Psalms 80

Amharic Dawro DFBLVL (Geeshsha Mas'aafaa)

1Abeet Israa'eeliyaa hentsanchchaw, Yooseefo asaa wudiyaadan kaaletsiyaawoo, Kiruubetuwaa giyaa kiitanchchatuwaappe, bollaanna de'iyaa araatan utteeddawoo, poo'a, neeni nuuna sisa.

2Efireema, Biiniyaamanne Minaase sintsan k'onc'c'a. Ne wolk'k'aa dentsaade nuuna ashshanaw haaya.

3Abeet S'oossaw, nuuna zaara; nuuni attanaadan, ne som"uwaa nuw poo'issa.

4Abeet Ubbaappe Wolk'k'aama Med'etaa Ubbaa Godaw, S'oossaw, ne asaa woosaa bolla awude gakkanaw hank'k'ettay?

5Neeni unttuntta yeekuwaa k'umaadan mizaadda; k'ay afotsaa haatsaadan ushshaadda.

6Nu shoorotuu nu biittaa akkanaw, barenttu gidon walak'ettanaadan ootsaadda; nu morkketuu nu bolla miic'c'eeddino.

7Abeet Ubbaappe Wolk'k'aama S'oossaw, nuuna zaara; nuuni attanaadan, ne som"uwaa nuw poo'issa.

8Neeni Gibs'eppe woyniyaa anuwaa ahaada; ayihuda gidena asatuwaa yederssaadda, unttunttu biittaan Aa tokkaadda.

9Neeni woraa butsaadda; yaatina, s'ap'uwaa yeddi daashiide, biittaa ubbaa gakkeedda.

10Deretuu Aa kuwan, Libaanoosa zigatuu Aa tashetuwaan kameteeddino.

11Bare tashetuwaa Meediteraane Abbaa gakkanaw, k'ay bare s'eeratuwaa Efiraas'iisa Shaafaa gakkanaw yeddeedda.

12Yaatina, ogiyaanna aad'd'iyaa ubbay, Aa ayifiyaa duutsanaadan, Aa yuushshuwaan de'iyaa gimbbiyaa ayaw kolaadii?

13Bazzuwaa guduntsay Aa bolla duriide bayzzee; k'ay gaden wos's'i k'aas's'iyaa med'etatuu ubbay Aa miino.

14Abeet Med'etaa Ubbaa S'oossaw, neeni nuukko simma. Saluwaana duge s'eellaade be'a; ha woyniyaa naaga.

15I ne ushechcha kushii tokkeedda s'ap'uwaa; neeni new gaade dichcheedda puutiyaa.

16Ne morkketuu ne woyniyaa butseeddino; taman s'uuggeeddino. Hewaa diraw, neeni unttuntta ne hank'k'uwaa suuluwaan d'ayissa.

17Ne kushii, ne ushechchan de'iyaa asaa, neeni new gaade dichcheedda asaa naago.

18Yaatooppe, nuuni neeppe guyye simmokko. Nuuna pas'a wotsa; ne suntsaa nuuni galatana.

19Abeet Ubbaappe Wolk'k'aama Med'inaa Godaa S'oossaw, nuuna zaara; nuuni attanaadan, ne som"uwaa nuw poo'issa.

← Chapter 79 Chapter 81 →