Psalms 112

Amharic Dawro DFBLVL (Geeshsha Mas'aafaa)

1Med'inaa Godaa galatite! Med'inaa Godaw yayyiyaanne, Aa azazuwaa polanaw daroppe nashetiyaa asay, anjjetteedawaa.

2Aa naanatuu biittan wolk'k'aama gidana; suure asatuwaa yeletay anjjettana.

3Shaluunne duretetsay Aa golliyaan de'ee; Aa s'illotetsaykka med'inaw de'ana.

4Suure asaw, keeka, s'illonne k'arettiyaa asatoo, d'umaa giddon poo'uu poo'ee.

5Keekatetsan c'oo tal"iyaa uraw, bare oosuwaa suuretetsan ootsiyaa uraw, keekabay yaana.

6S'illo Asay awudenne kunddenna; med'inaw I hassayettana.

7Iitabaa I sisooppekka dagammenna; ayaw gooppe, Aa wozanay k'aas's'ena; Med'inaa Godaan I ammanettee.

8Aa wozanay s'ala gidiyaa diraw, ubbakka I yayyena; wurssetsan bare morkketuu s'oonettina be'ana.

9I hiyyeesaa asaw darissiide immeedda; k'ay Aa s'illotetsay med'inaw de'ee; Aa kac'ii bonchchuwaan d'ok'k'u gee.

10Iita Asay hewaa be'iide yilotee; achchaa garc'c'iide, c'oo d'ayee. Iita asaa amuu c'oo attanawaa.

← Chapter 111 Chapter 113 →