Genesis 35

Amharic Dawro DFBE (ጌሻ ማጻፋ) No Year

1ጾሳይ ሄዋፐ ጉየ ያቆባ፥ “ደንዳደ ፑደ ቤቴለ ባደ ያን ደአ። ኔን ነ እሻ ኤሳፐ ባቃትያ ዎደ ነዉ ቆንጬዳ ጾሳዉ ያን ያርሽያ ሳኣ ኬጻ” ያጌዳ።

2ያቆብ ባረ ሶ አሳነ ባረናና ደእያዋንታ ኡባ፥ “ህንተንቱ ግዱዋን ደእያ አላጋ ጾሳቱዋ ምስለቱዋ ድግተ፤ ህንተንቱ ቦላ ጌሽተ፤ ህንተንቱ ማዩዋነ ላምተ።

3አነ ደንዲደ፥ ፑደ ቤቴለ ቦይተ፤ ታ መቱዋ ጋላስ ታና ስሴዳ፥ ታን ቤዳ ሳኣን ኡባን ታናና ግዴዳ ጾሳዉ፥ ታን ያን ያርሽያ ሳኣ ኬጻና” ያጌዳ።

4ሄዋ ድራዉ ኡንቱንቱ ባረንቶ ደእያ አላጋ ጾሳቱዋ ምስለቱዋ ኡባነ ባረንቱ ሀይን ደእያ ጉድቻ ኡባ ያቆባዉ እሜድኖ፤ ያቆብ ሄዋንታ ሰኬማን ደእያ ዎላ ጋርሳን ሞጌዳ።

5ሄዋፐ ጉየ፥ ያቆብነ አ አቱማ ናናይ ደንዲደ ቢሽን፥ እት ኡራይነ ኡንቱንታ ኦይቃናዉ ካልቤና፤ አያዉ ጎፐ፥ ኡንቱንቱ ቢሽን፥ ኡንቱንቱ ዩሹዋን ደእያ ካታማ አሳ ኡባ ቦላ ጾሳ ዳጋማይ ዎዳ።

6ያቆብነ አናና ደእያ አሳይ ኡባይ ካናነ ጋድያን ደእያ (ቤቴለ ግያ) ሎዛ ጋኬድኖ።

7ያን እ ያርሽያ ሳኣ ኬጼዳ፤ እ ሄ ሳኣ ኤል-ቤቴለ ጊደ ሱንዳ፤ አያዉ ጎፐ፥ እ ባረ እሻፐ ባቃቲደ ብያ ዎደ፥ ጾሳይ አዉ ቆንጬዳ ሳአይ ሄዋ።

8ርብቆ ድችያ ደቦራ ያን ሀይቃዱ፤ ቤቴለፐ ህርክና ደእያ ዎላ ጋርሳን እዛ ሞገታዱ፤ ሄዋ ድራዉ ሄ ም ሱንይ ዬኩዋ ዎላ ጌተቴዳ።

9ያቆብ ማስጰጾምያፐ ስሜዳዋፐ ጉየ፥ ጾሳይ አዉ ዛረ ቆንጪደ፥ አ አንጄዳ፤

10ጾሳይ አ፥ “ነ ሱንይ ያቆባ፤ ሽን ሀዋፐ ስንናዉ ኔን ኡባካ ያቆባ ጌተታካ፤ ነ ሱንይ እስራኤልያ ግዳና” ያጊደ እ አ እስራኤልያ ሱንዳ።

11ቃይ ጾሳይ ያቆባ፥ “ታን ኡባ ዳንዳይያ ጾሳ፤ ኔን የለታ፤ ጮራታ፤ ካዉተቱነ ካዉተ አሳይ ኔፐ ከሳና፤ ካተቱካ ነ ጉልባታፐ ከሳና።

12ታን አብራሃመዉነ ይሳቃዉ እሜዳ ቢታ፥ ቃይ ነዉ እማይ፤ ኔፐ ጉየና ታን ሀ ቢታ ነ ዘረዉ እማና” ያጌዳ።

13ሄዋፐ ጉየ፥ ጾሳይ አናና ሃሳዬዳ ሳኣፐ ፑደ ከሴዳ።

14ያቆብ ጾሳይ ባረናና ሃሳዬዳ ሳኣን ሹቻ ኤሲደ፥ አ ቦላ ኡሻ ያርሹዋ ትጌዳ፤ ዛይትያካ ቦላ ትጌዳ።

15ያቆብ ጾሳይ ባረናና ሃሳዬዳ ሳኣ “ቤቴለ” ጊደ ሱንዳ።

16ኡንቱንቱ ሄዋፐ ጉየ፥ ቤቴለፐ ደንዴድኖ። ኡንቱንቱ ኤፍራታ ጋካናዉ ላፋ አሽያ ዎደ፥ ራሄሎ የሉ ኦይቄዳ፤ የሉዋን እዛ ሎይ ዋየታዱ።

17የሉ እዞ ዋይሴዳ ዎደ እዞ የልስያና፥ “ያዮፓ፤ ሀዌካ አቱማ ናኣ” ያጋዱ።

18ሽን እዛ ሀይቃደ፥ ሸምፑ ከስሽን፥ ባረ ናኣ ቤንኦና ሱንዱ፤ ሽን አ አዉ አ ቢንያማ ሱንዳ።

19ሄዋፐ ጉየ፥ ራሄላ ሀይቃ ባሻዱ፤ ቤተሌመ ግያ ኤፍራታ አፍያ ኦግያ ዶናን ሞገታዱ።

20ያቆብ እዝ ዱፉዋን ሀዉልትያ ሹቻ ኤሴዳ፤ ሄ ሀዉልቲ ሀቼ ጋካናዉ ራሄል ዱፉዋ ኤርሴ።

21እስራኤሊ ሄዋፐ ደንዲደ፥ ኤደራ ግምቢያፐ ሄፍንን ባረ ዱንካንያ ቶኬዳ።

22እስራኤሊ ሄ ጋድያን ደእሽን፥ ሮቤል ቢደ፥ ባረ አዎ የሌዳ ቆማቲ ባልና ግሴዳ። እስራኤሊ ሀ የዉዋ ስሴዳ። ያቆባ አቱማ ናናይ ታማነ ላአ።

23ልያ ናናይ ያቆባ ባይራ ናኣ ሮቤላ፥ ስሞና፥ ሌዋ፥ ይሁዳ፥ ይሳኮራነ ዛብሎና።

24ራሄል አቱማ ናናይ ዮሴፋነ ቢንያማ።

25ራሄል ዳንጋጽራት ባል አቱማ ናናይ ዳናነ ንፍታሌማ።

26ልያ ዳንጋጽራት ዝልፕ አቱማ ናናይ ጋዳነ አሴራ። ሀዋንቱ ማስጰጾምያን ያቆባዉ የለቴዳ አ አቱማ ናና።

27ያቆብ (ከብሮና ግያ) ቅርያት-አርባአ ማታን ማምረን ደእያ፥ ባረ አዉዋ ይሳቃ ሶ ዬዳ፤ ሄ ሳአይ ካሰ አብራሃመነ ይሳቅ ደኤዳ ሳኣ።

28ይሳቅ ጼታነ ሆስፑን ታሙ ላይ ደኤዳ፤

29እ ዳሮ ዎድያ ደኢደ፥ ሎኦ ጭም ሀይቂደ ባረ ማይዛን ጋከቴዳ። አ ናናይ ኤሳይነ ያቆብ አ ሞጌድኖ።

← Chapter 34 Chapter 36 →