Psalms 16

Amharic 2000 (የአማርኛ መጽሐፍ ቅዱስ (ሰማንያ አሃዱ))

1አቤቱ፥ ጽድቄን ስማኝ፥ ልመናዬንም አድምጠኝ፤ በተንኰለኛም ከንፈር ያልሆነውን ጸሎቴን አድምጠኝ፤

2ፍርዴ ከፊትህ ይወጣል፥ ዐይኖቼም ጽድቅህን አዩ።

3በሌሊትም ጐበኘኸኝ፤ ልቤንም ፈተንኸው፥ ፈተንኸኝ፥ ዐመፅም አልተገኘብኝም።

4የሰውን ሥራ አፌ እንዳይናገር፥ ስለ ከንፈሮችህ ቃል ጭንቅ የሆኑ መንገዶችን ጠበቅሁ።

5ሰኰናዬ እንዳይናወጥ አረማመዴን በመንገድህ አጽና።

6እግዚአብሔር ሰምቶኛልና እኔ ጮኽሁ፤ ጆሮህን ወደ እኔ አዘንብል፤ ቃሌንም ስማ።

7ቀኝህን ከሚቃወሟት፥ የሚያምኑብህን የሚያድናቸውን ቸርነትህን ግለጠው።

8እንደ ዐይን ብሌን ጠብቀኝ፤ በክንፎችህ ጥላ ሰውረኝ፤

9ከሚያጐሳቍሉኝ ኃጥኣን ፊት፥ ጠላቶቼ ግን ነፍሴን ተመለከትዋት፤

10አንጀታቸውን ቋጠሩ፥ አፋቸውም ትዕቢትን ተናገረ።

11አሁንም አባረሩኝ፤ ከበቡኝም፤ ዐይናቸውንም ወደ ምድር ዝቅ ዝቅ አደረጉ።

12እነርሱ ለንጥቂያ እንደሚሸምቅ አንበሳ፥ ተሰውሮም እንደሚኖር እንደ አንበሳ ግልገል ተቀበሉኝ።

13አቤቱ፥ ተነሥ፥ ደርሰህ አሰናክላቸው፤ ነፍሴንም ከጦር አድናት።

14ሰይፍህ በእጅህ ጠላቶች ላይ ናት። አቤቱ፥ በምድር ካነሱ ሰዎች፥ በሕይወታቸው ከፋፍላቸው፥ ከሰወርኸው ሆዳቸው ጠገበች፤ ልጆቻቸው ጠገቡ። የተረፋቸውንም ለሕፃናቶቻቸው ተዉ።

15እኔ ግን በጽድቅህ ፊትህን አያለሁ፤ ክብርህን በማየትም እጠግባለሁ።

← Chapter 15 Chapter 17 →