Psalms 58

Amharic Dawro DFBE (ጌሻ ማጻፋ) No Year

1ህንተኖ ደርያ ሞድያዋንቶ፥ ቱሙዋፐ ልክያ ሃሳዪቴ? አሳ ኡባ ግዶን ጽሉዋ ፕርዲቴ?

2ግደና፥ ህንተ ዎዛናን ኢታባ ሀልቺታ፤ ቢታን ህንተ ኩሺ ማካላባ ኦዳ።

3ኢታ አሳይ አት ኡሉዋፐ ዶሚደ ባሌ፤ የለቶደፐ ዶሚደ፥ ባይዜነ ዎርዱዋ ሃሳዬ።

4ኡንቱንቱ ሾሻዳን ይሻና ደኢኖ፤ ቱለ ሀሱዋዳን ሀይ ቱጬድኖ።

5ብትያዌ አይ ኬሻ ሂላንቻ ግዶፐካ፥ ሀሱ አ ሳሱከ ስሰና።

6አቤት ጾሳዉ፥ ኡንቱንቱ አቻ ኡንቱንቱ ጋፓታ ግዶን መን፤ አቤት መና ጎዳዉ፥ ጋሞቱዋ ካስልያ ካ።

7ኡንቱንቱ ጎግ ይያ ሃዳን ይኖ። ኡንቱንቱ ባረንቱ ዎንዳፍያ ዱክያ ዎደ፥ ፖ ጼራን ጫድያ አይፊ ዮ።

8ኡንቱንቱ ሙሺደ ሳሶ ከስያ ያዳን ሀንኖ፤ አት ኡሉዋፐ ቦሸቲደ የለቴዳ፥ ፖኡዋ በኤና ናኣዳን ሀንኖ።

9ኡንቱንቱ አጉን ግዲደ ዳሻናፐ ካሰ፥ ኡንቱንቱ ብሮ ፑትያን ደእሽን፥ ጾሳይ ኡንቱንታ ባረ ሀንቁዋን ይሳና።

10ሀሉዋ ከስያዋ በእያ ዎደ፥ ጽሎቱ ናሸታና። ኢታቱዋ ሱን ባረንቱ ገድያ ሜጨታና።

11ሄ ዎደ አሳይ፥ “ቱሙካ ጽሎቶ ዎይቱ ደኤ፤ ቱሙካ ሳኣ ቦላ ፕርድያ ጾሳይ ደኤ” ያጋና።

← Chapter 57 Chapter 59 →