Psalms 111

Afrikaans (NLV) 2011

1Prys die Here! Met my hele hart wil ek die Here loof in die vergadering van die gemeente, in die byeenkoms van die opregtes.

2Die dade van die Here is groot! Almal wat daaroor bly is, dink hieroor na.

3Heerlik en vol majesteit is sy werke. Sy geregtigheid hou vir altyd stand.

4Sy wonders sal altyd onthou word. Genadig en barmhartig is ons Here!

5Hy voed hulle wat Hom dien; Hy onthou altyd sy verbond.

6Hy het sy kragtige dade aan sy volk getoon deur die land van ander nasies aan hulle te gee.

7Alles wat Hy doen, is waar en reg, en al sy voorskrifte is betroubaar.

8Hulle is vir altyd geldig, en met trou en opregtheid moet dit gehoorsaam word.

9Hy het ’n losprys vir sy volk betaal, en sy verbond vir altyd gewaarborg. Heilig en ontsagwekkend is sy Naam!

10Eerbied vir die Here is die begin van wysheid. Dié wat sy voorskrifte navolg, het goeie insig. Hy sal vir altyd geprys word!

← Chapter 110 Chapter 112 →