Psalms 73

Amharic Gamo (Geeshsha Maxaafa)

1Wozina geesh gidida Isra7eele asaas Xoossi ay mala kiya!

2Gido attiin ta tohoy dhuphettiin ta kundaychchada guuththason attadis.

3Ays giikko iita asatanne makkallanchchata dureteththaa be7ada tanikka istta mala hananaas amottadis.

4Isttas tuggay deenna; istta asateththay payyanne mino.

5Istti hara asay tuggatiza mala tuggatettenna; hara asa malakka metoti erettenna.

6Hessa gishshas istti otoreteth alleqo mala qoodhen aaththeettes; makkallateth afala mala may7eettes.

7Istta wozinappe iita qofay pulttees; bantta ayfe kessi dereqeettes.

8Istti qidheettessinne iita haasayeettes; istti bantta otoron harata un7eththanawu mandeettes.

9Istti salon diza Xoossaa bantta doonan cayeettes; Sa7an de7iza asaa bantta inxarsan dukkeettes.

10Hessa gishshas dere ubbay isttako goochchees; istti yootizayssaka ubbaa eeson ammaneettes.

11Istti, «Xoossi ay erizee? Ubbaafe Dhoqqa Xoossas erateththi dizee?» geettes.

12Hekko iitati hayssa misateettes; istti ubbato wudu gonttayta; dureteththi qoodhe gakkidayta.

13Histtiin tani wozina geeshshateththan naagidayssi tana ay maaddidee! Ta kushe ta xilloteththan meeccidayssi coo tana dhallibeenna.

14Gallas kumeth tani meto beyadis; wontiin wontiin tani qaxxayettadis.

15Tani istti haasayzayssa mala haasayana qoppidaakko ne deraas ta ammanettontta as gidana.

16Tani ha yo7oza shaakka eranaas qoppadis gido attiin ta erappe bolla gidides.

17Hessika tani Xoossa Geeshshasoho gelana gakkanaassinne iitata wurseththa be7ana gakkanaassa.

18Addaka ne istta hallixizaason woththadasa; neni istta duge bashshaso yeddadasa.

19Istti hassa7ontta eeson dhayda; dagaman issoyka attontta dippi gida.

20Abeet Godawu! Neni dendiza wode asi dhiskofe beeggiin dhayza agumo mala istti dhayana.

21Tani yiillotida wodenne ta wozinaykka madunxida wode,

22tani qofay baynda dammadis; tani ne sinththan miiza mala gidadis.

23Gido attiin tani ubbatokka nenara days; ta ushachcha kushezakka neni oykkadasa.

24Ne zoren tana kaaleththadasa; hessafe guye neni tana bonchchos efana.

25Salon neeppe attiin taas haray ooni dizee? Sa7ankka neeppe hara oonakka koykke.

26Ta wolqqaynne ta wozinay daaburanaas dandayees; gido attiin Xoossi ta wozinas minoteththinne taas mernaa qaada.

27Neeppe haakkizayti dhayana; nees ammanettonttayta ubbaa neni dhayssana.

28Gido attiin taas Xoossako shiiqoy lo7o; ne ooso ubbaa yootana mala. Tani Ubbaa Haariza GODAA ta baqata attizaso ooththadis.

← Chapter 72 Chapter 74 →