Psalms 59

Amharic Dawro DFBE (ጌሻ ማጻፋ) No Year

1አቤት ታ ጾሳዉ፥ ታ ሞርከቱዋፐ ታና አሻ፤ ታ ቦላ ደንድያዋንቱፐ ታና ናጋ።

2ኢታ ኦያዋንቱፐ ታና አሻ አካ፤ ሱ ጉስያ አሳቱዋፐ ታና አሻ።

3አቤት ጾሳዉ፥ ኡንቱንቱ ታና ዎናዉ ኩኩሊደ ናግያዋ በአ! ሄ ዎልቃማ ኢታ አሳቱ ታ ቦላ ያኢኖ። አቤት መና ጎዳዉ፥ ታ ባይዙዋ ድራዉ ዎይ ታ ናጋራ ድራዉ ግደና።

4ኡንቱንቱ ታና ኦላናዉ ዎ ጃምያዌ፥ ታ ባላ ድራሳ ግደና። ቤጎታ፥ ታኮ ሃ ያደ በአ።

5አቤት ኡባፐ ዎልቃማ መታ ኡባ ጎዳ ጾሳዉ፥ እስራኤልያ ጾሳዉ፥ ካዉተቱዋ ኡባ ፕርዳናዉ ቤጎታ፤ ማካላ ኦያዋንታ ማሮፓ።

6ኡንቱንቱ ኦማርሳን ስሚኖ፤ ካናቱዋዳን ቦጪደ፥ ካታማ ግዶን ዩዪኖ።

7ሄኮ፥ ኡንቱንቱ ባረንቱ ዶናን ሃሳዪደ ሳልክኖ፤ ኡንቱንቱ እንጻርሳይ ማሻ ማላ። ኡንቱንቱ ብሮ፥ “ኦንነ ስሰና” ጊደ ቆፒኖ።

8ሽን አቤት መና ጎዳዉ፥ ኔን ኡንቱንቱ ቦላ ሚጫሳ፤ ካዉተቱዋ ኡባ ቦላ ቅሊጫሳ።

9ጾሳዉ፥ ኔን ታዉ ቆሰታ አትያ ሳኣ ግድያ ድራዉ፥ ታን ነ ዎልቃን አማነታይ።

10ታ ጾሳይ አገና ባረ ሲቁዋን ታኮ ያና፤ ታ ጾሳይ ታ ሞርከቱዋ ጾንያዋ እ ታና በሳና።

11ታ አሳቱ ዶገና ማላ፥ ኔን ኡንቱንታ ዎፓ። አቤት ጾሳዉ፥ ኑ ጎንዳልያዉ፥ ነ ዎልቃን ኡንቱንታ ላላደ ጾና።

12ኡንቱንቱ ባረንቱ ዶና ናጋራ ድራዉነ ባረንቱ እንጻርሳ ቃላ ድራዉ፥ ባረንቱ ኦቶሩዋን ኦይቀትኖ። ኡንቱንቱ ሸቃ ድራዉነ ኡንቱንቱ ሃሳይያ ዎርዱዋ ድራዉ፥

13ነ ሀንቁዋን ኡንቱንታ ይሳ። ጾሳይ ያቆባ ዛራቱዋ ሞድያዋነ ሳኣ ጋጻ ጋካናዉ ደእያ ቢታ ሞድያዋ አሳይ ኤራና ማላ፥ ኡንቱንታ ሙለ አተናዳን ይሳ።

14ታ ሞርከቱ ኦማርሳን ስሚኖ፤ ካናቱዋዳን ቦጪደ፥ ካታማ ግዶን ዩዪኖ።

15ኡንቱንቱ ምያዋ ደማናዉ ቶይላካቲኖ፤ ካላና ዮፐ ላዊኖ።

16ሽን ታን ነ ዎልቃ ሳባና፤ ዎንታ አገና ነ ሲቁዋባ የጻና። አያዉ ጎፐ፥ ኔን ታዉ ታ ዋይያ ጋላስ፥ ታን ባቃታ አትያ ሳነ ቆሰታ አትያሳ ግዳዳ።

17አቤት ታዉ ዎልቃ ግዴዳ ጾሳዉ፥ ታን ኔና ሳባና። አያዉ ጎፐ፥ ታን ቆሰታ አትያ ሳአይነ አገና ሲቁዋ ታና በስያ ጾሳይ ኔና።

← Chapter 58 Chapter 60 →