Psalms 7

Amharic Dawro DFBE (ጌሻ ማጻፋ) No Year

1አቤት መና ጎዳዉ፥ ታ ጾሳዉ፥ ታን ኔኮ ባቃታደ ቆሰታይ። ታና የደርስያ ኡባቱዋፐ ኔን ታና አሻ አካ።

2ኔን ታና አሸናባ ግዶፐ፥ ኡንቱንቱ ታና ጋሙዋዳን ቦንቂደ፥ ኦንነ አሸናን መንሬና።

3አቤት መና ጎዳዉ ታ ጾሳዉ፥ ታን አሳ ናቄዳዋ ግዶፐ፥ ሄዌነ ታ ላግያዉ ሎኡዋ ድራዉ ኢታ ዛሬዳዋ ግዶፐነ፥ ዎይ ጋሱ ባይናን ታ ሞርክያ ቦንቄዳዋ ግዶፐ፥ ሀዋ ማላ የዎቱዋፐ እቱዋነ ታን ኦዳዋ ግዶፐ፥

5ታ ሞርኪ ታና የደርሲደ ኦይቆ። ታና ሳኣን የሬ፤ ያቲደ፥ ታና ቢታን ኦል ባሾ።

6አቤት መና ጎዳዉ፥ ነ ሀንቁዋን ደንዳ ኤቃ፤ ታ ሞርከቱዋ ኤጽያ ሀንቁዋ ቦላ ደንዳ። ታ ጾሳዉ ጎዳዉ፥ ቤጎታ፤ ቱሙዋ ፕርዳ።

7ካዉተቱዋ ሺቁ ነ ዩሹዋን ሺቆ፤ ኔን ኡንቱንቱፐ ቦላና ግዳደ ሃና።

8መና ጎዳይ ካዉተቱዋ ቦላ ፕርዴ። አቤት መና ጎዳዉ፥ ታዉ ታ ጽሎተዳን ፕርዳ፤ አቤት ኡባፐ ቃዉ፥ ታ ሱረተዳን ፕርዳ።

9ቆፋነ ዎዛና ብዳደ ኤርያ ጽሎ ጾሳዉ፥ ኢታቱዋ ገንያ ኔን ይሳ። ሽን ጽሉዋ ሳሮታን ምንሳ ዎ።

10ዎዛና ጽሉዋ አሽያ ጾሳይ ታዉ ጎንዳለ።

11ጾሳይ ጽሉዋ ፕርድያዋ፤ እ ሀች ሀች ሀንቀትያ ጾሳ።

12አሳይ ባረ ናጋራ ፓጺደ ስመናን እጾፐ፥ ጾሳይ ባረ ማሻ ሌፌ፤ እ ባረ ዎንዳፍያ ጊግሴ።

13እ ባረ ዎያ ኦላ ሚሻቱዋ ጊግሴ፤ ታማ ላጩዋዳን ጶልያ ባረ ዎንዳፍያ ቶራ ጊግሴ።

14ኢታተ ሻሃሬዳ፥ ገንያ ሻሃራ ሻሃሬዳዌ፥ ዎርዱዋ የሌ።

15ሀራ አሳቶ ኦላ ቦኬዳ አሳይ ባረ ቦኬዳ ኦላን ባረዉ ኩንዴ።

16እ አህያ ገኒ አ ሁጲያዉ ስሜ። አ ማካላይነ አ ሁጲያዉ ስሜ።

17መና ጎዳ ጽሎተ ድራዉ፥ ታን አ ጋላታና፤ ቃይ ኡባፐ ቂያ መና ጎዳ ሱንዉ፥ ታን ጋላታ የጻና።

← Chapter 6 Chapter 8 →