Psalms 74

Amharic Gamo (Geeshsha Maxaafa)

1Abeet Xoossawu! Neni nuna mernaas ays yegga aggadii? Heenththasohon diza dorsata bolla ne hanqoy ays suullidee?

2Beni neni doorida ne deraa nees buzo histta wozzida zareta hassa7a; neni de7ida Xiyoone Zuma qoppa.

3Ane laalettida Xoossa Keeththaza yuuya xeella; Morkketi izan diza ubbaa miish dhayssida.

4Ne morkketi ne soon, «Nuni xoonidos» giidi gerereettes. Xoono malata giidi bantta bandira essida.

5Istti wora giddon mith qanxxanawu bantta kaltta dhoqqu histti oykkida as misatida.

6Hiillanchchati ooththida alleqota kalttaninne madooshan menththereththi yeggida.

7Xoossa Keeththaa taman xuuggidi dhayssida; ne xeygettizasoza tunisida.

8Istti bantta wozinan, «Istta nuni mulera un7eththana» giidi qoppida; Deraan Xoossi goynettizasohota ubbaa taman xuuggida.

9Nu shaakki eranaas malatay deenna; hayssafe guye nabey dendenna; Hayssi awude gakkanawu hananaakko eriza asi nu giddon deenna.

10Abeet Xoossawu! Ne morkketi awude gakkanawu ne bolla qilccanee? Istti ne sunththa mernaas kadhishe daanee?

11Ne kusheza miccada ays istta dhayssikii? Ne ushachcha kusheza ays shophpha garsan lokkoma uttadii?

12Abeet Xoossawu! Benippeka ta kawoy nena; neni biitta bolla atoteth ehadasa.

13Ne gita wolqqan abba shaakkadasa; iza giddon diza miimintteta hu7e qoo7ereththadasa.

14Lewataane geetettiza miimintte hu7eta dinccadasa; iza asho bazzon diza medhetatas quma ooththa immaasa.

15Neni pulttotanne kanchcheta doya yeddadasa; ubba wode goggiza shaafata qasse melissadasa.

16Gallassay neessa; qammayka neessa; qasse arshenne agina istti dizason minththa woththiday nena.

17Biittas zawa woththiday, balgonne bone medhdhiday nena.

18Abeet GODAWU! Ne morkketi ne bolla wostti qilccidaakko, qasse eeya asati ne sunththaa wostti kadhidaakko qoppa.

19Nees haarettizayta shemppo wora do7atas aaththa immofa; metotida ne deraa mernaas dogoppa.

20Biittan diza dhuma sohoti ubbay makkallanchchatan kumida gishshas neni nuus caaqqida caaqo qaala qoppa.

21Naaqettidayti yeellati simmofetto; manqotinne metotidayti ne sunththa galatetto.

22Abeet Xoossawu! Denda! Neni ne sunththas mootetta; eeyati gallas ubbaan nena kadhizayssa qoppa.

23Ne morkketi ne bolla waassiza waasoza, nena ixxizayti ne bolla ceeqettiza ceeqeteththaanne istta wocama dogoppa.

← Chapter 73 Chapter 75 →