Psalms 113

Amharic Dawro DFBLVL (Geeshsha Mas'aafaa)

1Med'inaa Godaa galatite! Hinttenoo Med'inaa Godaa k'oomatoo, Med'inaa Godaa suntsaa galatite!

2Med'inaa Godaa suntsay hachcheppe med'inaa gakkanaw galatetto!

3Away doliyaasaappe biide wulliyaasaa gakkanawukka Med'inaa Godaa suntsay galatetto!

4Med'inaa Goday kawutetsaa ubbaappe bollaanna mooddiyaawaa; Aa bonchchuukka salotuwaappe d'ok'k'iyaawaa.

5Med'inaa Godaa nu S'oossaa mali oonee? I bolla d'ok'k'an kawutetsaa araatan utteedda.

6I salotuwaanne sa'aa s'eellanaw duge hokkee.

7I hiyyeesaa baanaappe d'ok'k'u ootsee; metootanchchaakka bidintsaa pituwaappe dentsee.

8Bare asaa mooddiyaawanttunna utissee.

9Maynne mishirato naanatuwaa aato ootsiide, nashechchiide I golliyaan izo bonchchissee. Med'inaa Godaa galatite!

← Chapter 112 Chapter 114 →