne nuni tugga be7ida layththata likke nuna ufayssa.

16Nuus ne aylletas ne oosoy qoncco; ne bonchchoy nu naytas beetto.

17Abeet GODAWU! Nu Xoossawu! Ne kiyateththi nunara gido; nu ooththiza ubbaa nuus injjesa; ero! Nu ooththiza ubbaa nuus injjesa.

← Chapter 89 Chapter 91 →