Psalms 81

Amharic Dawro DFBLVL (Geeshsha Mas'aafaa)

1Nuw wolk'k'aa gidiyaa S'oossaw, hintte k'aalaa d'ok'k'u ootsiide yes's'ite; Yaak'ooba S'oossaa sabbite.

2Yetsaa doommite; karabuwaa bak'k'ite; diitsaaninne maasink'k'uwaan lo"a yetsaa sissite.

3Aginay s'eeriya wodenne, aginay doyssiyaa wode baalaa gallassan malakataa punnite.

4Hawe Israa'eeliyaw higgiyaa; Yaak'ooba S'oossaappe imetteedda woga.

5Gibs'e biittaa I shoc'eedda wode, Yooseefo asaw ha wogaa awaayeedda. Taani erenna kooshshaa hawaadan yaagiyaawaa sisaad.

6«Hintte hashiyaappe tookuwaa wotsaad; hintte kushiyaa s'uubiyaappe shemppissaad.

7Hintte metuwaa wode taana s'eeseeddita; hinttena ashshaad; taani guumiyaa shaariyaa giddon geemmeeddasaappe hinttena allaad. Mariiba giyaa pulttuwaa matan taani hinttena paac'c'aad.

8Ta asaw, taani hinttena seeriyaawaa sisite; ha"i Israa'eelatoo, hayzzeerikkite!

9Hintte giddon allaga s'oossi de'oppo; hara s'oossaw goyinnoppite.

10Taani, Med'inaa Godaa hintte S'oossaa, hinttena Gibs'e biittaappe kessaade aheeddawaa. Ne doonaa loytsa hangga; taani neena darssaade barssana.

11«Shin ta asatuu ta k'aalaa sisibeykkino; Israa'eelatuu taw azazettibeykkino.

12Hewaa diraw, taani unttunttu barenttu k'ofaa kaallana mala, eeno geena wozanaw aatsaade immaad.

13Ta Asay taana siseedentto, Israa'eelatuu ta ogiyaa kaalleedentto ayee de'ii!

14Taani unttunttu morkkiyaa elle s'oonana shin; unttunttu baaligaaraatuwaa bolla ta kushiyaa wotsana shin.

15Med'inaa Godaa is's'iyaawanttu Aa sintsan hokkana, unttunttu muruukka med'inaassa gidanawaa.

16Taani hinttena lo"o zarggaa mizana; k'ay eessaa, shuchchaa gonggoluwaappe kalissana» yaagee.

← Chapter 80 Chapter 82 →