Genesis 34

Amharic Dawro DFBE (ጌሻ ማጻፋ) No Year

1ልያ ያቆባዉ የሌዳ ናታ ዋና፥ ሄ ዎደ ሄ ጋድያ ማጫዋንታ በአናዉ ከሳዱ።

2ሄ ጋድያ ሞድያ ህውያ ሀሞራ ናኣ ሸኬመ እዞ በኢደ፥ እዞ ሆር አፊደ ባይዜዳ።

3አ ዎዛናይ ያቆባ ናቶ ዲኖ አሞቴዳ፤ እ እዞ ሲቄዳ፤ እዝዉ ሎእያዋ ሃሳዬዳ።

4ሸኬመ ባረ አዉዋ ሀሞራ፥ “ታዉ ሀ ናቶ ማቼተዉ ኦቻርክ” ያጌዳ።

5ያቆብ ባረ ናታ ዳና ባዬዳዋ ስስያ ዎደ፥ አ አቱማ ናናይ ዎራን መህያና ደእኖ፤ ሄዋ ድራዉ ኡንቱንቱ ጋካናዉ ጮኡ ጌዳ።

6ሄዋፐ ጉየ፥ ሸኬማ አዉዋ ሀሞር ያቆባና ሃሳያናዉ ዬዳ።

7ያቆባ አቱማ ናናይ ሄዋ ስሴዳ ሳና ዎራፐ ዬድኖ፤ ኡንቱንቱ ካዮቴድኖነ ሀንቀቴድኖ፤ አያዉ ጎፐ፥ ሸኬመ ያቆባ ናቶ ሆር አፊደ ባይዝያዋ፥ እስራኤልያ ቦላ ፖኮባ፥ ኦናዉ በሰናባ ኦዳ።

8ሽን ሀሞር ኡንቱንታ፥ “ታ ናአይ ሸኬመ ህንተንቱ ናትዉ ዳርስ ዳጋሜዳ፤ ሀያና እዞ አዉ ማቼተዉ እሜርክቴ!

9ኑናና አከትተነ ገለትተ፤ ህንተንቱ ማጫ ናና ኑዉ እምተ፤ ኑ ማጫ ናናነ ህንተንቶ አክተ።

10ህንተንቱ ኑ ግዶን ኡታናዉ ዳንዳዪታ፤ ቢታይ ሎይ አካ፤ አን ደእተ፤ ዛልእተ፤ አን ማጹዋ ደምተ” ያጌዳ።

11ሄ ዎደ ሸኬመ ዲን አዉዋነ እ እሻቱዋ፥ “ታን ህንተንቱ ስንን ናሸቶፐ፥ ህንተንቱ ኦችያዋ አያ ግዶፐነ እማና።

12ህንተንቱ ምሽራ ናትዉ እምያዋነ ጭሎሻ ህንተንቱ ኮዮዋ ኬሻ ዳርሲደ ታና ኦችተ፤ ታን ህንተንቱ ታና ኦቼዳዋ አያነ እማና፤ ሽን ታን አካናዳን ናቶ ታዉ እሜርክቴ!” ያጌዳ።

13ባረንቱ ምቻቶ ዲኖ ሸኬመ ቱንሴዳ ድራዉ፥ ያቆባ አቱማ ናናይ ሸኬማዉነ አ አዉዋ ሀሞራዉ ዎርዱዋ ኦዴድኖ፤

14ኡንቱንታ ሀዋዳን ያጌድኖ፤ “ኑን ሄዋ ማላ ኦና ዳንዳዮኮ፤ ኑን ኑ ምቻቶ ቃጻረትቤና አሳዉ እሞኮ፤ ሄዌ ኑና ካዉሽያዋ።

15ኑን ህንተንቱ እትባ ኦፐ ህንተንቶ፥ ‘ኤኖ’ ጋና፤ ሄዌ አዬ ጎፐ፥ ህንተንቱ ጋድያ አቱማ አሳይ ኡባይ ቃጻረቲደ ኑናዳን ሀኖፐ፥

16ኑን ኑ ማጫ ናና ህንተንቶ እማናዉ ‘ኤኖ’ ጋና፤ ህንተንቱ ማጫ ናናካ ኑዉ አካና። ኑን ህንተንቱ ግዶን ኡቲደ፥ ህንተናና እት አሳ ግዳና።

17ሽን ህንተንቱ ቃጻረታናዉ ኤኖ ጌናዋ ግዶፐ፥ ኑን ኑ ምቻቶ አኪደ ባና” ያጌድኖ።

18ኡንቱንቱ ጌዳዌ ሀሞራዉነ አ ናኣ ሸኬማዉ ሎአ ማላቴዳ።

19ሄ ዎዳላይ፥ ባረ አዉዋ ጎለን ደእያ ኡባፐ አ ቦንቼቴዳዌ፥ ያቆባ ናትን ናሸቴዳ ድራዉ፥ ኡንቱንቱ ጌዳዋ ኦናዉ ጋምእቤና።

20ሄ ዎደ ሀሞርነ አ ናአይ ሸኬመ ባረንቱ ካታማ ጉታራ ቢደ፥ ባረንቱ ካታማ አሳዉ ሀዋዳን ያጊደ ኦዴድኖ፤

21“ሀ አሳቱ ኑናና ስጋ፤ ኡንቱንቱ ኑ ቢታን ደኢኖነ ዛልኢኖ፤ ቢታይ ሎይ አካ። ኡንቱንቱ ማጫ ናናካ ኑን አካና፤ ኡንቱንቱካ ኑ ማጫ ናና አካና።

22ሽን ኑናና ኡንቱንቱ እት አሳዳን ደአናዉ ኑን እትባ ማየታናዉ ኮሼ፤ ሄዌነ፥ ኡንቱንቱ ቃጻረቴዳዋዳን ኑ አቱማ አሳይ ኡባይ ቃጻረታናዋ።

23ኑን ሄዋዳን ኦፐ፥ ኡንቱንቱ ሚዛይ፥ ኡንቱንቱ ማጹነ ኡንቱንቱ ሀራ መሂ ኡባይ ኑዋ ግደኔ? ሄዋ ድራዉ አነ ኑን ኡንቱንቱ ግያዋ ኤኖ ጎይተ፤ ኡንቱንቱካ ኑ ግዶን ደአና” ያጌድኖ።

24ካታማ ጉታራ ሺቄዳ አሳቱ ኡባይ ሀሞራዉነ አ ናኣ ሸኬማዉ፥ “ኤኖ” ጌድኖ። ያትና ሄ ካታማ አቱማ አሳቱ ኡባይ ቃጻረቴድኖ።

25ሄዘን ጋላስ፥ ኡንቱንቱ ኡባይ ባረንቱ ቃጻራ ማዱን ሳከት ደእሽን፥ ያቆባ አቱማ ናናቱዋፐ ላኡ፥ ስሞንነ ሌዊ፥ ዲን እሻቱ፥ ባረንቱ ማሻ አኪደ፥ ኦንነ ኤረናን ካታማ ገሊደ፥ አቱማ አሳቱዋ ኡባ ዎድኖ።

26ሀሞራነ አ ናኣ ሸኬማ ማሻን ዎደ፥ ባረንቱ ምቻቶ ዲኖ ሸኬማ ጎልያፐ አኪደ አፌድኖ።

27ያቆባ አቱማ ናናይ ሄ አሃቱዋ ቦላ ገሊደ፥ ባረንቱ ምቻቶ ዲኖ ቱንሴዳ ካታማ ቦንቄድኖ።

28ኡንቱንቱ ዶርሳ ዉድያ፥ ሚዛ ዉድያ፥ ሀርያ፥ ካታማ ግዶን ደእያዋነ ጋጻን ደእያዋ ኡባ አኬድኖ።

29ኡንቱንቱ ማጹዋ ኡባ፥ ኡንቱንቱ ናና ኡባነ ማቻቱዋ ኡባ ኦሞዴድኖ፤ ጎለን ደኤዳዋ ኡባ ቦንቄድኖ።

30ያቆብ ስሞናነ ሌዊያ፥ “ህንተንቱ ታ ቦላ መቱዋ አህ ክቼድታ፤ ሀ ጋድያን ደእያ ካናናቱነ ፓርዘቱ ታና እጻናዋንታ፤ ኑን ፓይዱዋን ጉ፤ ኡንቱንቱ እትፐ ግዲደ ታ ቦላ ደንዶፐ፥ ታንነ ታ ሶ አሳይ ያና” ያጌዳ።

31ሽን ኡንቱንቱ፥ “ያትና እ ኑ ምቻቶ ሻርሙጻዳን ኦና በሲ?” ያጌድኖ።

← Chapter 33 Chapter 35 →