Psalms 5

Amharic Dawro DFBLVL (Geeshsha Mas'aafaa)

1Abeet Med'inaa Godaw, taani odiyaawaa hayzza; ta ooliyaanne sisa.

2Ta kaatiyawunne ta S'oossaw, Taana maadda gaade ta neekko waassiyiyaa diraw, ta woosaa sisa.

3Abeet Med'inaa Godaw, wontta wontta guuran neeni ta k'aalaa sisaasa. Wontta wontta guuran taani ta woosaa ne sintsa shiishshaade, neeni taw immiyaa zaaruwaa akkana gaade naagay.

4Neeni iitatetsan nashettena S'oossaa; iitabay neenana de'enna.

5C'eek'ettiyaawanttu ne sintsan ek'k'ikkino; iitabaa ootsiyaa ubbatuwaa neeni is's'aa.

6Wordduwaa haasayiyaawanttakka neeni d'ayissaasa. Suutsaa gussiyaawanttanne c'immiyaa asatuwaa, S'oossay shenetee.

7Shin taani ne maarotaa daruwaan ne golliyaa gelana. Ne Geeshsha Golliyaakko simmaade, new yashshatetsan goyinnana.

8Abeet Med'inaa Godaw, Taana ne s'illotetsan kaaletsa; ta morkkatuwaa diraw gaade, ne ogiyaa ta sintsan suurisa.

9Unttunttu doonaappe kesiyaawe ammantsenna. Unttunttu wozanaankka genii kumeedda; unttunttu doonay dooyetteedda duufuwaa mala; Unttunttu barenttu ins's'arssan c'immiino.

10Abeet S'oossaw, unttuntta neeni pirdda; unttunttu kobay unttuntta akki bo. Unttunttu nagaray daro gideedda diraw, neeni unttuntta yederssa; ayaw gooppe, unttunttu ne bolla makkaleeddino.

11Shin neekko bak'ati k'osetti attiyaa ubbay nashetino; unttunttu ubbaa gede nashshechchan yes's'ino. Neenikka unttuntta naagana; ne suntsaa siik'iyaa ubbatuu neenan loytsi nashetino.

12Ayaw gooppe, abeet Med'inaa Godaw, tumukka neeni s'illuwaa anjjaasa. Neeni gonddallii kammiyaawaadan ne keekkatetsan Aa kammaasa.

← Chapter 4 Chapter 6 →